އަންނަ ހޮނިހިރު ދުވަހު އޮންނަ ރިޔާސީ އިންތިހާބުގެ ކެމްޕެއިނަށް ޕީއެންސީގެ ރިޔާސީ ކެންޑިޑޭޓު އަދި މާލޭގެ މޭޔަރު ޑރ. މުހައްމަދު މުއިއްޒު މިއަދު އއ. މަތިވެރިއަށް ވަޑައިގެން އުޅުއްވަނިކޮށް، ހިނގި ހަމަނުޖެހުމުގެ ތެރެއިން އޭނާއަށް ބަޔަކު ހަމަލާ ދޭން އުޅެފައިވާ ކަމަށް ނުބެލެވޭ ކަމަށް ފުލުހުން ބުނެފި އެވެ.
ސޯޝަލް މީޑިއާގައި ޕީޕީއެމްގެ ސަޕޯޓަރުން ގެންދަނީ މުއިއްޒަށް ހަމަލާ ދޭން އުޅެފައިވާ ކަމަށް ބުނެ ވީޑިއޯއެއް ދައުރުކުރަމުންނެވެ.
"ސަންގު ޓީވީ" ގެ ލައިވްފީޑުން ފެންނަ ގޮތުން މުއިއްޒަށް މަރުހަބާ ކިޔަން އެ ރަށުގައި ދަމާފައިވާ ސަފުގައި ތިބި މީހުނާ ސަލާން ކުރަމުން ދަނިކޮށް، އެ ތަނުގެ ކައިރީ ހުރި މީހަކު އޭނާއާ ޒުވާބު ކުރަން ފަށާ ތަން ފެނެ އެވެ. އެއާއެކު ވަށައިގެން ތިބި މީހުން ގޮސް އޭނާ ދުރުކުރާ ތަން ފެނެ އެވެ.
ވީޑިއޯއިން ދެން ފެންނަނީ އިތުރު އެހެން މީހަކު އެ ދިމާއަށް ދާން އުޅުމުން ފުލުހުން ހިފަހައްޓައި އެ މީހަކު ވެސް ދުރަށް ޖައްސާ މަންޒަރެވެ.
ފުލުހުން ބުނީ އއ. މަތިވެރީގައި ދެ މީހެއްގެ ދެމެދުގައި އަތުން ބޭއަދަބީ އިޝާރާތްތަކެއް ކުރުމަށް ފަހު، ހަމަނުޖެހުން ހިންގަން ފެށުމުން އެއިން އެކަކު ފުލުހުންގެ ބެލުމުގެ ދަށަށް ގެންދިޔަ ކަމަށެވެ. މައުލޫމާތު ސާފުކުރުމަށް ފަހު މިހާރު އޭނާ ދޫކޮށްލާފައިވާ ކަމަށް ވެސް ފުލުހުން ބުންޏެވެ.
"މިހާތަނަށް ބެލި ބެލުމުން މި ހަމަނުޖެހުމުގައި ޕީއެންސީގެ ރިޔާސީ ކެންޑިޑޭޓު ޑރ. މުއިއްޒަށް ހަމަލާ ދޭން އުޅެފައިވާ ކަމެއް ނުބެލެވޭ،" ފުލުހުން މީޑިއާތަކަށް ހިއްސާކުރި ޓެކްސްޓް މެސެޖުގައިވެ އެވެ.
މަތިވެރިން "އަދަދު" ނޫހަށް ވާހަކަ ދެއްކި މީހަކު ކިޔައިދިން ގޮތުގައި، މުއިއްޒަށް މަރުހަބާ ކިޔަން ދަމާފައިވާ ސަފާ ތަންކޮޅެއް ދުރުގައި ތިބި އެމްޑީޕީގެ ސަޕޯޓަރުންގެ ތެރެއިން މީހަކު މުއިއްޒަށް ސަލާން ކުރާށޭ ކިޔާފައި އެ ދިމާއަށް ބާރަށް ދުއްވާ ގަތް ކަމަށެވެ. އެއީ ވީޑިއޯއިން ފެންނަ ކަޅު ޓީޝާޓެއް ލައިގެން ހުރި މީހާ އެވެ.
އޭނާ ގޮސް އަތް ހޫރާލުމުން، ވަށައިގެން ތިބި ޕީޕީއެމްގެ ސަޕޯޓަރުން އެ މީހާ ދުރަށް ޖެއްސި ކަމަށް އޭނާ ބުންޏެވެ. އެ ވަގުތު ދުރުގައި ހުރި އެމްޑީޕީގެ އިތުރު ސަޕޯޓަރަކު އެ އައި ފޯރީގައި އެ ދިމާއަށް ދުއްވާ ގަތުމުން، ފުލުހުން ގޮސް އޭނާ ހިފެހެއްޓީ ކަމަށެވެ.
"އެ މީހުން ދެން އެ ތަނާ ދުރަށް ޖެއްސި ގޮތަށް އެބަ ތިބި، ހައްޔަރެއް ނުކުރޭ،" އޭނާ ބުންޏެވެ.
ރިޔާސީ ކެންޑިޑޭޓުންނަށް ދިނުމަށް ގާނޫނުގައި ބަޔާން ކުރާ ސެކުއިރިޓީ ޑރ. މުއިއްޒަށް ވެސް ފުލުހުންގެ ހިދުމަތުން ގެންދަނީ ދެމުންނެވެ. މީގެ ކުރިން ކ. ގުރައިދުއަށް މުއިއްޒު ވަޑައިގަންނަވަން އުޅުއްވަނިކޮށް، އެ ރަށުގެ ޕީޕީއެމްގެ ސަޕޯޓަރުންނާއި އެމްޑީޕީގެ ސަޕޯޓަރުންނާ ދެމެދު ހަމަނުޖެހުމެއް ހިންގާފައިވެ އެވެ.
