ހަތް އަހަރުގެ މުސްލިމް ކުއްޖެއްގެ ގައިގައި ޖެހުމަށް ދަރިވަރުންނަށް އެންގި މައްސަލައިގައި އިންޑިއާ ސްކޫލް ޓީޗަރެއްގެ މައްސަލަ ފުލުހުން ބަލަން ފަށައިފި އެވެ.
ފުލުހުން ތަހުގީގު ފެށީ އެ މަންޒަރު ފެންނަ ވީޑިއޯއެއް އާއްމުވުމާ ގުޅިގެންނެވެ. ދަރިވަރުން ލައްވާ މުސްލިމް ކުއްޖާގެ ގައިގައި ޖަހުވަނީ ހިސާބު ފިޅާވަޅު ގޯސްވުމުންނެވެ.
ސޯޝަލް މީޑިއާގައި ބޮޑު ސަމާލުކަމެއް ލިބުނު އެ ވީޑިއޯއާ ގުޅިގެން ގިނަ ބަޔަކު ވަނީ ނުރުހުން ފާޅުކޮށްފަ އެވެ. އިންޑިއާގެ އިދިކޮޅު ލީޑަރު ރާހުލް ގާންދީ ވިދާޅުވީ ދީނީ ތަފާތު ކުރުމާއި ނަފުރަތަށް ހިތްވަރު ދެނީ ސަރުކާރުން ކަމަށެވެ.
އެ ހާދިސާ ހިނގީ މިދިޔަ ބުރާސްފަަތި ދުވަހު އުއްތަރް ޕްރަދޭޝް ސްޓޭޓުގެ ސްކޫލެއްގަ އެވެ. އެއީ ސައްހަަ ވީޑިއޯއެއް ކަމަށް އިންޑިއާގެ އިދާރާތަކުން ބުނެފައިވެ އެވެ. އަދި އެކަމުގައި ފިޔަވަޅު އަޅާނެ ކަމަށް ވެސް ބުންޏެވެ.
މުސްލިމް ދަރިވަަރުގެ ބައްޕަ ވަނީ ފުލުހުންނަށް މައްސަލަ ރިޕޯޓުކޮށް، ކުއްޖާ ސްކޫލުން ކަނޑާލައިފަ އެވެ.
