ލަންޑަން (ސެޕްޓެމްބަރު 3) - ޗެލްސީ ދޫކޮށް އާސެނަލަށް ބަދަލުވި ޖަރުމަންގެ ފޯވާޑް، ކައި ހަވާޓްޒް އާސެނަލްގައި ފްލޮޕްވާނެ ކަމަށް ޗެލްސީ އާއި އާސެނަލްގެ ކުރީގެ ޑިފެންޑަރު ވިލިއަމް ގަލަސް ބުނެފި އެވެ.
ހަވާޓްޒް 24، ޗެލްސީ ދޫކޮށް އާސެނަލަށް ބަދަލުވީ 65 މިލިއަން ޕައުންޑް (73 މިލިއަން ޑޮލަރު)ގެ ޓްރާންސްފާ ފީއެއްގަ އެވެ. މިދިޔަ ސީޒަން ނިމުމާ އެކު ޕްރީ ސީޒަންގެ ފަރިތަކުރުންތައް ފެށުމުގެ ކުރިން އާސެނަލުން ވަނީ ކައި ހަވާޓްޒްގެ ސޮއި ހޯދައިފަ އެވެ.
އާ ކުލަބާ އެކު ޕްރީ ސީޒަންގެ މެޗުތަކުގައިވެސް ކުޅެ އަދި ޕްރިމިއާ ލީގުގައި މިހާތަނަށް އާސެނަލުން ކުޅުނު ތިން މެޗުގައި ވެސް ހަވާޓްޒް ވަނީ ކުޅެފަ އެވެ. ޕްރިމިއާ ލީގުގައި މިހާތަނަށް ކުޅުނު ތިން މެޗުގައި ހަވާޓްޒް އަށް ގޯލެއް ނުޖެހުނުއިރު، އެސިސްޓެއް ވެސް ކޮށްދެވިފައެއް ނުވެ އެވެ.
އާސެނަލްގެ ކުރީގެ ޑިފެންޑަރު ގަލަސް ބުނީ ހަވާޓްޒް ސޮއިކުރުމަކީ އާސެނަލުން ނިންމި ގޯސް ނިންމުމެއް ކަމަށާއި، ހަވާޓްޒް އަށް ހޭދަކުރި 65 މިލިއަން އެހެން ކުޅުންތެރިއަކަށް ހޭދަކުރިނަމަ މާ ރަނގަޅުވާނެ ކަމަށެވެ.
އާސެނަލާ އެކު މިހާ ގިނަ ވަގުތު ލިބުނުއިރު އަދިވެސް ކައި ހަވާޓްޒަށް އޭނާ ބޭނުންވާ މަގާމުގައި ނުކުޅެވޭ ކަމަށާއި، އާސެނަލްގައި ގޭމް ޕްލޭނަށް ވެސް އޭނާ ފިޓު ނުވާކަމަށް ގަލަސް ބުނެފައިވެ އެވެ.
އާސެނަލްގެ ކެޕްޓަންކަން ވެސް ކޮށްފައިވާ ގަލަސް ބުނީ އާސެނަލް ކަހަލަ ޓީމަކަށް ކުޅޭ ފެންވަރު ހަވާޓްޒްގެ ކިބައިގައި ނެތް ކަމަށާއި، އެ ޓީމުގައި އޭނާ ވާނީ ފްލޮޕަކަށް ކަމަށެވެ. އޭނާ ބުނީ އާސެނަލުން މިދިޔަ ސީޒަންގައި ކުޅުނު ގޮތަށް ކުޅެން މިހާރު ޖެހިއްޖެ ކަމަށާއި، ހަވާޓްޒް ކޮންމެ މެެޗެއްގައި އަރުވައިގެން ކުރަން ބޭނުންވާ ކަންކަން ހާސިލް ނުވާ ކަމަށެވެ.
ހަވާޓްޒް އަށް އަމާޒުވަމުން އަންނަ ފާޑުކިޔުންތަކަށް ރައްދުދެމުން އާސެނަލްގެ ކޯޗު މިކޭލް އާޓެޓާ ބުނީ އެޓީމްގައި ތިބި ބައެއް ކުޅުންތެރިންނަަށް އެކަހަލަ ފާޑުކިޔުން އަައުމަކީ އާންމު ކަމެއް ކަމަށާއި، ކައި ހަވާޓްޒް އަށް އާސެނަލްގައި މޮޅު ކުޅުމެއް ދެެއްކޭނެކަމުގެ ޔަގީންކަން އޭނާގެ އެބައޮތް ކަމަށެވެ.
މިސާލެއްގެ ގޮތުން އާޓެޓާ ބުނީ މިހާރުގެ ކެޕްޓަން މާޓިން އޮޑެގާޑަށް ވެސް ތަފާތު ދައްކަން ވަގުތު ނެގިކަމަށާއި، ގްރޭނިޓް ޝަކާ ކަހަލަ ކުޅުންތެރިންނަށް ވެސް އެ ފާޑުކިޔުން އަމާޒުވި ކަމަށެވެ. ނަމަވެސް ކޯޗެއްގެ ގޮތުގައި އޭނާގެ ފުރިހަމަ އިތުބާރު ހުރިހާ ކުޅުންތެރިންނަށް ވެސް އޮންނާނެ ކަމަށާއި، ހަވާޓްޒްގެ މޮޅު ކުޅުން ވަރަށް އަވަހަށް ފެންނާނެ ކަމަށް އާޓެޓާގެ ވާހަކައިގައި ފާހަގަކޮށްފައިވެ އެވެ.
އިނގިރޭސި ޕްރިމިއާ ލީގުގައި މިރޭ އާސެނަލް ނުކުންނާނީ ވާދަވެރި މެންޗެސްޓާ ޔުނައިޓެޑާ ދެކޮޅަށެވެ. މި މެޗުގައި އާސެނަލްގެ މިޑްފިލްޑަރު ތޯމަސް ޕާޓޭ އަށް އަނިޔާގެ ސަބަބުން ނުކުޅެވޭނެ އެވެ.
