ބޭރު ގައުމުތަކުން ނަގާފައިވާ ލޯނުތަކަށް 2026 ވަނަ އަހަރު ގިނަ އަދަދެއްގެ ފައިސާ އެއްފަހަރާ ދައްކަން ޖެހޭއިރު އެ ފައިސާ ދެއްކޭނެ ކަމަށް ރިޔާސީ އިންތިހާބުގައި ވާދަކުރައްވާ އަށް ކެންޑިޑޭޓުން ވެސް ވިދާޅުވެއްޖެ އެވެ.
އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގައި ވާދަ ކުރައްވާ ކެންޑިޑޭޓުންގެ ބަހުސްގައި ބޮޑު ދަރަންޏާ ބެހޭ ގޮތުން ކުރި ސުވާލަށް ޖަވާބު ދެއްވަމުން އެމްޑީޕީގެ ކެންޑިޑޭޓް، ރައީސް އިބްރާހީމް މުހައްމަދު ސޯލިހު ވިދާޅުވީ ދިވެހިރާއްޖެއިން ކުރިއަށް އޮތް ތިން އަހަރު ތެރޭގައި ދައްކަންޖެހޭ ދަރަނި ދެއްކުމަށް ގެންގުޅޭނެ ސިޔާސަތަކީ ރީފައިނޭންސް ކުރުން ކަމަށެވެ.
ރައީސް ސޯލިހު ވިދާޅުވީ ދަރަނީގެ ގޮތުގައި 2026ގައި ދައްކަން ޖެހެނީ 800 މިލިއަން ޑޮލަރު ކަމަށާއި އެ ފައިސާ ދެއްކޭނެ ގޮތުގެ ޕްލޭނެއް އެބަ އޮތް ކަމަށެވެ. އެގޮތަކީ އޭގެ ދެބައިކުޅަ އެއްބައި ރީފައިނޭންސް ކުރުން ކަމަށް ވިދާޅުވި އެވެ. އެއީ ފައިސާ ދެއްކުމަށް ދަށް އަގެއްގައި ލޯނު ނަގައިގެން ފައިސާ ދެއްކުމެވެ.
"2026 ގައި ދަރަނި ދައްކާނެ ގޮތުގެ ޕްލޭނެއް އެބަ އޮތް، އޭގެތެރެއިން ދެބައިކޮށްފައި އެއްބައި ރީފައިނޭންސް ކުރުން، މާކެޓަށް ގޮސް ފައިސާ ހޯދާނެ ގޮތް އަޅުގަނޑުމެންނަށް އެނގޭ، ކޯވިޑު ތެރޭގައި އަޅުގަނޑުމެން ވާނީ އެކަން ހާމަކޮށްފައި،" ރައީސް ސޯލިހު ވިދާޅުވި އެވެ.
އެ މަނިކުފާނު ވިދާޅުވީ އެ އަހަރު ދައްކަންޖެހޭ ބާކީ ފައިސާ ހޯއްދަވާނީ ފޮރިން ޑިވެލޮޕްމަންޓު ފަންޑު ބޮޑު ކޮށްގެން ކަމަށެވެ.
އެ ސުވާލުގެ ޖަވާބުގައި ޕީއެންސީގެ ކެންޑިޑޭޓު، ޑރ. މުއިއްޒު ވިދާޅުވީ އޭނާގެ ސަރުކާރެއްގައި ރިކަރަންޓު ހަރަދަށް އެމްއެމްއޭއިން ފައިސާ ނެގުމުގެ ބަދަލުގައި ޓެކުސް ފައިސާއިން ސަރުކާރު ހަރަދުތައް ހަމަޖައްސާނެ ކަމަށެވެ. އަދި ފައިސާ ޗާޕުކޮށްގެން ސަރުކާރުގެ ހަރަދުތައް ބެލެހެއްޓުން ނިމުމަކަށް ގެންނާނެ ކަމަށާއި އެކްސްޗޭންޖު ރޭޓު ވަކި ހަމައަކަށް ތިރިކުރުމުގެ ވިސްނުން ގެންގުޅުއްވާ ކަމަށެވެ.
ޖުމްހޫރީ ޕާޓީގެ ކެންޑިޑޭޓު ގާސިމް އިބްރާހިމް ވިދާޅުވީ ބޮޑު ދަރަނި ދެއްކުމަށްޓަކައި ގެންގުޅޭ ސިޔާސަތަކީ ދައުލަތަށް ފައިސާ ވެއްދުމަށްޓަކައި އިތުރު ވިޔަފާރި ހިންގުމާއި އެކަމަށް 600 މިލިއަން ޑޮލަރުގެ އެހީއެއް ހޯއްދެވުމެވެ.
މިހާރު ޓެކުސް ނަގާ ދާއިރާތަކުގައި ހުރި ކަންތައްތައް ބަދަލުކޮށް އިސްލާހު ކުރައްވާނެ ކަމަށާއި ކޮރަޕްޝަނުގެ ތެރެއިން ދައުލަތުން ގެއްލިގެންދާ ފައިސާ އަނބުރާ ހޯއްދެވުމަށް ކޮރަޕްޝަންގެ ދޮރުތައް ބަންދު ކުރައްވާނެ ކަމަށް ގާސިމް ވައުދުވެވަޑައިގެންނެވި އެވެ.
އަމިއްލަ ގޮތުން އިންތިހާބުގައި ވާދަކުރައްވާ ކެންޑިޑޭޓު އުމަރު ނަސީރު ގަބޫލު ކުރައްވާ ގޮތުގައި ރާއްޖޭގެ އިގުތިސާދު ހަމައެކަނި އެއް ކަމަކަށް ބަރޯސާވެފައި އޮތް ތޮރުން ނިމުމަކަށް ގެންނަން ހުށަހެޅިއިރު، ފާރިސް މައުމޫން ވަނީ ދައުލަތުގެ އާމްދަނީ އިތުރު ކުރުމަށް ޑިޖިޓަލް ކްރިއޭޓިވް ސެކްޓަރެއް ތައާރަފު ކުރައްވާނެ ކަމަށް ވިދާޅުވެފަ އެވެ.
މިއަހަރުގެ ރިިޔާސީ އިންތިހާބުގައި ހުރިހާ ކެންޑިޑޭޓުން ވެސް ވަނީ މެނިފެސްޓޯތަކުގައި ދައުލަތުން ބޮޑެތި ހަރަދުތައް ހިނގާނެ ކަންކަން ހިމަނުއްވައިފަ އެވެ. ރިޔާސީ ބަހުސްގެ ފުރަތަމަ ސުވާލު ރާއްޖޭގެ އިގުތިސާދަށް އަމާޒު ކުރެއްވީ އެހެންވެ އެވެ.
ވޯލްޑު ބޭންކުގެ ހިސާބުތަކުން ދައްކާ ގޮތުގައި ރާއްޖެއިން ދަރަނީގެ ގޮތުގައި ދައްކަންޖެހޭ ފައިސާގެ އަދަދު ހަ ބިލިއަނަށްވުރެ އިތުރެވެ.
