ލަންޑަން (އޮކްޓޫބަރު 7) - އިނގިރޭސި ޕްރިމިއާ ލީގުގައި މިރޭ އެއް ކުޅުންތެރިއަކު މަދުކޮށް ކުޅެ ޓޮޓެންހަމް ހޮޓްސްޕާސް އިން 1-0 އިން ލޫޓަން ޓައުން ބަލިކޮށް ލީގުގެ އެއް ވަނަ އަށް ޖެހިލިއިރު، ނަތީޖާ ނެރުމުގައި މައްސަލަ ދިމާވެފައި އޮތް މެންޗެސްޓާ ޔުނައިޓެޑާއި ޗެލްސީން މުހިންމު މޮޅެއް ހޯދައިފި އެވެ.
ޔުނައިޓެޑުން އިތުރު ވަގުތުގައި ޖެހި ދެ ގޯލާ އެކު ވަނީ ފަހަތުން އަރައި، 2-1 އިން ބްރެންޓްފޯޑް ބަލިކޮށްފަ އެވެ. ރަށުންބޭރުގައި ޗެލްސީން ވަނީ ފަހަތުން އަރައި 4-1 އިން ބާންލީ ބަލިކޮށްފަ އެވެ.
ފުރަތަމަ ހާފުގެ އިތުރު ވަގުތުގައި ޓޮޓެންހަމްގެ މިޑްފީލްޑަރު، ޔްވެސް ބިސޫމާ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. އެއް ކުޅުންތެރިއަކު މަދުކޮށް ދެ ވަނަ ހާފުގައި ކުޅުނު ޓޮޓެންހަމް އިން ވަނީ ދެ ވަނަ ހާފް ފެށިގެން ހަތް މިނިޓް ތެރޭ މެޗުގެ ހަމައެކަނި ގޯލު ޖަހައިފަ އެވެ. މިއީ ކޯނަރެއްގައި އަވަސް ކުޅުމެއް ކުޅެ، ޖޭމްސް މެޑިސަން ދިން ބޯޅައަކުން މިކީ ވެން ޑަ ވެން ޖެހި ގޯލެކެވެ.
ޓޮޓެންހަމް ލީގުގެ އެއް ވަނައިގައި އޮތީ އަށް މެޗުން 20 ޕޮއިންޓް ހޯދައިގެންނެވެ. ދެ ވަނައިގައި އޮތް މެންޗެސްޓާ ސިޓީ އަށް ހަތް މެޗުން 18 ޕޮއިންޓް ލިބިފައިވާއިރު، އެ ޓީމު މާދަމާރޭ އާސެނަލާ ދެކޮޅަށް ކުޅޭނެ އެވެ. އާސެނަލް އޮތީ ހަތް މެޗުން 17 ޕޮއިންޓާ އެކު ތިން ވަނައިގަ އެވެ. ސިޓީ އާއި އާސެނަލް މެޗުން މޮޅުވާ ޓީމަކަށް އެއް ވަނަ އަށް އެރުމުގެ ފުރުސަތު އެބައޮތެވެ.
ޓޮޓެންހަމް އަށް ގޯލު ޖަހައިދިން ވެން ޑަ ވެން އުފާފާޅުކުރަނީ: މިއީ މި ސީޒަނުގައި އެ ޓީމާ ގުޅުމަށް ފަހު ޖަހައިދިން ފުރަތަމަ ގޯލު.
ފުރަތަމަ ހާފުގައި މަތިއަސް ޖެންސެން ޖެހި ގޯލުން ބްރެންޓްފޯޑް ލީޑުނެގި މި މެޗުގެ ބޮޑުބައިގައި އެ ޓީމު އޮތީ ކުރީގަ އެވެ. ޔުނައިޓެޑް ޖެހިޖެހިގެން އަމިއްލަ ދަނޑުގައި ލީގުގެ ތިން މެޗުން ބަލިވާން ދަނިކޮށް، ހުރިހާ ކަމެއް ބަދަލުކޮށްލީ ބެންޗުން އެރި ސްކޮޓްލެންޑްގެ މިޑްފީލްޑަރު ސްކޮޓް މެކްޓޮމިނޭ އެވެ. އިތުރު ވަގުތުގެ ގޮތުގައި ދެއްކި ހަ މިނިޓް ތެރޭ މެކްޓޮމިނޭ ވަނީ ދެ ގޯލު ޖަހައި ޔުނައިޓެޑް މޮޅުކޮށްދީފަ އެވެ.
ބާންލީން ވަނީ 18 އަހަރުގެ ފޯވާޑް، ވިލްސަން އޮޑޯބާޓް ޖެހި ގޯލުން ލީޑުނަގައިފަ އެވެ. ޗެލްސީން އެއްވަރުކުރީ ފުރަތަމަ ހާފު ނިމުމުގެ ކުރިން ބާންލީގެ ޑިފެންޑަރު އަމީން އަލް-ދަހީލް އަތުން ބައިކޮޅަށް ވަން ގޯލަކުންނެވެ. އަމީން އަތުން މި ގޯލު ވަނީ ޗެލްސީގެ ރަހީމް ސްޓާލިންގެ އެޓޭކެއް ހުއްޓުވަން އުުޅުމުގެ ތެރޭގަ އެވެ.
ޗެލްސީ މޮޅުވީ ދެ ވަނަ ހާފުގައި ތިން ގޯލު ޖަހައިގެންނެވެ. އެ ޓީމުން ލީޑުނެގި ލަނޑަކީ ޕެނަލްޓީ އަކުން ކޯލް ޕާމާ ޖެހި ގޯލެކެވެ. އަނެއް ގޯލުތައް ޖެހީ ސްޓާލިން އާއި ސަސްޕެންޝަނަށް ފަހު އެނބުރި އައި ފޯވާޑް، ޖެކްސަން މާޓިނޭޒް އެވެ.
މިރޭގެ ނަތީޖާތަކާ އެކު ޔުނައިޓެޑާއި ޗެލްސީ ވަނީ ލީގު ތާވަލުގެ ކުރިއަށް ޖެހިލައިފަ އެވެ. އެ ގޮތުން، ޔުނައިޓެޑް ލީގުގެ ނުވަ ވަނައިގައި އޮތީ އަށް މެޗުން 12 ޕޮއިންޓް ހޯދައިގެންނެވެ. ޗެލްސީ އަށް އަށް މެޗުން 11 ޕޮއިންޓް ލިބިފައިވާއިރު، އެ ޓީމު އޮތީ ލީގުގެ 10 ވަނައިގަ އެވެ.
