ދައުލަތުގެ ބަޖެޓުން ވަކި ޕަސެންޓެއް އަމިއްލަ މީޑިއާތަކަށް ކަނޑައަޅައި، އެ ފައިސާ ހަމަޖައްސައިދޭނެ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވައުދުވެވަޑައިގެންފި އެވެ.
އދ. މަހިބަދޫގައި ރޭ ބޭއްވި ކެމްޕެއިން ޖަލްސާގައި މުއިއްޒު ވިދާޅުވީ ސަރުކާރުގެ ކުންފުނިތަކުން ދޫކުރާ ސްޕޮންސާ ފީތަކަށް ނޫސްތައް ބަރޯސާވާން ޖެހުމުގެ ސަބަބުން ނޫސްތައް ހިންގާ ކުންފުނިތަކާއި މީޑިއާތައް އޮންނަނީ ވަރަށް ބޮޑު އަޅުވެތިކަމެއްގެ ތެރޭގައި ކަމަށެވެ.
ސަރުކާރު ޖަވާބުދާރީ ކުރުވުމަށް ނޫސްވެރިންނަށް އެންމެ މިނިވަން މާހައުލެއް ލިބޭނެ އެއް ގޮތަކީ ދައުލަތުގެ ބަޖެޓުން ވަކި ޕަސެންޓެއް ނޫސް ހިންގާ މީޑިއާތަކާއި ނޫސްވެރިކަމުގައި މަސައްކަތް ކުރާ އެކި ފަރާތްތަކަށް ހަމަޖެއްސުމެވެ. ގާނޫނީ ގޮތުން އެ ކަން ކަނޑައަޅައިގެން ކުރިއަށްދާނެ ކަމަށް މުއިއްޒު ވިދާޅުވި އެވެ.
"ދައުލަތުގެ ބަޖެޓުން ސިޔާސީ ޕާޓީތަކަށް ވަކި އިންސަތައެއް ދޭ ގޮތަށް މި އޮންނަނީ، ގާނޫނަށް ބަދަލު ގެނެސްގެން، ދައުލަތުގެ ބަޖެޓުން ވަކި އިންސަތައެއް، މީޑިއާތަކަށާއި ނޫސްވެރިކަމުގައި މަސައްކަތް ކުރާ އެކި ފަރާތްތަކަށް، ދޭ ގޮތަށް އިރާދަކުރެއްވިއްޔާ އަޅުގަނޑު ހުށަހަޅާނަން،" މުއިއްޒު ވިދާޅުވި އެވެ.
ކުރީގެ ރައީސް ޑރ. މުހައްމަދު ވަހީދުގެ ވެރިކަމުގެ ދެ އަހަރު ދުވަހާއި، ކުރީގެ ރައީސް އަބްދުﷲ ޔާމީންގެ ވެރިކަމުގެ ފަސް އަހަރު ހިމެނޭހެން ޖުމުލަ ހަތް އަހަރު ހައުސިން މިނިސްޓަރުކަން ކުރައްވާފައިވާ މުއިއްޒު ވިދާޅުވީ، ތައުލީމީ އެކިއެކި ރޮނގުތަކުން ނޫސްވެރިންނަށް ފުރުސަތުތައް ފަހިކޮށްދެއްވާނެ ކަމަށެވެ.
"އަޅުގަނޑު ގަބޫލުކުރާ ގޮތުގައި ޒަމާނީ ޑިމޮކްރަސީ މި ތަނުގައި ގާއިމްކޮށް، ހިތްހަމަޖެހުމާއި ޔަގީންކަން ރައްޔިތުންނަށް ހޯދައިދިނުމުގައި މީޑިއާއަށް ލިބެން އެބަ ޖެހޭ، މިނިވަންކަމުގެ އިތުރަށް، ތަރައްގީވުމުގެ ފަހި ފުރުސަތުތައް ވެސް،" މި ވަގުތު މާލޭގެ މޭޔަރުގެ މަގާމު ވެސް ފުރުއްވާ، މުއިއްޒު ވިދާޅުވި އެވެ.
މުއިއްޒު މިމޭރުމުން ވާހަކަދެއްކެވުމުގެ މާ ކުރިން، އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވަނީ އެމަނިކުފާނުގެ މެނިފެސްޓޯގައި މީޑިއާއަށް ދެން އަންނަ ދައުރެއްގައި ގެންގުޅުއްވާނެ ސިޔާސަތުތައް ލިޔުއްވައިފަ އެވެ. އޭގައި، ދައުލަތުގެ ބަޖެޓުން ވަކި ޕަސެންޓެއް މީޑިއާތަކަށް ދިނުމަށް ވެސް ހިމަނާފައިވެ އެވެ.
ދިވެހި ނޫސްވެރިންގެ ޖަމިއްޔާ، މޯލްޑިވްސް ޖާނަލިސްޓު އެސޯސިއޭޝަން (އެމްޖޭއޭ) އާއި ދިވެހި އެޑިޓަރުންގެ ޖަމިއްޔާ ކަމަށްވާ އެޑިޓާސް ގިލްޑް އިން މީގެ ކުރިން ވެސް ވަނީ އެފަދަ އުސޫލަކުން އަމިއްލަ މީޑިއާތަކަށް ދައުލަތުގެ މާލީ އެހީތެރިކަން ދޫކުރުމަށް ގޮވާލައިފަ އެވެ.
އެނގިފައިވާ ގޮތުގައި ރިޔާސީ އިންތިހާބުގައި ވާދަކުރާ މައި ދެ ޕާޓީގެ ކެންޑިޑޭޓުންނަށް ވެސް މި ޖަމިއްޔާތަކުން އެ ކަން ހުށަހަޅާފައިވެ އެވެ.
