ކުޅުދުއްފުށީ ރޯހައުސްތައް އިމާރާތްކުރުމުގެ މަސައްކަތްކުރާ ބިދޭސީންގެ އެކޮމަޑޭޝަން ބްލޮކުގައި އަލިފާނުގެ ހާދިސާއެއް ހިނގައިފި އެވެ.
މައުލޫމާ ލިބިފައިވާ ގޮތުގައި އަލިފާން ރޯވެފައި ވަނީ އެންމެ ފަހުން ސަރުކާރުން އިއުލާނުކުރި 400 ރޯހައުސް އިމާރާތްކުރާ ބިދޭސީންގެ އެކޮމަޑޭޝަން ބްލޮކުގަ އެވެ.
އަލިފާންގަނޑު ރޯވި ވަގުތަކީ އެތަނުގައި ގިނަ ބަޔަކު ނެތް ވަގުތެއް ނަމަވެސް ބަޔަކު ނިދާފައި ތިބި ކަމަށާއި، އަލިފާން ރޯވުމުން އެމީހުން އެތަނުން ނިކުމެފައިވާކަމަށް މަންޒަރު ދުއް މީހަކު "އަދަދު"އަށް ބުންޏެވެ.
"އަދި މިހާތަނަށް އެއްވެސް މީހަކަށް އަނިޔާއެއް ލިބިފައެއް ނުވޭ. އަލިފާން ރޯވެފައި ވަނީ ކީއްވެގެން ކަމެއް އަދި ސާފެއް ނުވޭ" އޭނާ ބުންޏެވެ.
ކުޅުދުއްފުށީ ކައުންސިލަރު މުހައްމަދު ދާއޫދު "އަދަދު"އަށް ބުނީ އަލިފާން ނިއްވުމުގެ މަސައްކަތް މިހާރު ކުރަމުން އަންނަ ކަމަށެވެ.
އެތަނުގައި ރޯވި އަލިފާންގަނޑު މިހާރު ކޮންޓްރޯލް ކުރެވިފައިވާކަމަށް ވެއެވެ. އަލިފާން ރޯވި ވަގުތު ކޮންޓްރޯލް ނުވެ އެކޮމަޑޭޝަން ބްލޮކުގެ ބަދިގެ ބަޔާއެއްކޮށް ވަނީ އަނދައިގެން ގޮސްފަ އެވެ.
އަލިފާން ރޯވި އެކޮމަޑޭޝަން ބްލޮކް ހުންނަ ސަރަހައްދަކީ އާންމު ގޭބިސީތައް ހުންނަ ސަރަހައްދެއް ނޫނެވެ.
