ސަރުކާރުން ހިންގާ 'ބިންވެރިޔާ' ސްކީމުގެ ދަށުން ގޯތި ލިބިނު ފަރާތްތަކުގެ ގޯތީގެ އިންވަކިކޮށް، ކަނޑަޖަހައި ރަޖިސްޓްރީ ހަވާލުކުރަން އިއްޔެ ފެށި އެވެ،

ޕްލޭނިން މިނިސްޓްރީގެ ސްޓޭޓު މިނިސްޓަރު އަކްރަމް ކަމާލުއްދީން ވިދާޅުވީ ގޯތި ދެނީ ނުހިއްކާ އޮތް ތަންތަނުން ކަމަށް ބައެއް ފަރާތްތަކުން ބުނި ނަމަވެސް ސަރުކާރުން ގޯތީގެ ރަޖިސްޓްރީ ހަވާލުކުރާނީ ބިން ކަނޑައިދީފައި ކަމަށެވެ.

"އަޅުގަނޑުމެން ރަޖިސްޓްރީ ހަވާލުކުރާނީ ބިން ކަނޑައިދީފައި. އެހެންވީމާ މިގޮތުން މި ފެށުނީ މިއަދު މި މަސައްކަތް. ކޮންމެ ދުވަހަކުވެސް ބިން ކަނޑަމުން ދާނީ. ގުޅީފަޅުންވެސް، ގިރާވަރުންވެސް ކެނޑެމުން ދާނެ," އަކްރަމް ވިދާޅުވި އެވެ.

ކުރީ ސަރުކާރުން ނުވެސް ހިއްކާ ތަންތަނުން ގޯތި ދީ ރަޖިސްޓްރީ ދިންކަމަށް ބުނެ ފާޑުވިދާޅުވަމުން އަކްރަމް ވިދާޅުވީ މި ސަރުކާރުން ގޯތި ކެނޑުމަށްފަހު ދޭ ރަޖިސްޓްރީއަކީ ގާނޫނީ ގޮތުން ސައްހަ ރަޖިސްޓްރީއެއް ކަމަށާއި އެ ރަޖިސްޓްރީއާ މެދު އިތުރު ސުވާލެއް ނުއުފެދޭނެ ކަމަށެވެ. އަދި ގޯތި ރަޖިސްޓްރީ ކުރުމުގެ މަސައްކަތްތައް ކުރަމުން ދާނީ ގާނޫނީ ވަކީލުން ކަމަށާއި ގޯތި ދޫކުރާނީ ގާނޫނީ ގޮތުން ފުރިހަމަކުރަން ޖެހޭ ހުރިހާ ކަމެއް ފުރިހަމަ ކުރުމަށް ފަހުގައި ކަމަށްވެސް އަކްރަމް ވިދާޅުވި އެވެ.

"އަޅުގަނޑުމެން މި ރަޖިސްޓްރީ ކޮށްދެމުން މި ދަނީ އެގްރިމަންޓާ، އެޔާ ނޮޓޮރައިޒްކުރައްވަނީ ގާނޫނީ ވަކީލުން. އެހެންވީމާ މިއީ އެއްވެސް އޮޅުމެއް އޮތް ކަމެއް ނޫން. ކުރީގަ އެބަހުރި ކަނޑުފަޅުން ގޯތި ދޫކޮށްފަ އޭގެ ލިޔުންތައް އަޅުގަނޑުމެންނަށް ލިބެމުންދޭ," އަކްރަމް ވިދާޅުވި އެވެ.

ބިންވެރިޔާ ސްކީމުން ގޯތި ލިބުނު ފަރާތެއްގެ ނަމުގައި 600 އަކަފޫޓަށްވުރެ ކުޑަ ބިމެއް އޮވެއްޖެ ނަމަ ބިން ދޫކޮށްލަންޖެހޭއިރު އަކްރަމް ވިދާޅުވީ ކުރިން ލިބިފައިވާ ބިން ވަގުތުން ވަގުތަށް ދޫކޮށްލަން ނުޖެހޭނެ ކަމަށެވެ. އަދި އެ ބިން ދޫކޮށްލުމުގެ ކަންތައް ކޯޓަށް ހުށަހަޅައި ނިންމަން ތިން މަސް ލިބޭނެ ކަމަށާއި ބިން އެއްކޮށް ދޫކޮށްލުމަށް ދެ އަހަރު ދުވަހުގެ މުއްދަތެއް ލިބޭނެ ކަމަށް ވެސް ވިދާޅުވި އެވެ.

ބިންވެރިޔާ ސްކީމުގެ ދަށުން ގޯއްޗަށް އެދި ހުށަހެޅި 97 ޕަސެންޓު މީހުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެއީ 18،955 މީހުންނަށް 9003 ގޯއްޗެވެ.

ގޯތި ދެނީ ހުޅުމާލެއާއިި ގުޅީފަޅާއި ގިރާވަރުފަޅުންނެވެ. ގެދޮރުވެރިޔާ ސްކީމުން ހުޅުމާލޭން 1351 ގޯތި، ގުޅިފަޅުން 2219 އަދި ގިރާވަރު ފަޅު ހިއްކައިގެން 5433 ދިނުމަށް ނިންމާފައި ވެއެވެ.

މުހިންމު ބައެއް ހަބަރު

ދުވަހުގެ ކޯޓޭޝަން

އެމްޑީޕީ ދޫކޮށް ދަ ޑިމޮކްރެޓްސްއަށް ދިޔަ މެމްބަރުންނަށް ރައީސް އިބްރާހިމް މުހައްމަދު ސޯލިހު އިއްޔެ ވިދާޅުވީ؛

އަބަދުވެސް އެމްޑީޕީގަ އެބޭފުޅުންނަށް ޖާގަ އޮންނާނެ، ކުރީ ގޮނޑިބަރިން ޖާގަ އޮންނާނެ އެއީ ހިދުމަތް ކުރެއްވި ބޭފުޅުން.. އަޅުގަނޑު ދަންނަވާނީ ވަޑައިގަންނަވާށޭ، އަޅުގަނޑުމެންނާ އެކީގައޭ މުސްތަގުބަލު އޮތީ