ގޭބިސީތަކުން ބޭނުންކުރާ ކަރަންޓަށް އެކި ބޭންޑްތަކަކުން އަގުކުރުމުގެ ބަދަލުގައި ފްލެޓް ރޭޓަކުން އަގު ނަގަން ސަރުކާރުން ނިންމައިފި އެވެ.
ރިޔާސީ އިންތިހާބަށް ކެމްޕޭންކުރަން އެމްޑީޕީން މިރޭ މާލޭގައި ބޭއްވި ހުވަދޫ ޖަގަހަ ޖަލްސާގައި ރައީސް ސޯލިހު ވިދާޅުވީ ލިބޭ އާމްދަނީން ކުއްޔާއި ކަރަންޓް ބިލު ދައްކާފައި ދެކޮޅު ނުޖެއްސޭކަމުގެ ޝަކުވާ އަންނަ ކަމަށެވެ.
އެމަނިކުފާނު ވިދާޅުވި ގޮތުގައި އެއީ މި ފަހަރުގެ ކެމްޕޭނުގައި ގޭގެއަށް ޒިޔާރަތްކުރެއްވި އިރު މީހުންގެ ފަރާތުން އައި ޝަކުވާތަކުގެ ތެރެެއިން އެއް ޝަކުވާ އެވެ.
"މިހާރު މިވާ ގޮތަކީ ކަރަންޓް ބިލުގެ ވަކި ރޭޓްތަކެއް މިހުންނަނީ. ވަކިވަރަކަށް ވުރެން ގިނައިން ބޭނުންކޮށްފިއްޔާ އަގު ބޮޑުވަމުން މިދަނީ. އަޅުގަނޑުމެން މިއަދު މިނިންމަނީ، މީހުން ދިރިއުޅޭ ކޮންމެ ގެއެއްގެ ކަރަންޓް ރޭޓް، ފްލެޓް ރޭޓަކުން ނަގާ ގޮތަށް. ކިތަންމެ ގިނައިން ކަރަންޓް ބޭނުންކުރިޔަސް އެ ބޮޑުވާ ނިސްބަތް ބޮޑުވެގެންނެއް ނުދާނެ،" ރައީސް ވިދާޅުވި އެވެ.
އެމަނިކުފާނު ވިދާޅުވީ މިއަދުން ފެށިގެން އެކަން އެގޮތަށް ބަދަލުކުރައްވާނެ ކަމަށެވެ.
މީހުންގެ އާމްދަނީ އާ ގުޅޭ އެހެން ގިނަ ވައުދުތަކެއް ވެސް އެމަނިކުފާނު މިރޭ ވެވަޑައިގެންނެވި އެވެ. ކޮވިޑް-19 ގެ ބަލިމަޑުކަމުގެ ދުވަސްވަރު އެސްޑީއެފްސީ މެދުވެރިކޮށް ދިން ލޯނުތަކުގެ އިންޓަރެސްޓް ކަނޑާލައި، އެ ލޯނުތައް ދައްކާ މުއްދަތު އިތުރުކޮށްދިނުން އޭގެ ތެރޭގައި ހިމެނެ އެވެ. އުމުރުން ދުވަސްވީ މީހުންނަށް ދައުލަތުންދޭ އިނާޔަތް 5،000.ރ އިން 7،000.ރ އަށް ބޮޑުކުރަން ވެސް ރައީސް މިރޭ ވަައުދުވެވަޑައިގެންނެވި އެވެ.
