ރިޔާސީ އިންތިހާބުގެ ދެވަނަ ބުރުގައި ޑިމޮކްރެޓުން އަރާނެ ކޮޅެއް ނިންމުމުގައި އަވަސް އަރުވާލާ 'ތެޅިފޮޅި ގަތުމުގެ' ބަދަލުގައި ވިސްނުންތެރިކަމާއެކު ޕާޓީގެ ތެރޭގައި މަޝްވަރާކޮށް ގޮތެއް ނިންމަން ޖެހޭ ކަމަށް، އެ ޕާޓީގެ ރިޔާސީ ކެންޑިޑޭޓު އިލްޔާސް ލަބީބު ވިދާޅުވެއްޖެ އެވެ.
އިންތިހާބުގެ ފުރަތަމަ ބުރަށްފަހު ތިންވަނަ އަށް ދިޔަ ކެންޑިޑޭޓުގެ ގޮތުގައި މިއަދު ސަޕޯޓަރުންނާ ބައްދަލުކުރައްވައި ވާހަކަ ދައްކަވަމުން ވިދާޅުވީ، ދެވަނަ ބުރުގައި ގުޅޭނޭ ބަޔަކު އިހްތިޔާރުކުރާނީ ވިސްނައި މަޝްވަރާކުރުމަށް ފަހު ގައުމަށާއި، ރައްޔިތުންނަށް އަދި އެ ޕާޓީއަށް އެންމެ ހެޔޮ ގޮތަކަށް ކަމަށެވެ.
"ތެޅިފޮޅިގަނެގެން ވަގުތުން ވަގުތަށް ނިކުމެ ކަންތައްތައް ނިންމުމަށް އަޅުގަނޑުމެން އުޅެގަނެގެނެއް ނުވާނެ. ވިސްނުންތެރިކަމާ އެކީ، ފަރުވާތެރިކަމާ އެކީ، އަޅުގަނޑުމެން ނިންމާ ނިންމުންތައް ނިންމަން ޖެހޭނީ. މި ރާއްޖެއަށާއި މިގައުމަށާއި، މި ޕާޓީއަށް އަދި އަޅުގަނޑުމެންގެ އުސޫލުތަކާއި ޕްރިންސިޕަލްތަކާއި ވެލިޔޫސްތައް ހިފެހެއްޓޭ ގޮތުގެ މަތިން އަޅުގަނޑުމެން ނިންމަން ޖެހޭނީ" އިލްޔާސް ވިދާޅުވި އެވެ.
އިލްޔާސް ވިދާޅުވީ ގޮތް ނިންމުމަށް ފަހު "މާލަހެއް ނުވެ" އެކަން އިއުލާނު ކުރައްވާނެ ކަމަށެވެ.
އިލްޔާސް ވަނީ އިންތިހާބުގައި ކާމިޔާބުވެވަޑައި ނުގަތް ނަމަވެސް ޕާޓީއާއެކު ކުރިއަށް ވަޑައިގަންނަވާނެ ކަމަށް ވިދާޅުވެފަ އެވެ. ޕާޓީގެ ސަޕޯޓަރުންނަށް އޭނާ އިލްތިމާސް ކުރެއްވީ ޕާޓީއާއެކު ކުރިއަށް ވަޑައިގަތުމަށެވެ.
އިއްޔެ ބޭއްވި ރިޔާސީ އިންތިހާބުގައި އަށް ކެންޑިޑޭޓަކު ވާދަކުރެއްވި އިރު އެއްވެސް ކެންޑިޑޭޓަކަށް 50 އިންސައްތަ ވޯޓު ކާމިޔާބުވެފައެެއް ނުވެ އެވެ. މިމަހުގެ 30 ވަނަ ދުވަހު ބާއްވާ އިންތިހާބުގެ ދެވަނަ ބުރަށް ދިޔަ ދެ ކެންޑިޑޭޓުންނަކީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓު އިބްރާހިމް މުހައްމަދު ސޯލިހާއި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު އެވެ.
ރައީސް ސޯލިހަށް 85,939 ވޯޓު ލިބިވަޑައިގަތް އިރު އެމަނިކުފާނުގެ މައްޗަށް ކުރި ހޯއްދެވި މުއިއްޒަށް 101,444 ވޯޓު ލިބިވަޑައިގަތެވެ.
މިހާރު އޮތް ނަތީޖާއަށް ބަލާއިރު ދެވަނަ ބުރުގައި މޮޅުވުމަށް ޓަކައި، ދެ ވަނަ ބުރަށް ވަޑައިގެންނެވި ދެ ބޭފުޅުން ވެސް ދެން އިސްކަން ދެއްވަން ޖެހިވަޑައިގަންނަވާނީ ދަ ޑިމޮކްރެޓްސް އަށެވެ. އިލްޔާސް ތިންވަނަ ކެންޑިޑޭޓަށް ވެވަޑައިގަތީ 15,607 ވޯޓާ އެކު އެވެ.
