ހޮނިހިރު ދުވަހު ބޭއްވި ރިޔާސީ އިންތިހާބުގައި ވޯޓުލާން ނުނިކުތް ގިނަ މީހުންނަކީ އެމްޑީޕީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހުގެ ސަޕޯޓަރުން ކަމަށް ޕާޓީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.
އެމްޑީޕީން މިއަދު ބޭއްވި ގައުމީ މަޖިލީހުގެ ބައްދަލުވުމަށްފަހު "އަދަދު" ނޫހާ ވާހަކަ ދައްކަވަމުން ފައްޔާޒް ވިދާޅުވީ ވޯޓުނުލާ ތިބި ގިނަ މީހުންނަކީ އެމްޑީޕީ ސަޕޯޓަރުން ކަމަށާއި އެ ވޯޓުތަކާއެކު ދެ ވަނަ ބުރު ކާމިޔާބު ކުރެވިދާނެ ކަމަށެވެ.
"ވޯޓުނުލާ ވަރަށް ގިނަ ބޭފުޅުންނަކީ އަޅުގަނޑުމެންގެ ވޯޓާސް އެނގޭތޯ. އެކިއެކި ސަބަބުތަކަށްޓަކާ ހެދި ވޯޓުނުލެވިފައި ތިބީ،" ފައްޔާޒް ވިދާޅުވި އެވެ.
ރިޔާސީ އިންތިހާބުގައި ވޯޓުލީ 225,398 މީހުންނެވެ. އެއީ ވޯޓުލުމުގެ ހައްގު ލިބޭ އާބާދީގެ 80 ޕަސެންޓު މީހުންނެވެ. އިންތިހާބުގައި ރައީސްއަށް ލިބުނީ 39 ޕަސެންޓު ވޯޓެވެ. އެންމެ ގިނައިން ވޯޓު ލިބުނީ ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް 45 ޕަސެންޓު ވޯޓު ލިބިނެވެ.
ޗެއާޕާސަން ވިދާޅުވީ ވޯޓުލާން ގިނަ ބަޔަކު ނުކުތުމުގައި ބައިވަރު ސަބަބު ހުރި ކަމަށާއި އޭގެ ތެރޭގައި "މޮޅުވާނެ ކަމަށް ބަލައިގެން" މަސައްކަތް ނުކުރުން ހިމެނޭ ކަމަށެވެ.
"އެއީ ގަޑި ކުޑަވުމާއި އޭގެ އިތުރުން ޓްރާންސްޕޯޓޭޝަން މައްސަލަތަކާއި ދެން އަދި ވަރަށް ބޮޑަށް މޮޅުވާނެ ކަމަށް ބަލާފައި ވެސް އަޅުގަނޑުމެންގެ ވަރަށް ގިނަ ބޭފުޅުން އެހާ ބޮޑު އެފަޓެއް ނުލާ އެބަ ހުރި އެނގޭތޯ،" އޭނާ ވިދާޅުވި އެވެ.
އޭގެ އިތުރުން އިންތިހާބުގައި ތިން ވަނައަށް ގޮސް ޖުމުލަ ހަތް ޕަސެންޓު ވޯދު ހޯދި އިލްޔާސް ލަބީބުގެ ދަ ޑިމޮކްރެޓްސް ޕާޓީއާ އެކި ފަންތީގައި ވާހަކަ ދައްކަމުންދާ ކަމަށް ވެސް ފައްޔާޒް ވިދާޅުވި އެވެ.
"އެކި ލެވެލްގައި ކޮންމެވެސް ވަރަކަށް [ޑިމޮކްރެޓްސްއާ] ވާހަކަ ދައްކަމުން މިދަނީ އެނގޭތޯ،" އޭނާ ވިދާޅުވި އެވެ.
