ބިދޭސީ އޮބްވާޒަރަކަށް ބައެއް ދިވެހި މޮނިޓަރުން ދިމާކޮށްލި މައްސަލާގައި އިލެކްޝަންސް ކޮމިޝަނުން އެ ކަން ކުށްވެރިކޮށްފި އެވެ.
ސޯޝަލް މީޑިއާގައި ދައުރުވަމުން ދިޔަ ވީޑިއޯއަކުން ފެންނަނީ އިންޑިއާގެ ދެ އޮބްޒާވަރަކު ވޯޓު ފޮއްޓަކާ މާ ކައިރީގައި ހުރި ކަމަށް ބުނެ ދިވެހި މޮނިޓަރުންތަކެއް ޝަކުވާކޮށް ހަޅޭއްލަވާ މަންޒަރެވެ.
އިލެކްޝަންސް ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ އެއީ އެއް ގޮތަކަށް ވެސް ބަލައިގަނެވޭނެ އަމަލެއް ނޫން ކަމަށެވެ.
"އަޅުގަނޑުމެން ފާސް ދީފައި ތިބި ބަޔަކު، ފާސްދީފައި އެހެން ބަޔަކަށް، އެ ގޮތަށް ފުރައްސާރަ ކުރުމުން، ޖެހޭނީ ފާސް އަތުލާން، ވަރަށް ހިތާމައާއެކު ދަންނަވަން،" ހަބީބު ވިދާޅުވި އެވެ.
ހަބީބު ވިދާޅުވި ގޮތުގައި، އޭރު ވޯޓުލާ މަރުކަޒުގައި ހަރަކާތްތެރިވަމުން ދިޔައީ އިންޑިއާގެ އިލެކްޝަންސް ކޮމިޝަނުގެ ދެ ކޮމިޝަނަރެކެވެ.
"އަޅުގަނޑުމެންގެ ދައުވަތަކަށް، އަޅުގަނޑުމެން އެކްރެޑިޓްކޮށްފައި، އަޅުގަނޑުމެން ފާސްދީގެން، އަޅުގަނޑުމެން ބައިތިއްބައިފަ، އަދި އަޅުގަނޑުމެންގެ އިންތިހާބު ބެލުމަށް އެ ބޭފުޅުން ވެސް ބޭނުން ވެގެން އައިސް ތިއްބެވި ބަޔަކު،" ހަބީބު ވިދާޅުވި އެވެ.
އިންޑިއާގެ އޮބްޒާވަރަކާ ބަޔަކު ދިމާކޮށްލި އިރު، ރާއްޖޭގައި ގާއިމުވެ ތިބި ކަމަށް ބުނާ އިންޑިއާ ސިފައިން ބޭރު ކުރުމަށާއި މި ސަރުކާރުން އިންޑިއާ އިސްކޮށް ގެންގުޅޭ ޚާރިޖީ ސިޔާސަތާ ދެކޮޅަށް އިދިކޮޅު ޕީޕީއެމް/ޕީއެންސީން "އިންޑިއާ އައުޓް" ހަރަކާތެއް ވެސް ހިންގި އެވެ.
އިންޑިއާގެ އޮބްޒާވަރާ ދިމާކޮށް، ވޯޓްލާ މަރުކަޒުން އޭނާ ނުކުންނަން ޖެހޭނެ ކަމަށް ބުނެ ހަޅޭއްލަވާ މަންޒަރު ފެންނަ ވީޑިއޯއެއް ސޯޝަލް މީޑިއާގައި އާއްމުކޮށްފައި ވެ އެވެ. ވީޑިއޯއިން ފެންނަ ގޮތުގައި އޮބްޒާވަރުންނަށް އިންޒާރުދިނުމުގައި އިސްކޮށް އުޅުނީ މޮނިޓަރުންގެ ފާސް އަޅައިގެން ތިބި ބައެކެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި އެއްވެސް ކެންޑިޑޭޓަކަށް 50 ޕަސެންޓަށް ވުރެ ގިނަ ވޯޓެއް ނުލިބެ އެވެ. އެންމެ ގިނަ ވޯޓު ލިބުނު ދެ ކެންޑިޑޭޓުންގެ މެދުގައި ދެވަނަ ބުރެއް މި މަހުގެ 30 ގައި ބާއްވާނެ އެވެ.
އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒެވެ. މުއިއްޒަށް 101،635 ވޯޓު ލިބިވަޑައިގަތް އިރު އެއީ ވޯޓުލީ މީހުންގެ 46 ޕަސެންޓެވެ.
މުއިއްޒުއާ ދެވަނަ ބުރުގައި ވާދަކުރައްވާ ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ 86،161 ވޯޓެވެ. އެއީ ވޯޓުލީ މީހުންގެ 39 ޕަސެންޓެވެ.
