ހަލުވިކަމާ އެކު ފެތުރޭ ލޮލު ރޯގާ ކޮންޓްރޯލް ކުރުމަށް ޕާކިސްތާނުގެ 56،000 ސްކޫލް ބަންދުކޮށްފި އެވެ.
އެ ބަލި ފެތުރެމުން ދަނީ އެންމެ އާބާދީ ބޮޑު ޕަންޖާބް ސްޓޭޓުގަ އެވެ. ސްކޫލްތައް ބަންދުކުރުމުން އެތައް މިލިއަން ދަރިވަރުން ތިބެން ޖެހޭނީ ގޭގަ އެވެ.
މި އަހަރުގެ ތެރޭގައި ޕަންޖާބް ސްޓޭޓުން ލޮލު ރޯގާގެ 357،000 ކޭސް ރިޕޯޓުކޮށްފައިވެ އެވެ.
ވައިރަހެއްގެ ސަބަބުން ކުރިމަތިވާ އެ އިންފެކްޝަންގައި ލޯ ރަތްވެ، ހިރުވައި، ތަދުވެ އެވެ. ބަލި ފެތުރެނީ އަތުންނާއި، ކެއްސާ ކިނބިހި އަޅާ ވަގުތުގަ އެވެ.
ޕަންޖާބް އެޑިއުކޭޝަން ޑިޕާޓްމަންޓުން ބުނީ ސްކޫލްތައް ބަންދުކުރީ ދަރިވަރުން ރައްކާތެރި ކުރުމަށް އަޅާ ފިޔަވަޅެއްގެ ގޮތުން ކަމަށެވެ.
ޕަންޖާބްގެ އާބާދީއަކީ 127 މިލިއަން މީހުންނެވެ. އެ ތަނުގައި ސަރުކާރުން ހިންގާ 56،000 ސްކޫލް ހުންނަ އިރު، އަމިއްލަ ފަރާތްތަކުން ހިންގާ އެތައް ހާސް ސްކޫލް ވެސް ބަންދުކުރާނެ އެވެ.
