ކޮރަޕްޝަންގެ ކުށް ސާބިތުވެ ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ މައްޗަށް އިއްވި ތިން އަހަރުގެ ޖަލު ހުކުމް ސަސްޕެންޑްކޮށްފި އެވެ.
ހުކުމް ތަންފީޒު ކުރުން ފަސްކުރި ނަމަވެސް، އިމްރާން ޖަލުން ދޫކޮށްލާނެ ކަމެއް ސާފެއް ނޫނެވެ. އިސްލާމްއާބާދް ހައި ކޯޓުން ނިންމީ މައްސަލައިގެ އިސްތިއުނާފް ކުރިއަަށްދާ އިރު ދޫކޮށްލުމަށެވެ.
އެހެން ނަމަވެސް، އެހެން މައްސަލައެއްގައި 70 އަހަރުގެ ލީޑަރު ބުދަ ދުވަހާ ހަމައަށް ބަންދުގައި ބެހެއްޓުމަށް އެހެން ކޯޓަކުން އަމުރެއް ނެރުނެވެ.
އިމްރާންގެ ވަކީލުން ވިދާޅުވީ މިދިޔަ އަހަރު ޕާލަމެންޓުން އިތުބާރު ނެތްކަަމުގެ ވޯޓު ނަގައި މަގާމުން ދުރުކުރުމަށް ފަހު އެމަނިކުފާނާ ދެކޮޅަށް 100 އަށް ވުރެ ގިނަ ދައުވާ އުފުލާފައިވާ ކަމަށެވެ.
އޭގެ ތެރޭގައި ދައުލަތުގެ ސިއްރުތައް ލީކުކުރުމާއި ހަމަނުޖެހުން ރޭވުން ފަދަ ކަންކަން ހިމެނެ އެވެ. އެ މައްސަލަތަކުގައި ހައްޔަރު ކުރުމުގެ ގިނަ އަމުރުތަކެއް ވެސް ވަނީ ނެރިފަ އެވެ.
އިމްރާން ވަނީ ހުރިހާ ތުހުމަތެއް ދޮގުކުރައްވައި އެއީ ސިޔާސީ ދައުވާތަކެއް ކަމަށް ވިދާޅުވެފަ އެވެ.
