މެޑްރިޑް (އޮގަސްޓް 29) - ސްޕެނިޝް ލަލީގާގައި ރޭ ރަށުން ބޭރުގައި ރަޔޯ ވަޔެކާނޯ އަތުން ރެކޯޑު މޮޅެއް ހޯދައިފި އެވެ.
ސްޕެނިޝް ލީގުގައި ރޭ 7-0 އިން އެތުލެޓިކޯ މެޑްރިޑް މޮޅުވި މެޗަކީ އެ ޓީމުން ލަލީގާގެ މެޗެއްގައި ރަށުން ބޭރުގައި އެންމެ ބޮޑު ތަފާތަކުން މޮޅުވި ނަތީޖާ އެވެ. އަނެއްކޮޅުން މިއީ 2000 ވަނަ އަހަރުން ފެށިގެން އެޓީމުން ލަލީގާގެ މެޗެއްގައި ހަތް ގޯލު ޖެހި ދެވަނަ ފަހަރެވެ. މީގެ ކުރިން 2013 ގައި އަމިއްލަ ދަނޑުގައި ގެޓާފޭ ކޮޅަށް އެތުލެޓިކޯ އިން 7 ގޯލު ޖެހި އެވެ.
މި މެޗުގައި އެތުލެޓިކޯ މެޑްރިޑުން ޖެހި ހަތް ގޯލުގެ ތެރެއިން ދެ ގޯލު ޖަހައިދިނީ އަލްވާރޯ މޮރާޓާ އެވެ. އަނެއް ފަސް ގޯލު ޖަހައިދިނީ އޮންޓުއާން ގްރީޒްމަން، މެމްފިސް ޑިޕާއީ، ގެބްރިއެލް މޮލީނާ، އެންޖެލް ކޮރެއާ އަދި މާކޯސް ލޮރެންޓޭ އެވެ.
ރޭގެ މެޗަށް ފަހު އެތުލެޓިކޯ މެޑްރިޑްގެ ކޯޗު ޑިއޭގޯ ސިމިއޯނީ ބުނީ މޮޅަށް ކުޅެ ބޮޑުތަފާތަކުން މޮޅުވުމުން ހިތްހަމަޖެހިއްޖެ ކަމަށާއި، ހަމައެކަނި ނުތަނަވަސްކަމަކީ ފޯވާޑް ދިޕާއީއަށް އަނިޔާވުންކަމަށެވެ.
މެޗުގެ 35 ވަނަ މިނެޓުގައި ދިޕާއީއަށް އަނިޔާވެ އޭނާގެ ބަދަލުގައި ކުޅެން ނިކުތީ މޮރާޓާ އެވެ.
މިހާތަނަށް ލަލީގާގައި ކޮންމެ ޓީމަކުން ތިން މެޗު ކުޅެފައިވާއިރު، އެއްވަނައިގައި އޮތީ ތިން މެޗުންވެސް މޮޅުވެފައިވާ ރެއާލް މެޑްރިޑެވެ. ދެވަނަގައި ހަތް ޕޮއިންޓާއިއެކު އެތުލެޓިކޯ އޮތީ ދެން އޮތް ދެ ޓީމަށްވުރެ ފައިދާ ގޯލު ގިނަވުމުންނެވެ. ތިން ވަނަގައި އޮތީ ގިރޯނާ އެވެ. އެންމެ ފަހުގެ ޗެމްޕިއަން ބާސެލޯނާ އޮތީ ހަތަރުވަނައިގަ އެވެ.
އެތުލެޓިކޯ މެޑްރިޑަށް ލީގުގައި ކުރިއަށް ދެން އޮތީ ވަރުގަދަ ތިން މެޗެވެ. މިގޮތުން އަންނަ ހަފްތާގައި ސެވިއްޔާއާ ދެކޮޅަށް ކުޅޭއިރު އޭގެ ފަހުން ވެލެންސިއާއާ ވާދަކުރާނެ އެވެ. ވާދަވެރި ރެއާލް މެޑްރިޑާ ދެކޮޅަށް އެޓީމް ނުކުންނާނީ މި މަހުގެ 24ގަ އެވެ.
