ކެނެޑާގައި އުޅުނު ސީކް ދީނުގެ މީހަކު މަރާލުމުގައި އިންޑިއާ ސަރުކާރުގެ ބައިވެރިވުމެއް އޮވެދާނެ ކަމަށް ކެނެޑާއިން ކުރި ތުހުމަތާ ގުޅޭ ހެކި ދައްކައިފި ނަމަ އެކަން ބަލާނެ ކަމަށް އިންޑިއާއިން ބުނެފި އެވެ.
ކެނެޑާގެ ރައްޔިތެއް ކަމުގައިވާ ހަރްދީޕް ސިންގް ނިއްޖާރް މަރާލީ ޖޫން 18 ވަނަ ދުވަހު ވެންކޫވާގައި ސީކް ދީނުގެ ސަގާފީ ސެންޓަރެއްގެ ކުރިމަތީގަ އެވެ.
ކެނެޑާއިން ބުނީ އިންޑިއާ ސަރުކާރާ ގުޅުން ހުރި އޭޖެންޓުންނާ އޭނާގެ މަރާ ގުޅުން އޮތް ކަމަށް ބެލެވޭ "ސައްހަ ތުހުމަތުތަކެއް" ކުރެވޭ ކަމަށެވެ.
އިންޑިއާ ސަރުކާރުން ބުނީ ކެނެޑާއިން ކުރާ ތުހުމަތުތައް "އެއްގޮތަކަށް ވެސް ބަލައިނުގަންނަ" ކަމަށް ބޮޑު ވަޒީރު ނަރެންދްރަ މޯދީ ވިދާޅުވެފައިވާ ކަމަށެވެ.
އެ މައްސަލަ ބޮޑުވެ، ދެ ގައުމުގެ ޑިޕްލޮމެޓުން ފޮނުވާލައި، ބޮޑު ކޯޅުމެއް ވަނީ އުފެދިފަ އެވެ.
ކެނެޑާއިން ހެކި ހުށަހަޅައިފި ނަމަ މައްސަލަ ބަލާނެތޯ ނޫސްވެރިން ސުވާލުކުރީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިޔަމް ޖޭޝަންކަރް ނިއު ޔޯކަށް ވަޑައިގެން އުޅުއްވަނިކޮށެވެ.
އދ. ގެ އާއްމު މަޖިލީހަށް ނިއު ޔޯކަށް ވަޑައިގެން ކައުންސިލް އޮން ފޮރިން ރިލޭޝަންސްގައި ޖޭޝަންކަރު ވިދާޅުވީ ކޮންމެ ގައުމަކުން ހެކި ދެއްކި ނަމަވެސް އިންޑިއާއިން ބަލާނެ ކަމަށެވެ.
އޭނާ ވިދާޅުވީ ކެނެޑާގައި ސީކް މީހުން ރާވައިގެން ހިންގާ ކުށްތަކުގެ ތަފުސީލް ކެނެޑާ ސަރުކާރަށް ތަަކުރާރުކޮށް ފޯރުކޮށްދިން ނަމަވެސް "ސިޔާސީ ސަބަބުތަކާ ހެދި" އެ މީހުންނާ މެދު ފިޔަވަޅެއް ނާޅާ ކަމަށެވެ.
ކެނެޑާގައި 770،000 ސީކް މީހުން އުޅޭ ކަމަށް ބެލެވޭ އިރު އެއީ ކެނެޑާގެ އާބާދީގެ ދެ ޕަސެންޓެވެ. އޭގެ ތެރެއިން ބައެއް މީހުންނަކީ އިންޑިއާގެ އުތުރުގައި ހަލިސްތާންގެ ނަަމުގައި ސީކް މީހުންގެ ވަކި ދައުލަތެއް ގާއިމްކުރަން ވަކާލާތު ކުރާ މީހުންނެވެ.
