ހުޅުމާލެ ފަޅުތެރޭގައި ސްޕީޑް ލޯންޗާއި ޑިންގީތަކަށް ހާއްސަ މެރީނާއެއް ތަރައްގީކުރުމަށް އާބަންކޯ އިން ޖީޕީއެލް ހޯލްޑިންގްސް ޕްރައިވެޓް ލިމިޓެޑާ ބުދަ ދުވަހު ހަވާލުކޮށްފި އެވެ.
ހުޅުމާލެ ފެރީ ޓާމިނަލުގެ ދެކުނުން ތަރައްގީކުރާ މި މެރިނާ އަކީ ކުދި ޑިންގީ ތަކުން ފެށިގެން ގޮސް ލަގްޒަރީ ޔޮޓްތަކަށް ހާއްސަކޮށްގެން ތަރައްގީކުރާ ތަނެކެވެ. އެ ތަނުގައި އެކަމަށް ހާއްސަ ބަނދަރަކާއި ސަޕޯޓީން ފެސިލިޓީއެއް ގާއިމުކުރުމަށް ވަނީ ހަމަޖެހިފަ އެވެ.
ޖީޕީއެލް ހޯލްޑިންގްސް އިން ވަނީ މި ހިތްގައިމު މަޝްރޫއާ ގުޅޭ ތަފްސީލު "އަދަދު" ނޫހާ ހިއްސާކޮށްފަ އެވެ.
އެކުންފުނިން ބުނި ގޮތުގައި މި މެރީނާގެ ސަޕޯޓިން ފެސިލިޓީ ގާއިމުކުރާނީ ފެރީ ޓާމިނަލާއި ހުޅުމާލެ ރަށު މާރުކޭޓާ ދޭތެރޭ ހުންނަ ޕާކިމް ޒޯނުގަ އެވެ. އެއީ އެމްޓީސީސީގެ ބަސް ޕާކް ކުރުމަށް ބޭނުންކުރަމުން ދިޔަ ސަރަހައްދެވެ. އާބަންކޯ އިން ވަނީ އެ ތަން ހުސްކުރުމުގެ މަސައްކަތްވެސް ފަށާފަ އެވެ.
ޖީޕީއެލް އާ ހަވާލުކޮށްގެން ހުޅުމާލޭގައި ތަރައްގީކުރާ މެރީނާގެ ކުރެހުމަށް
މެރީނާގައި ހުންނާނެ ހާއްސަ ސިފަތައް
ޖީޕީއެލް ހޯލްޑިންގްސް އިން ބުނިގޮތުގައި މި މެރީނާގައި ޖުމްލަ 133 އުޅަނދަށް ފަސޭހަކަމާއެކު އެއްފަހަރާ ބަނދަރު ކުރެވޭނެ ޖާގަ ހުންނާނެ އެވެ. އޭގެ ތެރެއިން 33 ޖާގަ ހާއްސަކޮށްފައިވަނީ "މެޖެސްޓީ" ފަދަ ލަގްޒަރީ ޔޮޓްތަކަށް ބަނދަރުކުރެވޭ ގޮތަށެވެ. ބާކީ ޖާގަ ހާއްސަކުރަނީ ބިގް ގޭމް ފިޝިން ފަދަ ހަރަކާތްތައް ހިންގާ ލޯންޗުތަކުން ފެށިގެން ގޮސް ކުދި ޑިންގީތަކަށެވެ.
މި މެރީނާއިން އުޅަނދުފަހަރަށް ފެނާއި ފިއުލިންގެ ހިދުމަތް ލިބެން ހުންނައިރު 24 ގަޑިއިރު މޮނިޓާ ކުރާ ސީސީޓީވީ ކެމެރާވެސް ހަރުކޮށްފައި ހުންނާނެ އެވެ.
ހުޅުމާލޭގެ މަލަމަތި ބަދަލުކޮށްލާނެ މި މެރީނާގެ ހިތްގައިމުކަން ގެނުވައިދޭނީ އެތަނުގައި ގާއިމުކުރާ ސަޕޯޓިން ފެސިލިޓީންނެވެ. ހަތަރު ފްލޯއަށް އިމާރާތްކުރާ މި ފެސިލިޓީގެ ބޭސްމެންޓް ހާއްސަކޮށްފައިވަނީ ކާރު ޕާކިން އަށެވެ. އެގޮތުން ގާތްގަނޑަކަށް 100 ކާރަށް ޕާކު ކުރެވޭނެ ޖާގަ މިތަނުން ލިބޭނެ އެވެ.
ފެސިލިޓީގެ ގްރައުންޑު ފްލޯއިން 24 ގަޑިއިރު ހިދުމަތް ދޭ ފިހާރަ އާއި ރެސްޓޯރަންޓުގެ ހިދުމަތް ލިބެން ހުންނަ އިރު ފުރަތަމަ ފްލޯ ހާއްސަކުރަނީ ރިސޯޓުތަކާއި ހޮސްޕިޓަލިޓީ އިންޑަސްޓްރީ އާ ގުޅުންހުރި އޮފީސް ސްޕޭސްތަކަށެވެ. އަދި ރޫފްޓޮޕްގައި ވީއައިޕީ ލައުންޖެއްވެސް ހުންނާނެ އެވެ. މީގެ އިތުރުން ކޯލްޑް ސްޓޯރޭޖްގެ ހިދުމަތްވެސް މި ތަނުން ފޯރުކޮށްދޭނެ އެވެ.
ޖީޕީއެލް އާ ހަވާލުކޮށްގެން ހުޅުމާލޭގައި ތަރައްގީކުރާ މެރީނާގެ ކުރެހުމަށް
ޖީޕީއެލް ހޯލްޑިންގްސް އިން ބުނީ މި މަޝްރޫއާއެކު ހުޅުމާލެއަށް އިގްތިސާދީ ރަނގަޅު ބަދަލުތަކެއް އަންނާނެ ކަމަށެވެ. އެގޮތުން އުޅަނދުފަހަރަށް ރައްކާތެރި މާހައުލެއް ލިބިގެންދާއިރު ޒުވާނުންނަށް އެތައް ވަޒީފާއެއް މި މެރީނާއިން އުފެދޭނެ ކަމަށް އެ ކުންފުނިން ބުންޏެވެ. އަދި މި ފެސިލިޓީ އޮޕަރޭޝަނަށް ގެންނައިރު ފެސިލިޓީގެ ވީއައިޕީ ލައުންޖުގަ ތިބެގެން ވީއައިއޭއިން ފުރާ ފްލައިޓުތަކަށް ޗެކިން ކޮށްލުމުގެ ހިދުމަތްވެސް ލިބޭނެ ކަމަށް ބުންޏެވެ.
ޖީޕީއެލް އިން އަންނަނީ މި ތަނުގެ މަސައްކަތް އަންނަ މަހު ފެށުމަށް ތައްޔާރު ވަމުންނެވެ. އަދި އަހަރެއް ތެރޭ މި މަޝްރޫއުގެ މަސައްކަތް އެއްކޮށް ނިންމާލެވޭނެ ކަމަށް އެކުންފުނިން ލަފާކުރެ އެވެ.
ހުޅުމާލެ ބަލަހައްޓާ އާބަންކޯ އިން ހާމަކުރި ގޮތުގައި މި މަޝްރޫއާއެކު ވަޒީފާގެ ގިނަ ފުރުސަތުތަކެއް ތަނަވަސްވެ، ދިވެހި މަސްވެރިކަމުގެ ސިނާއަތަށްވެސް ފައިދާކުރާނެއެވެ.
