ލަންޑަން (ސެޕްޓެމްބަރު 2) - މި އަހަރުގެ ޔޫރަޕްގެ ފުޓްބޯޅަ ސީޒަނަށް އިނގިރޭސި ޕްރިމިއާ ލީގުގެ ކުލަބުތަކުން ކުރި ހަރަދު ރެކޯޑު އަދަދެއް ކަމަށްވާ 2.36 ބިލިއަން ޕައުންޑް (2.9 ބިިލިއަން ޑޮލަރު) އަށް އަރައިފި އެވެ.
ރޭ ދަންވަރު ނިމުނު އާ ސީޒަންގެ ޓްރާންސްފާ ފާހަގަކުރެވުނީ ބޮޑު އަގުގައި ގިނަ ކުޅުންތެރިންތަކެއް ކުލަބު ބަދަލުކުރި ސީޒަނަކަށެވެ. އެ ގޮތުން ޕްރިމިއާ ލީގުގެ 20 ކުލަބުން ވަނީ މިދިޔަ އަހަރުގެ ހޫނު މޫސުމުގެ ޓްރާންސްފާ އަށް ވުރެ 440 މިލިއަން ޕައުންޑް (558 މިލިއަން ޑޮލަރު) އިތުރަށް ހޭދަކޮށްފަ އެވެ. މިދިޔަ ސީޒަނުގެ ޓްރާންސްފާގައި 1.92 ބިލިއަން ޕައުންޑް (2.3 މިލިއަން ޑޮލަރު) ކުލަބުތަކުން ހޭދަކުރި އެވެ.
މި އަހަރުގެ ސީޒަނަށް ކުލަބުތަކުން ހޭދަކުރި އަދަދަކީ ހޫނު މޫސުމުގެ ޓްރާންސްފާއެއްގައި ހޭދަކުރި އެންމެ ބޮޑު އަދަދެވެ. ނަމަވެސް އެއް ޓްރާންސްފާގައި އެންމެ ބޮޑު ހޭދައެއް ޕްރިމިއާ ލީގުގެ ކުލަބުތަކުން ހޭދަކުރީ މިދިޔަ ޖެނުއަރީ މަހުގަ އެވެ. "މިޑް-ސީޒަން" ޓްރާންސްފާގައި ޕްރިމިއާ ލީގުގެ ކުލަބުތަކުން 2.73 ބިލިއަން ޕައުންޑް ހޭދަކުރި އެވެ.
ޔޫރަޕްގެ ބޮޑު ފަސް ލީގުން ކުޅުންތެރިންނަށް ހޭދަކުރި އަދަދުގެ 48 ޕަސެންޓަކީ އިނގިރޭސި ޕްރިމިއާ ލީގުން އެކަނި ކުރި ހޭދައެވެ.
ޕްރިމިއާ ލީގުގެ ކުލަބުތަކުން 50 މިލިއަން ޕައުންޑަށްވުރެ މަތިން 13 ކުޅުންތެރިއަކަށް ހޭދަކުރި އެވެ. އޭގެ ތެރޭގައި 100 މިލިއަން ޕައުންޑަށްވުރެ މަތިން ހޭދަކުރި ދެ ކުޅުންތެރިއަކުވެސް ހިމެނެ އެވެ.
ޕްރިމިއާ ލީގުގެ ކުލަބަކުން އެންމެ ބޮޑު ހޭދައެއް ކުރި ކުޅުންތެރިއަކީ ބްރައިޓަން ހޯވް އެލްބިއަންއަށް ކުޅުނު މޮއިސެސް ކައިސޭޑޯ އެވެ. ކައިސޭޑޯ ގަތުމަށް ޗެލްސީން ވަނީ އިނގިރޭސި ރެކޯޑު ފީއެއްކަމަށްވާ 115 މިލިއަން ޕައުންޑް ހޭދަކޮށްފަ އެވެ.
ދެން 100 މިލިއަނަށްވުރެ ބޮޑު ހޭދައެއްކޮށްގެން ގަތީ ވެސްޓްހަމް ޔުނައިޓެޑަށް ކުޅުނު މިޑްފިލްޑަރު ޑެކްލަން ރައިސް އަށެވެ. ރައިސް އަށް އާސެނަލުން ވަނީ 105 މިލިއަން ޕައުންޑް ހޭދަކޮށްފަ އެވެ.
މި ކުޅުންތެރިންނަށްފަހު ދެން އެންމެ އަގުބޮޑުކޮށް ގަތް ކުޅުންތެރިންނަކީ 77 މިލިއަން ޕައުންޑަށް މެންޗެސްޓާ ސިޓީއިން ގަތް ޑިފެންޑަރު ޖޮސްކޯ ގްވާޑިއޯލް އާއި 72 މިލިއަން ޕައުންޑް ހޭދަކޮށްގެން މެންޗެސްޓާ ޔުނައިޓެޑުން ގަތް ފޯވާޑް ރަސްމުސް ހޮއިލަންޑެވެ.
އެހެން ލީގުތަކަށް ބަލާއިރު އެންމެ އަގުބޮޑުކޮށްގަތް ދެ ކުޅުންތެރިންނަކީ އިނގިރޭސި ގައުމީ ޓީމްގެ ދެ ކުޅުންތެރިންނެވެ. އެއީ 86.4 މިލިއަން ޕައުންޑަށް ޖަރުމަންގެ ބަޔާން މިޔުނިކުން ގަތް ފޯވާޑް ހެރީ ކޭން އާއި 88.5 މިލިއަން ޕައުންޑަށް ސްޕެއިންގެ ރެއާލް މެޑްރިޑުން ގަތް ޖޫޑް ބެލިންހަމް އެވެ.
އެއް ކުލަބަކުން އެންމެ ބޮޑު ހޭދައެއް ކުރީ ޗެލްސީއިންނެވެ. އެކުލަބުންވަނީ 10 ކުޅުންތެރިއަކަށް 380 މިލިއަން ޕައުންޑް ހޭދަކޮށްފަ އެވެ. މި އަދަދާއިއެކު މިހާތަނަށް ކުލަބަކުން އެންމެ ބޮޑު ހޭދައެއް އެއް ޓްރާންސްފާގައި ހޭދަކުރި ކުލަބަކަށް ޗެލްސީ ވަނީ ވެފަ އެވެ. މީގެ ކުރިން އެންމެ ބޮޑު ހޭދައެއް ކުރީ 2019 ވަނަ އަހަރު ރެއާލް މެޑްރިޑުންނެވެ. އެ ފަހަރު އެކުލަބުން 292 މިލިއަން ޕައުންޑް ހޭދަކުރި އެވެ.
އާ ސީޒަންގެ ޓްރާންސްފާގައި މިފަހަރު އެންމެ ބޮޑަށް ފާހަގަކޮށްލެވުނީ ސައުދީ ސުޕަ ލީގުން ކުރި ހަރަދުުތަކެވެ. ސައުދީގެ ކުލަބުތަކުން ވަނީ ޔޫރަޕްގެ ބޮޑެތި ލީގު ތަކުގައި ކުޅޭ މަޝްހޫރު ގިނަ ކުޅުންތެރިންތަކެއް އެ ލީގަށް ގެންގޮސްފަ އެވެ.
