ޖައުސާ ކޮންސްޓްރަކްޝަންގެ މަސްލަހަތު އޮންނަ ރިއަލް އެސްޓޭޓް ކުންފުނި، ޖާހް ކޮންސްޓްރަކްޝަންސްގެ ފަރާތުން ހުޅުމާލޭގައި އަޅަމުން އަންނަ "ދަ ގާޑަންސް"ގެ މަސައްކަތް އަންނަ އަހަރުގެ ޖެނުއަރީ މަހަށް ނިންމާލަން އަމާޒު ހިފާފައިވާ ކަމަށް އާބަންކޯ އިން ބުނެފި އެވެ.
އާބަންކޯ އިން މިއަދު ބުނީ ޖާހް ކޮންސްޓްރަކްޝަންގެ ފަރާތުން ތަރައްގީ ކުރަމުންދާ ހައުސިން ޔުނިޓްތައް ނުނިމި ގިނަ ދުވަސްތަކެއް ވެފައިވާއިރު، އެކުންފުނިން ފުލެޓްތައް ގަނެފައިވާ ފަރާތްތަކަށް ވަމުންދާ ގެއްލުންތައް ކުޑަކޮށް ވީހާވެސް އަވަހަކަށް މަސައްކަތް ނިންމުމަށް ޖާހް އާއި މަޝްވަރާކުރަމުންދާ ކަމަށެވެ.
އަދި, އެ ކޯޕަރޭޝަނުގެ އަމާޒަކީ އެ މަސައްކަތުގައި މިހާރު ވެވިފައިވާ އެއްބަސްވުންތަކާއި ޑިވެލޮޕަރުގެ ފަރާތުން ފުލެޓްތައް ގަނެފައިވާ ފަރާތްތަކާއި ދެމެދު ވެފައިވާ މުއާމަލާތްތައް ބަލައި ދެ ފަރާތައްވެސް ގެއްލުން ނުވާނެހެން، އަންނަ އަހަރުގެ ޖެނުއަރީ މަހަށް މަސައްކަތް ނިންމާލުން ކަމަށްވެސް ބުންޏެވެ.
ލަގްޒަރީ ފްލެޓް އަޅައި ވިއްކުމުގެ ޕްރޮޖެކްޓެއް ހޯދުމަށް ފަހު، ޖާހް އިންވެސްޓްމެންޓުން ވަނީ އެޕާޓްމެންޓްތަކެއްގެ އަގު، އެތަންތަން ގަންނަ ފަރާތްތަކުގެ އަތުން ހޯދައިފަ އެވެ. އެހެން ނަމަވެސް އެތަންތަން ނުނިމި ދިގުލައިގެން ދިއުމުން، ޖާހް ކުންފުނިން ދިވެހި ރައްޔިތުންގެ ފައިސާއަށް ހިޔާނާތްތެރިވެފައިވާ ކަމަށް ބުނެ ފުލުހުންނަށް ބަޔަކު މައްސަލަ ވެސް ހުށަހެޅި އެވެ.
ދެ އަހަރު ތެރޭ ނިންމާގޮތަށް 2017 ވަނަ އަހަރު ޖާހް އާއި ހަވާލުކުރި އެ މަޝްރޫއުގެ މަސައްކަތް ނުނިމި ފަސް އަހަރުވެފައިވާއިރު މަސައްކަތް ނިންމަން އާބަންކޯއިން ހަތަރު ފަަހަރެއްގެ މަތިން މުއްދަތު ވެސް އިތުރުކޮށްދިނެވެ. އެންމެ ފަހުން މިދިޔަ ޖުލައި މަހު އާބަންކޯއިން ވަނީ އެ މަޝްރޫއުގެ ބާކީހުރި މަސައްކަތް ނިންމުމާ ހަވާލުވެފަ އެވެ.
ޖާހްގެ ފްލެޓުތަކުގެ މަސައްކަތް އަވަސްކުރުމުގެ ގޮތުން އާބަންކޯ އިން ކުރާ މަސައްކަތުގެ ތެރެއިން އިންޑިޕެންޑަންޓް ކޮންސަލްޓަންޓެއް ހޯދުމަށް ނިންމާފައިވާކަން ވެސް އެ ކޯޕަރޭޝަނުން މިއަދު ވަނީ ހާމަކޮށްފަ އެވެ.
އާބަންކޯ އިން ބުނީ އިންޑިޕެންޑެންޓް ކޮންސަލްޓަންޓެއް ހަމަޖެއްސުމުގެ އެންމެ ބޮޑު އެއް ބޭނުމަކީ ވީހާވެސް ހާމަކަން ބޮޑު ގޮތެއްގައި، ދަ ގާޑަންސް އިން އެޕާޓްމަންޓްތައް ގަނެފައިވާ ކަސްޓަމަރުންނަށް ވެސް ގެއްލުން ކުޑަކޮށް، ޕްރޮޖެކްޓް ނިންމުން ކަމަށެވެ. އަދި, އިންޑިޕެންޑަންޓް ކޮންސަލްޓަންޓްގެ މަސްއޫލިއްޔަތުތަކުގެ ތެރޭގައި ޕްރޮޖެކްޓްގެ ނުނިމި ހުރި މަސައްކަތް އަގުކޮށް، އެ މަސައްކަތް ކުރާނެ ގޮތެއް ކަނޑައެޅުން ހިމެނެއެވެ.
އާބަންކޯއިން ބުނީ މި ހޯދުންތަކަށް ބިނާކޮށް ކޮންސަލްޓަންޓް ދެއްވާ ލަފާގެ މަތިން އާ ކޮންޓްރަކްޓަރަކާއި މަސައްކަތް ހަވާލު ކުރެވޭނެ ކަމަށެވެ.
އަދި މި މަސައްކަތް ކުރަމުން ދާއިރު، ދަ ގާޑަންސްގެ ކަސްޓަމަރުންނަށް ލިބިފައިވާ ގެއްލުމުގެ ބަދަލު ހޯދުމުގެ މަސައްކަތް ކުރެވޭނެ ކަމަށާއި ބަދަލު ދިނުމުގެ ޒިންމާ ނަގާނީ ޖާހް އިންވެސްޓްމަންޓުން ކަމަށްވެސް ބުންޏެވެ.
