މި މަހުގެ 30 ގައި ބާއްވާ ރިޔާސީ އިންތިހާބުގެ ދެވަނަ ބުރުގައި އެކުގައި މަސައްކަތް ކުރުމަށް އަމިއްލަ ގޮތުން ވާދަކުރި ކެންޑިޑޭޓު ފާރިސް މައުމޫނުގެ ޓީމާ އެކު ޕީޕީއެމް/ޕީއެންސީ ކޯލިޝަނުން މިއަދު މަޝްވަރާކޮށްފި އެވެ.
ޕީޕީއެމްގެ ތަރުޖަމާނު ހީނާ ވަލީދު މީޑިއާތަކަށް ހިއްސާކުރި ފޮޓޯތަކުން ފެންނަ ގޮތުން މިއަދުގެ ބައްދަލުވުމުގައި އިދިކޮޅު ކޯލިޝަނުގެ ފަރާތުން ބައިވެރިވެފައިވަނީ ޕީޕީއެމްގެ ޕީޖީ ލީޑަރު އަހްމަދު ސަލީމް (ރެޑްވޭވް ސަލީމް) އާއި އެ ޕާޓީގެ ނައިބު ރައީސް އަހްމަދު ޝިޔާމް (ނައިފަރު ޝިޔާމް) އާއި މާވަށު ދާއިރާގެ މެމްބަރު އަހްމަދު ސައީދާއި މަހިބަދޫ ދާއިރާގެ މެމްބަރު އަހްމަދު ތޯރިގު އެވެ.
ފާރިސްގެ ޓީމުގައި އޭނާގެ އިންތިހާބީ އެޖެންޓު އިސްމާއީލް ޒަބީހާއި މީގެ ކުރިން ސަރުކާރުގެ އެކި އިސް މަގާމުތައް ފުރުއްވާފައިވާ މިނިސްޓަރު އަނީސާ އަހުމަދުގެ އިތުރުން މިހާރު އުވާލުމަށް ނިންމާފައިވާ އެމްއާރުއެމް ޕާޓީގެ ލީޑަޝިޕުގެ އިސް މެންބަރުންވެސް ހިމެނެ އެވެ.
މިއަދު ބައްދަލުވުމުގެ އިތުރު ތަފުސީލެއް ޕީޕީއެމުން އަދި ފާރިސް މައުމޫންގެ ފަރާތުންވެސް ހިއްސާކޮށްފައެއް ނުވެ އެވެ.
ކޯލިޝަން ހެދުމުގެ މަޝްވަރާތައް ކުރިއަށްދާއިރު، ޕީޕީއެމުން އިއްޔެ ވަނީ މޯލްޑިވްސް ނޭޝަނަލް ޕާޓީއާއެކު ކޯލިޝަން އެއްބަސްވުމެއްގައި ސޮއިކޮށްފަ އެވެ. އިންތިހާބުގައި ތިންވަނަ އަށް ދިޔަ ޑިމޮކްރެޓްސްއިން އަދި ވަކި ގޮތެއް ނުނިންމަ އެވެ.
ދަ ޑިމޮކްރެޓްސްގެ އިންޓެރިމް ކައުންސިލުުން އިއްޔެ ބޭއްވި ބައްދަލުވުމުގައި ކޮމިޓީއެއް އެކުލަވައިލީ ރިޔާސީ އިންތިހާބުގެ ދެވަނަ ބުރަށް ވަޑައިގެންނެވި ދެ ކެންޑިޑޭޓުންގެ ތެރެއިން ކެންޑިޑޭޓަކަށް ތާއީދުކުރަން ނުވަތަ އެއްވެސް ކެންޑިޑޭޓަކަށް ތާއީދު ނުކުރަން ނިންމުމުގެ ކުރިން ސިޔާސީ ޕާޓީތަކާ މަޝްވަރާ ކުރުމަށެވެ. ޕާޓީތަކާ މަޝްވަރާކުރަން ޑިމޮކްރެޓުން ނެގީ އަށް މެމްބަރުންގެ ކޮމިޓީ އެކެވެ.
ފުރަތަމަ ބުރުގައި ފަސްވަނައަށް ދިޔަ ޖޭޕީގެ ލީޑަރު ގާސިމް އިބްރާހިމާއެކު ޕީޕީއެމްގެ ލީޑަޝިޕުން ރޭ ބައްދަލުކޮށްފައިވާއިރު މިއަދު ރައީސް އިބްރާހިމް މުހައްމަދު ސޯލިހު ގާސިމާ ބައްދަލުކުރައްވާނެ އެވެ. ކޯލިޝަނާމެދު ގޮތެއް ނިންމުމަށް މިއަދު އެ ޕާޓީން ބާއްވަން އުޅުނު ކައުންސިލް ބައްދަލުވުން މިހާރު ވަނީ ފަސްކޮށްފަ އެވެ.
