ލަންޑަން (އޮގަސްޓް 27) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑުން ފަަހަތުން އަރައި 3-2 އިން ނޮޓިންހަމް ފޮރެސްޓް ބަލިކުރިއިރު، އަމިއްލަ ދަނޑުގައި ކުޅުނު އާސެނަލާއި ފުލަމްއާ 2-2 އިން އެއްވަރުވެއްޖެ އެވެ.
ނޮޓިންހަމް ފޮރެސްޓުން ވަނީ ޔުނައިޓެޑް ދަނޑުގައި ކުޅުނު މެޗުގެ ހަަތަރު މިނިޓް ތެރޭ ދެ ގޯލު ޖަހައިފަ އެވެ. އެ ގޮތުން ފުރަތަމަ ގޯލު ދެ ވަނަ މިނިޓްގައި ޓައީވޯ އަވޮނިޔީ ޖެހިއިރު، އޭގެ ދެ މިނިޓް ފަހުން ދެ ވަނަ ގޯލު ޖެހީ ވިލީ ބޮލީ އެވެ. މިއީ ޕްރިމިއާ ލީގުގެ ތާރީހުގައި ވެސް ޔުނައިޓެޑް މިހާ އަަވަހަށް ދެ ގޯލު ފަހަތަށް ދިޔަ ފުރަތަމަ ފަހަރެވެ.
މެޗުގެ 17 ވަނަ މިނިޓްގައި މާކަސް ރަޝްފޯޑް ނަގައިިދން ހުރަހަކަށް އަރައި ކްރިސްޓިއަން އެރިކްސަން ވަނީ ޔުނައިޓެޑްގެ ފުރަތަމަ ގޯލު ޖަހައިފަ އެވެ. ފުރަތަމަ ހާފުގައި ޔުނައިޓެޑަށް އެއްވަރުކޮށްދޭން ކަސެމީރޯ އަށް ލިބުނު ފުރުސަތު ނަގާލިި ނަމަވެސް ދެ ވަަނަ ހާފުގެ ކުޅުން ފެށިގެން ހަތް މިނިޓް ތެރޭ ބްރޫނޯ ފެނާންޑޭސް ދިން ބޯޅައަކުން ގޯލު ޖަހައި، ކަސެމީރޯ ވަނީ ޔުނައިޓެޑަށް އެއްވަރުކޮށްދީފަ އެވެ.
ނޮޓިންހަމް އަށް މައްސަލަ ދިމާވީ މެޗުގެ 67 ވަނަ މިނިޓްގައި އެ ޓީމުގެ ޖޯ ވޮރާލް އަށް ރަތް ކާޑެއް ދެއްކުމުންނެވެ. ނޮޓިންހަމްގެ ކުޅުންތެރިއަކު މަދުވިތާ ނުވަ ވަރަކަށް މިނިޓް ފަހުން މެޗުގެ 76 ވަނަ މިނިޓްގައި ޔުނައިޓެޑް މޮޅުކޮށްދިން ގޯލު ޖެހީ ޕެނަލްޓީ އަކުން ބްރޫނޯ ފެނާންޑޭސް އެވެ. މިއީ ރަޝްފޯޑަށް އޭރިއާތެރެއިން ޑަނީލޯ ކުރި ފައުލަކަށް ދިން ޕެނަލްޓީ އެކެވެ.
އާސެނަލް ދަނޑުގައި 57 ސިކުންތު ތެރޭގައި ގޯލު ޖަހައި އަންދްރެެއަސް ޕެރެއިރާ ވަނީ ފުލަމް އަށް ލީޑުނަގައިދީފަ އެވެ. އާސެނަލުން އެއްވަރުކުރީ މެޗުގެ 70 ވަަނަ މިނިޓްގައި ބުކާޔޯ ސަކާ ޖެހި ޕެނަލްޓީންނެވެ. މިއީ، އާސެނަލްގެ ފަބިއޯ ވިއޭރާ އަށް އޭރިއާތެރެއިން ފުލަމްގެ ކެނީ ޓެޓޭ ކުރި ފައުލަކަށް ދިން ޕެނަލްޓީ އެކެވެ. ފަބިއޯ ވިއޭރާ ދިން ބޯޅައަކުން މެޗުގެ 72 ވަނަ މިނިޓްގައި އެޑީ އެންކެޓިއާ އާސެނަލަަށް ލީޑުނަގައިދިނެވެ.
މެޗުގެ 83 ވަަނަ މިނިޓްގައި ފުލަމްގެ ބޭސީ އަށް ރަތް ކާޑެއް ދެއްކި ނަމަވެސް އެ ޓީމުން ފަހަތަށް ނުޖެހި އެޓޭކަށް ވިސްނައިގެން ކުޅެ ނަތީޖާ ހަމަހަަމަކުރި އެވެ. ފުލަމް އަށް އެއްވަރުކޮށްދިން ގޯލު ޖެހީ މެޗުގެ 87 ވަނަ މިނިޓްގައި ޖޮއާއޯ ޕަލީނިއާ އެވެ.
ލީގުގައި ރޭ ޓޮޓެންހަމް ހޮޓްސްޕާސް އިން ވަނީ 2-0 އިން ބޯންމައުތު ބަލިކޮށްފަ އެވެ. ބްރައިޓަން ދަނޑުގައި ވެސްޓް ހޭމް ޔުނައިޓެޑުން ވަނީ 3-1 އިން ބޮޑު މޮޅެއް ހޯދައިފަ އެވެ.
