އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ޖައިޝަންކަރު، ރާއްޖޭގެ ފޮރިން މިނިސްޓަރު އަބްދުﷲ ޝާހިދުއަށް ފޮނުވި ކަމަށް ބުނެ ސޯޝަލް މީޑިއާ އަދި ބައެއް މީޑިއާތަކުގައި ފަތުރަމުންދާ ސިޓީއަކީ އަސްލެއް ނޫން ކަމަށް ބުނެ ރާއްޖޭގެ ފޮރިން މިނިސްޓްރީން އެކަން ކުށްވެރިކޮށްފި އެވެ.
ފޮރިން މިނިސްޓްރީން މިއަދު ކުރި ޓުވީޓެއްގައި ބުނީ ބޭރު ގައުމެއްގެ ވެރިޔެއްގެ ނަން މަތީގައި 'ފެބްރިކޭޓް' ކޮށް ފަތުރަމުންދާ ސިޓީއެއްގެ މައުލޫމާތު އެ މިނިސްޓްރީއަށް ލިބިފައިވާ ކަމަށެވެ. އަދި އެ ސިޓީގައި ހިމެނޭ މައުލޫމާތު ނޫހެއްގައި ޝާއިރުކޮށްފައިވާތީ، އެގޮތަށް ކަންތައް ނުކުރަން ފޮރިން މިނިސްޓްރީން އިލްތިމާސްކުރި އެވެ.
"އެ ސިޓީއަކީ އަކީ އަސްލެއް ނޫން، ސިޓީގައިވާ ވާހަކަތަކަކީވެސް އަސްލެއް ނޫން، ގާތް ގައުމަކާއެކު އޮތް ގުޅުމަށް ބުރޫއަރާފާނެ ގޮތަކަށް ފަތުރަމުންދާ މި ސިޓީ މި މިނިސްޓްރީން ހަރުކަށި އިބާރާތުން ކުށްވެރިކުރަން"
މިނިސްޓްރީގެ ޓުވީޓުގައި އިތުރަށް ވަނީ އާންމުން އަދި ނޫސްވެރިންވެސް ޒިންމާދާރުވެ، ދޮގު މައުލޫމާތު ނުފެތުރުމަށް ނަސޭހަތްތެރިވެފަ އެވެ.
ޑރ. ޖައިޝަންކަރުގެ ނަމުގައި ފެތުރެމުންދާ ސިޓީގައި މައިގަނޑު ގޮތެއްގައި ވަނީ ހދ. ހަނިމާދޫ، އުތުރު ތިލަފަޅު އަދި އައްޑޫ ސިޓީއިން ބިންތަކެއް އިންޑިއާގެ ސިޔާދަތީ ބާރު ހިނގާ ގޮތަށް 99 އަހަރަށް ބިންތަކެއް ދިނުމުގެ ވާހަކަ އެވެ. އަދި، އިންޑިއާގެ މިލިޓަރީ ޑްރޯންތަކެއް ރާއްޖެއަށް ދިނުމުގެ ވާހަކަތަކަކާއި ރާއްޖެއިން އެ ގައުމަށް ދައްކަން ޖެހޭ ފައިސާތަކެއް މާފުކޮށްދިނުންވެސް ސައްހަ ނޫން ސިޓީގައި ހިމަނާފައިވެ އެވެ.
ރާއްޖޭގެ ފޮރިން މިނިސްޓްރީން މިކަން ދޮގުކޮށްފައިވާއިރު ވެރިކަން ކުރާ މައި ޕާޓީ، އެމްޑީޕީގެ މެންބަރުން އަދި އިސްވެރިން ދަނީ މިއީ ހޮނިހިރު ދުވަހު ބާއްވާ ރިޔާސީ އިންތިހާބާ ދިމާކޮށް ފަތުރަމުންދާ ވާހަކަތަކެއް ކަމަށް ބުނަމުންނެވެ.
