އަންނަ އަހަރަށް ލަފާކުރާ ބަޖެޓު ކަނޑައެޅުމުގައި، އަލަށް އިންތިހާބުވި ރައީސް ޑރ. މުހައްމަދު މުއިއްޒު އާއެކު މަސައްކަތް ކުރާނެ ކަމަށް ފިނޭންސް މިނިސްޓްރީން ބުނެފި އެވެ.
"އަދަދު" ނޫހާ ވާހަކަ ދައްކަމުން ފިނޭންސް މިނިސްޓްރީގެ ޗީފް ފައިނޭޝަލް ބަޖެޓް އެގްޒެކެޓިވް އަހްމަދު ޝަރުވަޝް މިއަދު ވިދާޅުވީ އަންނަ އަހަރަށް ލަފާކުރާ ބަޖެޓު ތައްޔާރުކުރުމުގެ މަސައްކަތް ވަރަށް ރަނގަޅަށް ކުރިއަށްދާ ކަމަށެވެ. އަދި މިހާތަނަށް ބޭސްލައިން ބަޖެޓްތައް އިވެލުއޭޓްކޮށް ގާތްގަނޑަކަށް ނިމިފައިވާ ކަމަށް ވިދާޅުވި އެެވެ.
މިއީ މި ރިޔާސީ ދައުރުގެ ފަހު އަހަރަށްވާއިރު މި އަހަރު މަޖިލީހަށް ހުށަހަޅާ ބަޖެޓު ވެގެންދާނީ ދެން އަންނަ ސަރުކާރުގެ ފުރަތަމަ އަހަރަށް ފާސްކުރާ ބަޖެޓަށެވެ.
ޝަރުވަޝް ވިދާޅުވި ގޮތުގައި ބަޖެޓާ ބެހޭ ގޮތުން އެއްވެސް ފަރާތަކާ މަޝްވަރާ ކުރުމުގެ ފުރުސަތެއް އަދި މިނިސްޓްރީއަކަށް ނުލިބެ އެވެ.
އެހެން ނަމަވެސް އަންނަ އަހަރުގެ ބަޖެޓު އެކުލަވާލުމަށް އިންތިހާބުވެވަޑައިގެންނެވި ރައީސް ޑރ. މުހައްމަދު މުއިއްޒު އާއި ވެރިކަން ބަދަލުވުމުގެ މަރުހަލާގެ ކަންކަން ފުރިހަމަކުރުމަށް ރައީސް އިބްރާހިމް މުހައްމަދު ސޯލިހު އުފައްދާފައިވާ ޓްރާންސިޝަން ކޮމިޓީ އާއެކުވެސް މަސައްކަތް ކުރާނެ ކަމަށް އޭނާ ވިދާޅުވި އެވެ.
"ބަޖެޓް އެކުލަވާލުމާއި ސިޔާސަތުތައް ފައިނަލް ކުރުމުގައި އިންތިހާބީ ރައީސާއި ޑިރެކްޓާ ޖެނެރަލް އޮފް ޓްރާންސިޝަންގެ ޓީމާއެކު މަސައްކަތް ކުރާނަން. ބަޖެޓާ ބެހޭ ގޮތުން އެއްވެސް މީހަކާ މަޝްވަރާ ކުރުމުގެ ފުރުސަތެއް އަދި ނުލިބޭ. އެކަމަކު ޓްރާންސިޝަން ޓީމުތައް އަޅުގަނޑުމެންނާ ބައްދަލުކުރާ ވަރަކަށް އަޅުގަނޑުމެން ކުރިއަށް ދާނަން،" ޝަރުވަޝް ވިދާޅުވި އެެވެ.
ދައުލަތުގެ މާލިއްޔަތުގެ ގާނޫނުގައިވާ ގޮތުން ކޮންމެ މާލީ އަހަރަކަށް އެކުލަވާލެވޭ އެ އަަހަރުގެ ދައުލަތުގެ ބަޖެޓު، ފިނޭންސް މިނިސްޓަރު ތައްޔާރުކޮށް، ބަޖެޓު އެކުލަވާލެވޭ މާލީ އަހަރު ފެށުމުގެ އެންމެ ލަސްވެގެން އެއް މަސް ދުވަސް ކުރިން ރައްޔިތުންގެ މަޖިލީހަށް ހުށަހަޅަންޖެހޭނެ އެެވެ.
މިގޮތުން އެންމެ ލަސްވެގެން 31 އޮކްޓޯބަރުގެ ނިޔަލަށް ރައްޔިތުންގެ މަޖިލީހަށް ދައުލަތުގެ ބަޖެޓު ގާނޫނީ ގޮތުން ހުށަހަޅަންޖެހޭނެ އެވެ.
