ޕާކިސްތާނުގެ އަސްކަރިއްޔާއަށް ފާޑުކީ ގާނޫނީ ވަކީލެއް ކަފާލާތުގެ ދަށުން ބަންދުން ދޫކޮށްލިތާ ގަޑިއިރުތަކެއްގެ ތެރޭގައި ދެ ވަނަ ފަހަރަށް ހައްޔަރުކޮށްފި އެވެ.
އިމާން މަޒަރީ ހާޒިރް އެންމެ ފުރަތަމަ ހައްޔަރު ކުރީ މީގެ ހަފުތާއެއް ކުރިންނެވެ. ހޯމަ ދުވަހު ދޫކޮށްލިތާ މާ ގިނައިރުތަކެއް ނުވެ ދެ ވަނަ ފަހަރަށް ޓެރަރިޒަމްގެ ތުހުމަަތުގައި ހައްޔަރު ކުރި އެވެ.
މިދިޔަ މޭ ބޭއްވި މުޒާހަރާގެ ތެރެއިން ސިފައިންގެ ބައެއް ތަންތަނަށް ގެއްލުން ދިން ފަހުން، ސިފައިންނަށް ފާޑުކިޔާ ފަރާތްތަކާ މެދު ހަރުކަށި ފިޔަވަޅުތައް ދަނީ އަޅަމުންނެވެ.
ދެ ވަނަ ފަހަރަށް ޓެރަރިޒަމްގެ ތުހުމަތުކޮށް އިމާން ހައްޔަރު ކުރި ނަމަވެސް އެއްވެސް ތަފުސީލެއް ނޭނގެ އެވެ. އޭނާގެ ވަކީލު ޒައިނަބް ޖަނޫޖާއަށް ވެސް އެއްވެސް އެއްޗެއް އަންގާފައެއް ނުވެ އެވެ.
ޕާކިސްތާނުގެ ކުރީގެ ބޮޑު ވަޒީރު އިމްރާން ހާންގެ ޕާކިސްތާން ތެހްރީކޭ އިންސާފް (ޕީޓީއައި) ޕާޓީގެ ގިނަ މެމްބަރުންނަށް ވެސް ދަނީ އަމާޒުކުރަމުންނެވެ.
އެގޮތުން އެކި ތުހުމަތުތަކުގައި ހައްޔަރުކޮށް ކަފާލާތުގެ ދަށުން ދޫކޮށްލުމާ އެކު އަަނެއްކާވެސް އާ ތުހުމަތުތަކެއްކޮށް ތަކުރާރުކޮށް ދަނީ ހައްޔަރު ކުރަމުންނެވެ.
އިމާން އެންމެ ފުރަތަމަ ހައްޔަރު ކުރީ ޕަޝްތުން ތަހަފޫޒް މޫވްމަންޓް (ޕީޓީއެމް) އިން އޯގަސްޓް 18 ވަނަ ދުވަހު ބޭއްވި އެއްވުމެއްގެ ތެރެއިން ސިފައިނަށް ފާޑުކިޔާ މަންޒަރު ފެންނަ ވީޑިއޯއެއް އާއްމުވުމުންނެވެ.
މީހުން ރަހީނުކުރުމުގެ ފަހަތުގައި ވަނީ ސިފައިން ކަމަށް އޭނާ ތުހުމަތު ކުރި އެވެ. އެކަމަކު އެއީ ސިފައިން ދޮގުކުރާ ތުހުމަތެކެވެ.
އޭނާގެ މަންމަ ޝީރީން މަޒަރީއަކީ އިމްރާން ހާންގެ ސަރުކާރުގައި އިންސާނީ ހައްގުތަކާ ބެހޭ މިނިސްޓަރެވެ. ޝީރީން ބުނީ ފުލުހުން އައިސް ގަދަކަމުން ގެޔަށް ވަދެގަނެ ދަރިފުޅު ގެންދިޔައީ ކަމަށެވެ.
