ކުދި ރަށްތަކަށް ވަޑައިނުގެން, ރައްޔިތުންގެ ވޯޓަށް އެދޭނެ ކަމެއް ނެތް ކަމަށް ވިދާޅުވެ, އެމްޑީޕީގެ ބޮޑުތިލަދުންމަތީ ކޯޑިނޭޓަރު އަދި ފޮރިން މިނިސްޓަރު އަބްދުالله ޝާހިދުގެ ފާޑު ކިއުން, ވާދަވެރި ކެންޑިޑޭޓް ޑރ. މުހައްމަދު މުއިއްޒުއަށް އަމާޒުކުރައްވައިފި އެވެ.
ރޭ ކުޅުފުއްފުށީގައި ބޭއްވި އެމްޑީޕީގެ ކެމްޕޭން ޖަލްސާގައި ވާހަކަ ދައްކަވަމުން ޝާހިދު ވިދާޅުވީ, އެ ޕާޓީގެ ކެންޑިޑޭޓް ރައީސް އިބްރާހިމް މުހައްމަދު ސޯލިހު, ބޮޑު ތިލަދުންމަތީގެ ރަށްތަކަށް ޒިޔާރަތް ކުރެއްވުމުން, އިންތިހާބު ބޮޑުތަނުން ކާމިޔާބުކޮށްފައިވާ ކަމުގެ ސާފު ހެކި ފެންނަމުންދާ ކަމަށެވެ.
ބޮޑު ތިލަދުންމަތީގެ ތިން އަތޮޅުގެ ރައްޔިތުން ރައީސްގެ ފަހަތްޕުޅަށް އިތުރުވަމުންދާކަން ފާހަގަކުރައްވާ ޝާހިދު ވިދާޅުވީ އަންނަ ހޮނިހިރު ދުވަހު ބާއްވާ އިންތިހާބު ރައީސް ބޮޑުތަނުން ކާމިޔާބު ކުރައްވާފައިވާ ކަމަށެވެ.
އެ މޭރުމުން ވާހަކަ ކުރިއަށް ގެންދަވާ ޝާހިދު ވިދާޅުވީ ރައީސް ބޮޑު ތިލަދުންމަތީގެ 40 ރަށާއި އެއް ސިޓީއަށް ވަޑައިގެންފައިވާ ކަމަށެވެ. ނަމަވެސް, ވާދަވެރި ކެންޑިޑޭޓަށް ވަޑައިގެންނެވުނީ އޭގެ ތެރެއިން 17 ރަށަށް ކަން އޭނާ ފާހަގަކުރެއްވި އެވެ.
"[ރައީސް ސޯލިހު, ބޮޑު ތިލަދުންމަތީގެ] 40 ރަށަށް ޒިޔާރަތް ކުރައްވައިފި. ރައީސްއާ ވާދަކުރައްވާ ބޭފުޅުން މި 40 ރަށުގެ ތެރެއިން މިހާތަނަށް ޒިޔާރަތް ކޮށްލެވުނީ އެންމެ 17 ރަށަށް." ޝާހިދު ވިދާޅުވި އެވެ.
ކުޅުދުއްފުށީގައި ރޭ ބޭއްވި ޖަލްސާގެ ތެރެއިން -- ފޮޓޯ: މިރާން/ އަދަދު
ބޮޑު ތިލަދުންމަތީގެ ރަށްތަކުގެ ތެރެއިން މުއިއްޒު މިހާތަނަަށް ވަޑައިނުގަންނަވާ ރަށްތަކުގެ ނަން ވަކިވަކިން ފާހަގަކުރައްވާ ޝާހިދު ވިދާޅުވީ ރައީސް ސޯލިހު ފިޔަވައި ދެން ވާދަކުރައްވާ ކެންޑިޑޭޓަކު އެ ރަށްތަކުގެ ރައްޔިތުންނަށް ނުވެސް އެނގޭ ކަމަށެވެ. އަދި އެއީ ކުދި ރަށްތައް ވީމައި, އެ ރަށްތައް ބާކީ ކޮށްލާ ކަމަށް އޭނާ ވަނީ ތުހުމަތު ކުރައްވާފަ އެވެ.
"ކުދި ކުދި ރަށްތަކެއް ވީމައި ބާކީކޮށްލާފައި, އެކަހެރި ކޮށްލާފައި, ކަމެއް ނުހިންގާފައި, ކުދި ކުދި ރަށްތަކެއް ވީމައި އެ ރަށްރަށަށް ނާރާފައި ރައްޔިތުންގެ ވޯޓަށް އައްސަވާނެ ކަމެއް ނެތް," އެ ރަށްތަކުގެ ރައްޔިތުން ތިބީ ރައީސް ސޯލިހު ފިޔަވައި އެހެން މީހަކަށް ވޯޓު ދޭން ނޫންކަން ފާހަގަކުރައްވާ ޝާހިދު ވިދާޅުވި އެވެ.
ޝާހިދު ވިދާޅުވީ މިއިން ޒަމާނަކު އެއްވެސް ސަރުކާރަކުން ބޮޑު ތިލަދުންމައްޗަށް ތަރައްގީގެ މަޝްރޫއުތައް ނުހިންގަވާ ވަރަށް މި ސަރުކާރުގައި މަޝްރޫއުތައް ހިންގަން ފަށާފައިވާ ކަމަށެވެ. އަދި މުޅި މި ބޮޑު ތިލަދުންމަތީގެ 40 ރަށާއި އެއް ސިޓީއަށް 51.3 ބިލިއަން ރުފިޔާގެ މަޝްރޫއު ހިންގަމުންދާ ކަމަށް އޭނާ ވިދާޅުވި އެވެ.
"މި ވޭތުވެދިޔަ ހުރިހާ އަހަރުތަކެއް އެއްކޮށްލާފައި ބަންޑެލި ޖަހާލާފައި ދައްކާލިޔަސް މިއާ އަރާ ހަމަކުރެވޭނެ އެއްވެސް ގޮތެއް ނެތް. ސާފު ހެކި މިއީ މި އިންތިހާބު އެއްބުރުން ކާމިޔާބު ކުރައްވައިފި ކަމުގެ," ޝާހިދު ވިދާޅުވި އެވެ.
