ސެޕްޓެމްބަރު 30، ގައި އޮންނަ ރިޔާސީ އިންތިހާބުގެ ދެވަނަ ބުރުގައި ވޯޓު ލައްވަން، އިދިކޮޅު ޕީޕީއެމް/ޕީއެންސީގެ ލީޑަރު އަދި ކުރީގެ ރައީސް އަބްދުﷲ ޔާމީން މާފުށީ ޖަލުގައި ބަހައްޓާ ވޯޓު ފޮށްޓަށް ރީރަޖިސްޓްރީ ކުރައްވައިފި އެވެ.
ޔާމީންގެ އިސް ވަކީލު އަދި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު މިއަދު ކުރެއްވި ޓްވީޓެއްގައި ވިދާޅުވީ ފުރަތަމަ ބުރުގައި ޔާމީނަށް ވޯޓު ލެއްވުމުގެ ފުރުސަތު ލިބިވަޑައިނުގަތް ނަމަވެސް ދެވަނަ ބުރުގައި ވޯޓު ލެއްވުމުގެ އިންތިޒާމު ހަމަޖައްސަވާފައިވާ ކަމަށެވެ.
ރިޔާސީ އިންތިހާބުގެ ފުރަތަމަ ބުރުގައި ޔާމީނު ވޯޓު ލައްވަން އޮތީ އެމަނިކުފާނުގެ ދާއިމީ އެޑްރެސް މއ. ކާމިނީގެ ހުޅަނގު ބައި ނިސްބަތްވާ މައްޗަންގޯޅި އުތުރު ދާއިރާގެ ދެ ނަންބަރު ވޯޓު ފޮއްޓަށެވެ.
ދެވަނަ ބުރުގައި ވޯޓު ލެއްވުމަށް ޔާމީން ރީރަޖިސްޓްރީކުރެއްވިއިރު ފުރަތަމަ ބުރުގައި އެންމެ ގިނަ ވޯޓު ހޯއްދެވީ ވެސް އެމަނިކުފާނު ލީޑްކުރައްވާ ކޯލިޝަންގައި ހިމެނޭ ޕީއެންސީން ނެރުއްވި ކެންޑިޑޭޓު ޑރ. މުހައްމަދު މުއިއްޒެވެ.
ވަގުތީ ނަތީޖާ ދައްކާ ގޮތުން 101,635 ވޯޓު މުއިއްޒު ހޯއްދެވިއިރު އެއީ ވޯޓުލީ މީހުންގެ 46 ޕަސެންޓެވެ. ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86,161 ވޯޓެވެ. އެއީ ވޯޓުލީ މީހުންގެ 39 ޕަސެންޓެވެ.
ޔާމީން މި ވަގުތު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކުރުމުގައި އެމަނިކުފާނު ރިޝްވަތު ނަންގަވައި މަނީ ލޯންޑަ ކުރެއްވި ކަން ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހު އެވެ.
އެ ހުކުމުގެ އިސްތިއުނާފު ހައި ކޯޓުގައި އޮތް އިރު ޔާމީނަކީ އެންމެ ފުރަތަަމަ ޕީޕީއެމް/ޕީއެންސީގެ ރިޔާސީ ކެންޑިޑޭޓެވެ. ނަމަވެސް ރިޔާސީ އިންތިހާބަށް ކުރިމަތިލާން ހުޅުވާލުމާ ހަމައަށް ވެސް އެ ހުކުމް ދެމިއޮތުމުން އެމަނިކުފާނަށް އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ކަނޑައެޅި އެވެ.
ވާދަނުކުރެއްވޭނެ ކަން ޔާމީނަށް ޔަގީންވުމުން ފުރަތަމަ ލަފާ ދެއްވީ ޕީޕީއެމުން އިންތިހާބު ބޮއިކޮޓް ކުރުމަށެވެ. އޭރު ބެކްއަޕް ކެންޑިޑޭޓަކަށް ޕީއެންސީގެ ކެންޑިޑޭޓެއް ތައްޔާރުކޮށް، އަދި ވަގުތު ލިބިއްޖެނަމަ ޕީޕީއެމްގެ ކެންޑިޑޭޓެއް ނެރެވޭނެ ކަމަށް އެ ދެ ޕާޓީ ހިމެނޭ ކޯލިޝަންގެ ލީޑާޝިޕުން ދިޔައީ ބުނަމުންނެވެ.
މާފުށީ ޖަލުން އެމަނިކުފާނު ފޮނުވި ސިޓީއާ ގުޅިގެން، ޕީޕީއެމް ސެނެޓުގައި އެ ބަހުސް ބޮޑުވެ ހަމަނުޖެހުން ވެސް އުފެދުނެވެ. ފަހުން ސެނެޓުން ފާސްކުރީ، ޔާމީން މިނިވަން ކުރެވެން ވެސް އޮތީ ރިޔާސީ އިންތިހާބުގައި އެ ޕާޓީ އިސްވާ ކޯލިޝަނަކުން ވާދަކޮށް އިންތިހާބު ކާމިޔާބުކޮށްގެން ކަމަށެވެ.
ސެނެޓުގެ 67 މެންބަރަކު ބޮއިކޮޓް ކުރުމާ ދެކޮޅަށް ވޯޓު ދިންއިރު، ބޮއިކޮޓް ކުރަން ވޯޓު ދިނީ 45 މެންބަރެކެވެ. ސެނެޓުގެ ނިންމުން ބަދަލުކުރުމަށް ވެސް ޔާމީން އެދިވަޑައިގަތުމަށް ފަހު އެމަނިކުފާނު ދެން ނިންމެވީ ޕީއެންސީގެ ކެންޑިޑޭޓު މުއިއްޒަށް ތާއީދުކުރައްވައި އިންތިހާބު ކާމިޔާބު ކުރެއްވުމަށެވެ.
