އެމަނިކުފާނަކީ ވެސް ދެން އުފެދޭ ސަރުކާރުގެ ބައިވެރިއެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ ހަވާސާގެ ތެރެއިން ވާހަކަ ދައްކަވަމުން ނަޝީދު ވިދާޅުވީ، އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރާ ގުޅޭ ގޮތުން ނުބައި މޭރުމެއްގައި ވާހަކަ ދައްކައި، މިހާރު ކެބިނެޓުގެ ބައެއް ވަޒީރުން ބޭރުގެ އިއްޒަތްތެރިންނަށް މެސެޖު ފޮނުވަމުންދާ ކަމަށެވެ.
އެ މެސެޖުތައް ނަޝީދަށް ވެސް ލިބިވަޑައިގަންނަވާ ކަމަށާއި ނަމަވެސް އެމަނިކުފާނަކީ ވެސް ދެން އުފެދޭ ސަރުކާރެއްގެ ބައިވެރިވާ ބޭފުޅަކަށްވާތީ، އެކަންކަން ސާފުނުކޮށްދެވޭ ކަމަށް ނަޝީދު ވިދާޅުވި އެވެ.
"ބައެއް ވަޒީރު ބޭފުޅުން އެބަ ދުނިޔޭގެ އެކިއެކި އިއްޒަތްތެރިންނަށް ޓެކްސްޓް ކުރައްވާ އެބަ ދިވެހިރާއްޖޭގައި އުފެދެން މި އުޅޭ ސަރުކާރާ ގުޅޭ ގޮތުން ބަދު ބަސް ބުނަމުން. ދެން މި ދެންނެވި އިއްޒަތްތެރިން އެ ޓެކްސްޓުތައް އަޅުގަނޑަށް އެބަ ފޮނުވާ. އަޅުގަނޑު އެބަ ދަންނަވަން، އެ ވިދާޅުވާ ސަރުކާރުގައި އަޅުގަނޑު ވެސް ބައިވެރިވެޔޭ. ދެން އެހެންވީމާ އަޅުގަނޑަށް ވަރަށް އުނދަގުލޭ ސާފުކޮށްދޭން ވަރަށް ގޯސްކަމެއް ރާއްޖޭގައި ވާން އުޅޭ ކަމަށް،" ނަޝީދު ވިދާޅުވި އެވެ.
ނަޝީދަކީ އިންތިހާބީ ރައީސް އުފައްދާ ސަރުކާރުގެ ބައިވެރިއެއް ކަމަށް އެމަނިކުފާނު ވިދާޅުވެފައި މި ވަނީ އާ ސަރުކާރުގައި ދަ ޑިމޮކްރެޓްސް ބައިވެރިވާނެ ކަމަށް އެ ޕާޓީގެ އިންޓެރިމް ޗެއާޕާސަން ހަސަން ލަތީފު ވިދާޅުވެފައި އޮއްވަ އެވެ. ނަޝީދަކީ އެ ޕާޓީ އުފެއްދުމުގެ ބާނީއެކެވެ.
އޭގެެ އިތުރުން މިއަދުގެ ޖަލްސާގައި ނަޝީދު ވިދާޅުވީ، ދެން އުފެދޭ ސަރުކާރާ ގުޅޭ ގޮތުން ބޭރުގެ އިއްޒަތްތެރިންނަށް ޓެކްސްޓު ނުކުރެއްވުމަށް އެމަނިކުފާނު ވަޒީރުންނަށް އިލްތިމާސް ކުރައްވާ ކަމަށެވެ.
"އަޅުގަނޑު އިލްތިމާސް ކުރަން ހުރިހާ ވަޒީރު ބޭފުޅުންނަށް ވެސް އަދި އެހެން އިއްޒަތްތެރިންނަށް ވެސް ދުނިޔޭގެ އެކިއެކި ތަންތަނަށް ޓެކްސްޓް ފޮނުވައި ނުހެއްދެވުމަށް،" ނަޝީދު ވިދާޅުވި އެވެ.
ޑރ. މުއިއްޒުގެ ސަރުކާރެއްގައި ޑިމޮކްރެޓްސް ބައިވެރިވާނެ ކަމަށް ބުނި ނަމަވެސް އޭގެ އިތުރު ތަފުސީލެއް އެ ޕާޓީން ނުދެ އެވެ. އަދި އެކަމާ ގުޅޭ ގޮތުން ޑރ. މުއިއްޒުގެ ޕީޕަލްސް ނެޝަނަލް ކޮންގްރެސް އިން ވެސް އެއްޗެއް ނުބުނެ އެވެ.
