ބޭންކް އޮފް މޯލްޑިވްސް (ބީއެމްއެލް)ގެ ސްކޮލާޝިޕް ފަންޑަށް އެދި ހުށަހެޅުމުގެ ފުރުސަތު މިއަދު ހުޅުވާލައިފި އެވެ.
ބީއެމްއެލްއިން ބުނީ މި ސްކޮލާޝިޕް ފަންޑުގެ މަގުސަދަކީ ބޭންކިން އަދި މާލީ ދާއިރާއިން ހުނަރުވެރި ދިވެހި ޒުވާނުން ބިނާ ކުރުން ކަމުގަ އެވެ.
މި ސްކޮލާޝިޕް ފަންޑުގެ ދަށުން ހޮވާލެވޭ ތިން ފަރާތަކަށް ހުރިހާ ހަރަދެއް ހިމެނޭހެން ރާއްޖޭން ބޭރުން މަތީ ތައުލީމު ހާސިލުކުރުމުގެ ފުރުސަތު ލިބޭނެ އެވެ.
ތައުލީމު ހާސިލުކުރުމަށް ފުރުސަތު ލިބޭ ދާއިރާތައް
- އެގޮތުން ބޭންކިން އެންޑް ފައިނޭންސްގެ ރޮނގުން އެކައުންޓިން
- ފައިނޭންޝަލް ޓެކްނޮލޮޖީ
- ފައިނޭންޝަލް އިންޖިނިއަރިން
- ރިސްކް މެނޭޖްމަންޓް ނުވަތަ ފައިނޭންޝަލް ރިޕޯޓިން އެންޑް އެނަލެޓިކްސް
ބީއެމްއެލްއިން ބުނީ މިފަދަ ދާއިރާއަކުން އަންޑާ ގްރެޖުއޭޓް ޕްރޮގްރާމެއް ފުރިހަމަ ކުރުމުގެ ފުރުސަތު ސްކޮލާޝިޕް ލިބޭ ތިން ފަރާތަށް ލިބިގެންދާނެ ކަމަށެވެ.
އުމުރުން 18 އަހާރާއި 25 އަހަރާ ދެމެދުގެ ދިވެހިން ރައްޔިތުންގެ ތެރެއިން އޭ ލެވެލް އިމްތިހާނުގެ ހުރިހާ މާއްދާއަކުން ފާސްވެފައިވާ ފަރާތްތަކަށް މި ފަންޑަށް އެދި ހުށަހޭނެ އެވެ.
ފަންޑުގެ ދަށުން ޓިއުޝަން ފީ، މަހުން މަހަށް ހިނގާނެ ހަރަދު، ވިސާ ފީ އާއި، ފޮތް ގަތުމުގެ ހަރަދާއި އެސްޓަބްލިޝްމެންޓް އެލަވަންސްގެ އިތުރުން ޓިކެޓް ހަރަދު ދިނުމަށް ހަމަޖެހިފައިވާކަމަށް ބީއެމްއެލްއިން ބުނެ އެވެ.
މި ފަންޑަށް އެދި ހުށަހަޅާ ފަރާތްތަކުން އެޕްލިކޭޝަން ފޯމާއި ބޭނުންވާ އިތުރު ލިޔުންތައް އަންނަ ނޮވެމްބަރު 4، ގެ 23:59 ގެ ކުރިން މި އީމެއިލް އަށް ހުށަހެޅޭނެ އެވެ.
މި ފަންޑުގެ ޝަރުތުތަކާއި ދަރިވަރުން ހޮވުމަށް ކަނޑައަޅާފައިވާ ކްރައިޓީރިއާ ބެހޭ މައުލޫމާތު މި ލިންކުން ލިބެން ހުންނާނެ އެވެ.
