ޕެރިސް (ސެޕްޓެމްބަރު 8) - ޗެލްސީ އާއި ބްރައިޓަން އަށް ކުރިން އިރުޝާދުދިން ކޯޗު ގްރަހަމް ޕޮޓާ ގެންނަން ފްރާންސްގެ ލިޔޯނުން މަޝްވަރާކޮށްފި އެވެ.
މީގެ ފަސް މަސްކުރިން ޗެލްސީގެ ކޯޗުކަމުން ޕޮޓާ ވަކިކޮށްފައިވަނީ މަގާމާ ހަވާލުވިތާ ހަތް މަހެއްހާ ދުވަސްތެރޭގަ އެވެ. ބްރައިޓަންގައި ހުއްޓައި، 20 މިލިއަން ޑޮލަރުގެ ފީއެއް ދައްކާފައި ޗެލްސީން ޕޮޓާ ގެނައީ ފަސް އަހަރުގެ ކޮންޓްރެކްޓެއްގަ އެވެ. އެކަމަކު، އަހަރެއް ވެސް ނުވަނިސް ޕޮޓާ ވަކިކުރަން ނިންމީ އެވެ.
ލިޔޯނުން އެ ޓީމުގެ ކޯޗަކަށް ހުރި ލޯރެންޓް ބްލޮންކް މަގާމުން ދުރުކުރަން ނިންމީ ލީގުގައި އެންމެ ފަހުން ކުޅުނު މެޗުން ޕީއެސްޖީ އަތުން 4-1 އިން ބަލިވިއިރު، ލިޔޯން މި ވަގުތު އޮތީ ލީގު ތާވަލުގެ ފުލުގައި ކަމަށްވާތީ އެވެ.
ލިޔޯންގެ ވެރިޔާ ޖޯން ޓެކްސްޓާ އަކީ އިނގިރޭސި ޕްރިމިއާ ލީގުގެ ކްރިސްޓަލް ޕެލަސްގެ ބޯޑު މެމްބަރެކެވެ. ޓެކްސްޓާ ފާއިތުވި ތިން ދުވަހު ވަނީ ޕޮޓާއާ އެކު ބައްދަލުވުންތަކެއް ކުރިއަށް ގެންގޮސްފަ އެވެ. އެކަމަކު، މީޑިއާ ރިޕޯޓްތައް ބުނާގޮތުން ޕޮޓާގެ ވިސްނުން ހުރީ ލިޔޯންގެ ހުށަހެޅުން ބަލައިގަންނަ ގޮތަކަށް ނޫނެވެ.
ޕޮޓާ ވަނީ މީގެ ކުރިން ސްވަންސީ ސިޓީ އަށް ވެސް ކޯޗުކޮށްދީފަ އެވެ. މި ސީޒަން ފެށުމުގެ ކުރިން އޭނާ އަށް އިނގިރޭސި ދެ ވަނަ ޑިވިޝަނާއި ސްކޮޓްލެންޑްގެ ޓީމުތަކުން އޮފާ ލިބިފައިވެ އެވެ.
