މެންޗެސްޓާ (އޮކްޓޫބަރު 4) - މި ސީޒަނުގެ ކުރީކޮޅުގައި މެންޗެސްޓާ ޔުނައިޓެޑަށް މެޗުތަކުގައި ނަތީޖާ ނުނެރެވި، ގިނަ މެޗުތަކަކުން ބަލިވަމުންދާ މި ދަނޑިވަޅަކީ ޓީމާ ގުޅޭ އެންމެން ބައިބައިނުވެ، އެއްބައިވަންތަކަމާ އެކު ތިބެންޖެހޭ ވަގުތެއް ކަމަށް ޔުނައިޓެޑްގެ ކޯޗު އެރިކް ޓެން ހާގް ބުނެފި އެވެ.
ޗެމްޕިއަންސް ލީގުގައި ރޭ ޔުނައިޓެޑް ވަނީ އަމިއްލަ ދަނޑުގައި 3-2 އިން ތުރުކީގެ ސުޕަ ލީގު ޓީމު، ގަލަސަތަރާއި އަތުން ބަލިވެފަ އެވެ. ޔުނައިޓެޑް ވަނީ މި ފަހަރުގެ ޗެމްޕިއަންސް ލީގުގައި މިހާތަނަށް ކުޅުނު ދެ މެޗުން ވެސް ބަލިވެފަ އެވެ. މިއީ އެ ކްލަބް ތާރީހުގައި ވެސް މި ގޮތަށް ދެ މެޗުން ބަލިވެގެން ޗެމްޕިއަންސް ލީގުގެ މުބާރާތެއް ފަށަން ޖެހުނު ފުރަތަމަ ފަހަރެވެ.
އަނެއްކޮޅުން ބަލާއިރު، ޔުނައިޓެޑް ވަނީ މި ފަހަރުގެ އިނގިރޭސި ޕްރިމިއާ ލީގުގެ ފުރަތަމަ ހަތް މެޗުގެ ތެރެއިން ހަތަރު މެޗުން ބަލިވެފަ އެވެ. މިއީ، އިނގިރޭސި ޕްރިމިއާ ލީގުގެ ސީޒަނެއްގައި މިހާތަނަށް ޔުނައިޓެޑްގެ އެންމެ ދަށް ފެށުމެވެ.
މިދިޔަ ސީޒަނުގައި ޔުނައިޓެޑާ ހަވާލުވެ، ޓެން ހާގް ވަނީ އެ ޓީމަށް އިނގިރޭސި ލީގު ކަޕް ކާމިޔާބުކޮށްދީފަ އެވެ. މިއީ ހަ އަހަރެއްހާ ދުވަސްތެރޭ އެ ޓީމުން ހޯދި ފުރަތަމަ ތަށްޓެވެ. އެކަމަކު، މި ސީޒަނުގައި ޓެން ހާގަށް ނަތީޖާ ނުނެރެވޭތީ މި ވަނީ ޕްރެޝަރު ބޮޑުވެފަ އެވެ.
"މިދިޔަ ސީޒަން ދިޔައީ އަހަރެމެން ހީކުރި ވަރަށް ވުރެން ވެސް ރަނގަޅަށް، އެކަމަކު، މި ޕްރޮޖެކްޓް ފަށައިގެން އައިއިރު އަހަރެމެންނަށް ވިސްނިފައި އޮތް ކަމެއް، ގެޕްތަކެއް އަންނާނެކަން. ދެން، މި ވަގުތަށް ބަލާއިރު އަހަރެމެން އެންމެނަށް އެބަ ފެނޭ، މި އޮތީ ވަރަށް އުނދަގޫ ހާލަތެއްގައިކަން،" ކުރިން އަޔަކްސް އަށް ކޯޗުކޮށްދިން ޓެން ހާގް ބުންޏެވެ.
"މި ވަގުތު މި އޮތް ހާލަތުން އަރައިގަންނަން ބޭނުންވަނީ އެއްބައިވަންތަކަން، އަހަރެމެން އެއްކޮށް ތިބެންވީ، ބައިބައިވުމަކީ ރަނގަޅުގޮތެއް ނޫން،"
ޔުނައިޓެޑްގެ މި ދަށް ފޯމުގެ ޒިންމާ އެންމެ ބޮޑަށް އަމާޒުވާ އެއް ކުޅުންތެރިއަކީ، އެ ޓީމަށް މި ފަަހަރު ސޮއިކުރި ކެމަރޫންގެ ގޯލްކީޕަރު އަންދްރޭ އޮނާނާ އެވެ. ރޭގެ މެޗުގައި ވެސް ގަލަސަތަރާއި ކޮޅަށް މެޗު އެނބުރުމުގައި އޮނާނާގެ ސަބަބުން އައި ގޯހެއް ބޮޑު ދައުރެއް އަދާކުރި އެވެ.
އެކަމަކު، މެޗަށް ފަހު ޓެން ހާގް ވަނީ އޮނާނާގެ ދިފާއުގައި ވާހަކަ ދައްކައިފަ އެވެ.
"އަންދްރޭ (އޮނާނާ) ޗެމްޕިއަންސް ލީގުގެ ސެމީ ފައިނަލެއްގައި ކުޅެފައިވޭ. މިދިޔަ ސީޒަނުގައި އޭނާ ފައިނަލުގައި ވެސް ކުޅުނު. އެހެންވީމަ އެބަ އެނގޭ އޭނަ ކިބައިގައި ދުނިޔޭގެ އެންމެ މޮޅު ގޯލްކީޕަރުން ތެރޭގައި ހިމެނުމުގެ ފެންވަރު ހުރިކަން،" ޓެން ހާގް ބުންޏެވެ.
އޮނާނާ، އިންޓަ މިލާން ދޫކޮށް 60 މިލިއަން ޑޮލަރުގެ ޑީލެއްގައި ޔުނައިޓެޑަށް ބަދަލުވުމަށް ފަހު، މި ސީޒަނުގައި ދައްކަމުން އަންނަ ކުޅުމަށް ގިނަ ބަޔެއްގެ ފާޑުކިޔުން އަންނަނީ އަމާޒުވަމުންނެވެ. އޭގެ ތެރޭގައި ސަޕޯޓަރުންނާއި ޔުނައިޓެޑްގެ ކުރީގެ ކުޅުންތެރިން ހިމެނެ އެވެ.
