ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އިންތިހާބީ ރައީސް ޑރ. މުހައްމަދު މުއިއްޒު މަޖިލީހުގެ އިދާރާގައި މިއަދު ބައްދަލު ކުރައްވާނެކަން އިއުލާނުކޮށްފި އެވެ.
އެ ދެ ބޭފުޅުންގެ ބައްދަލުވުމެއް މިއަދަށް ހަމަޖެހިފައިވާކަން އިއުލާނު ކުރެއްވީ ރައްޔިތުންގެ މަޖިލީހުގެ މިއަދުގެ ޖަލްސާ ނަޝީދެވެ. އެމަނިކުފާނު ވިދާޅުވީ ބައްދަލުވުން ހަމަޖެހިފައި ވަނީ މިއަދުގެ 11:00 ޖަހާއިރަށް ކަމަށެވެ.
"މިއަދު 11:00 ޖަހާއިރުގައި ޕްރެޒިޑެންޓް އިލެކްޓް ޑރ. މުއިއްޒު އެބަ ވަޑައިގަންނަވާ މަޖިލީހަށް. އަޅުގަނޑު ގަސްތު ކުރަނީ އެހެންވީމާ އަޅުގަނޑުމެން ސައިގެ ފަހުން ބައްދަލުވާއިރުގައި 11:20 ގައި ނުވަތަ 11:30 ގައި އަޅުގަނޑުމެން ޖަލްސާ ފަށަން،" މިއަދުގެ ޖަލްސާ ސައިގެ ވަގުތަށް މެދުކަނޑާލުމުގެ ކުރިން ނަޝީދު އިއުލާނު ކުރެއްވި އެވެ.
ޑރ. މުއިއްޒު މިއަދު މަޖިލީހުގެ ރައީސް ނަޝީދާ ބައްދަލު ކުރައްވާއިރު ސަރުކާރު ބަދަލުވުމުގެ މަރުހަލާ ކުރިއަށް ގެންދިޔުމަށް ކޮމެޓީތައް އެކުލަވާލައި، އެ މަސައްކަތް މިހާރު ކުރިއަށް އެބަ ގެންދެ އެވެ. ޑރ. މުއިއްޒު އެކުލަވާލެއްވި އިންތިގާލީ ކޮމެޓީގެ ވެރިޔަކަށް ހަމަޖެއްސީ ޕީއެންސީގެ ރައީސް އަބްދުއްރަހީމް އަބްދުﷲ އެވެ.
ވެރިކަން ބަދަލުކުރުމުގެ މަރުހަލާއަށް ސަރުކާރުގެ ފަރާތުން އެކުލަވާލި ކޮމެޓީގެ ވެރިޔަކަށް ހަމަޖެއްސީ ރައީސުލްޖުމްހޫރިއްޔާގެ އޮފީހުގެ ސެކްރެޓެރީ، ކޯޕަރޭޓް ސާވިސް ހުސައިން އާމިރެވެ. އަދި ވެރިކަން ބަދަލު ކުރުމުގެ މަރުހަލާގެ ކަންކަން ރައީސް އޮފީހުގެ ފަރާތުން ވިލަރެސް ކުރައްވާނީ ޗީފް އޮފް ސްޓާފް އަލީ ޒާހިރު ކަމަށް ސަރުކާރުން ވަނީ އިއުލާނުކޮށްފަ އެވެ.
