ލަންޑަން (ސެޕްޓެމްބަރު 25) - އިނގިރޭސި ޕްރިމިއާ ލީގަށް މި ފަހަރު އެންމެ ބޮޑު ހަރަދެއްކޮށްގެން ތައްޔާރުވި އެ ޓީމު ކަމަށްވާ އާސެނަލަށް ސީޒަންގެ ކުރީކޮޅު އަނިޔާގެ މައްސަލަ ބޮޑުވެއްޖެ އެވެ.
ޕްރިމިއާ ލީގުގައި މިހާތަނަށް ކޮންމެ ޓީމަކުން ހަ މެޗު ކުޅެފައިވާއިރު އާސެނަލްގެ ފުރަތަމަ އެގާރައިގެ މުހިންމު ކުޅުންތެރިންތަކަކަށް ވަނީ އަނިޔާގެ މައްސަލަތަކާ ކުރިމަތިލާން ޖެހިފަ އެވެ.
އެ ގޮތުން ލީގުގެ ފުރަތަމަ މެޗުގައި ޔޫރިއަން ޓިމްބާ އަށް އަނިޔާވެ ގިނަ ދުވަސްތަކަކަށް ވަނީ ކުޅުމާ ދުރަށްދާން ޖެހިފަ އެވެ. އޭނާ ކަކުލުގެ ސާޖަރީއެއްވެސް ހަދާފައިވާއިރު އަނބުރާ ކުޅުމުގެ ތެރެއަށް އާދެވޭނެކަމަށް ބެލެވެނީ އަންނަ ފެބްރުއަރީ މަހުގަ އެވެ.
ޓިމްބާގެ އިތުރުން މުހިންމު ދެ މިޑްފިލްޑަރުން ކަމަށްވާ ތޯމަސް ޕާޓޭ އާއި ޑެކްލަން ރައިސް އަށް ވެސް އަނިޔާގެ މައްސަލަވަނީ ކުރިމަތިވެފަ އެވެ. ޕާޓޭ އަށް އަނިޔާވީ މީގެ ދެ ހަފްތާކުރިން ޓީމްގެ ފަރިތަކުރުންތަކުގެ ތެރެއިންނެވެ. އޭނާއަށް އަންނަ މަހު ކުޅުމުގެ ތެރެއަށް އާދެވޭނެކަމަށް ބެލެވެ އެވެ.
ރައިސް އަށް އަނިޔާވީ ލީގުގައި ރޭ ޓޮޓެންހަމް ހޮޓްސްޕާއާ ވާދަކުރި މެޗުގަ އެވެ. މެޗުގެ ފުރަތަމަ ހާފުގައި ރައިސްގެ ބުރަކައްޓަށް ލިބުނު އަނިޔާގެ ސަބަބުން ދެ ވަނަ ހާފަށް އޭނާ ވަނީ ބަދަލުކޮށްފަ އެވެ. ރައިސް އަށް ލިބުނު އަނިޔާގެ ތަފްސީލްތައް އެނގޭނީ މިއަދު ހެދުމަށް ހަމަޖެހިފައިވާ ސްކޭންތަކަށްފަހުގަ އެވެ.
އާސެނަލްގައި މިދިޔަ ސީޒަންގައިވެސް ރަނގަޅު ކުޅުމެއް ދެއްކި ގެބްރިއެލް މާޓިނެލީ އާއި ބެންޗުން އަރައި ގިނަ މެޗުތަކުގައި ތަފާތު ދައްކަމުން އަންނަ ލެއަންދްރޯ ޓްރޮސާޑު ވެސް ހުރި އަނިޔާގަ އެވެ. މި ދެ ކުޅުންތެރިންގެ ތެރެއިން ގެބްރިއެލް އަށް އަނިޔާވީ މިދިޔަ ހާފްތާގައި އެވަޓަން އަތުން މޮޅުވި މެޗުގަ އެވެ. އޭނާގެ ފަލަމަސްގަނޑަށް ލިބުނު އަނިޔާގެ ސަބަބުން އެ މެޗުގެ 24 ވަނަ މިނެޓުގައި ވަނީ ބަދަލުކޮށްފަ އެވެ.
ޓްރޮސާޑަށް އަނިޔާވީ އެންމެ ފަހުން ޗެމްޕިއަންސް ލީގުގައި 4-0 އިން އާސެނަލުން ޕީއެސްވީ ބަލިކުރި މެޗުގަ އެވެ. މި މެޗުގައި ގޯލެއް ވެސް ޖެހި ޓްރޮސާޑުގެ އަނިޔާގެ ތަފްސީލެއް އަދި ކުލަބުން ހާމައެއް ނުކުރެ އެވެ.
މިދިޔަ ސީޒަންގައިވެސް ޕްރިމިއާ ލީގުގައި ރަނގަޅު ކުޅުމެއް ދެއްކި އާސެނަލަށް ސީޒަންގެ ފަހުކޮޅު އަނިޔާގެ މައްސަލަ ބޮޑުވި އެވެ. ލީގުގެ އެއް ވަނައިގައި އޮވެ ފަހު 10 މެޗުތަކާ ކުރިމަތިލި ނަމަވެސް އަނިޔާގެ ސަބަބުން މުހިންމު ކުޅުންތެރިންތަކަކަށް ނުކުޅެވި ފަހު ވަގުތު އެ ޓީމު ޖެހުނީ ލީގުގެ ދެ ވަނައިގައި އޮވެ ސީޒަން ނިންމާލާށެވެ.
މި އަހަރުގެ އާ ސީޒަނަށް ޓީމް ތައްޔާރުކުރިއިރު ކޯޗު މިކޭލް އާޓެޓާ ވަނީ އަނިޔާގެ ސަބަބުން ކުޅުންތެރިއަކަށް ނުކުޅެވޭ ހާލަތެއް މެދުވެރިވެދާނެ ކަމަށް ބަލައި ޓީމްގެ ކޮންމެ މަގާމަކަށް ވެސް ފެންވަރު ރަނގަޅު ކުޅުންތެރިން ގެނައުމުގެ މަސައްކަތްކޮށްފަ އެވެ.
އެ ގޮތުން އާ ސީޒަނަށް އެޓީމުން ހަތަރު ކުޅުންތެރިއަކު ސޮއިކުރި އެވެ. އެއީ ކީޕަރު ޑޭވިޑް ރާޔާ، ޑިފެންޑަރު ޓިމްބާ އަދި ދެ މިޑްފިލްޑަރުން ކަމަށްވާ ރައިސް އާއި ކައި ހަވާޓްސް އެވެ.
އާސެނަލަށް ކުރިއަށް އޮތް މެޗަކީ އިނގިރޭސި ލީގު ކަޕްގައި ބްރެންޓްފޯޑާ ވާދަކުރާ މެޗެވެ.
