އެ މަނިކުފާނުގެ ސަރުކާރުގައި ނޫސްވެރިކަމުގެ މިނިވަންކަން އެއްވެސް ހުރަހެއް ކުރިމަތި ނުކުރާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަންގު ޓީވީގެ އިވެންޓެއްގައި ރޭ ވާހަކަ ދައްކަވަމުން މުއިއްޒު ވިދާޅުވީ މީޑިއާތަކަށް އަމިއްލަ އިހްތިޔާރުގައި ކުރިއަރައި ދާން ހުރަސް ނާޅުއްވާނެ ކަމަށެވެ. މީޑިއާތައް ކުރިއަރުވަން ސަރުކާރުގެ ތެރެއިން ގިނަ ކަންތައްތަކެއް ކުރައްވަން ބޭނުންފުޅުވާ ކަމަށް ވެސް ވިދާޅުވި އެވެ.
ދައުލަތުގެ ބަޖެޓުން ވަކި ޕަސެންޓެއް އަމިއްލަ މީޑިއާތަކަށް ކަނޑައަޅައި، އެ ފައިސާ ހަމަޖައްސައިދިނުމަކީ އެމަނިކުފާނުގެ ރިޔާސީ ވައުދެކެވެ.
"އަޅުގަނޑުމެންގެ ސަރުކާރުގަ މީޑިއާ ވަނީ ހަގީގަތުގައިވެސް ވަރަށް މިނިވަން، އަމިއްލަ އިހްތިޔާރުގައި ކުރިއަރައި، ގެންދަން ބޭނުންވާ އެންމެ ފުޅާމިނެއްގައި ގެންދިއުމުގެ އެއްވެސް ހުރަހެއް ކުރިމަތި ނުކޮށް، އަދި ސަރުކާރުން އަޅުގަނޑު ދޭން ބޭނުންވާ މިންވަރަށް، އަޅުގަނޑު ބޭނުން ވަރަށް ގިނަ ކަންކަން ކޮށްދޭން. ފުރިހަމަ މިންވަރެއްގައި އެެހީތެރިކަން ދީގެން ކުރިއަރާ ދާ ބަޔަަކަށް މީޑިއާ ހަދަން" މުއިއްޒު ވިދާޅުވި އެވެ.
އެ މަނިކުފާނު ވިދާޅުވީ ނޫސްވެރި ކަމަށް ވަންނަން ބޭނުންވާ ދަރިވަރުންނަށް އެ ދާއިރާއާ ގުޅޭ ތައުލީމާއި ތަޖުރިބާ ހޯދުމުގައި ސަރުކާރުން އެހީތެރިވާނެ ކަމަށެވެ.
މީޑިއާތަކާއެކު ގާތް ގުޅުމެއް ބާއްވަން ބޭނުންކަން ހާމަކުރައްވައި މުއިއްޒު ވަނީ ވެރިކަމުގެ ހުވާ ކުރެއްވުމާއި ދޭތެރޭ މި އޮތް މުއްދަތުގައި މީޑިއާތަކަށް ވަކިވަކިން ޒިޔާރަތްކުރައްވާނެ ކަމަށް ވިދާޅުވެފަ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި މީޑިއާގެ މިނިވަންކަމަށް ހުރަސް އެޅުމަށް، އަބުރުގެ ގާނޫނު ފާސްކޮށް ބޮޑެތި ޖޫރިމަނާތައް ކުރި އެވެ. ނޫސްވެރިން ހައްޔަރުކޮށް ދައުވާ އުފުލި އެވެ.
