ޕާކިސްތާނުގެ ހައިބަރް ޕަހްތުންހްވާ ޕްރޮވިންސްގައި ދަތުރު ކުރަމުން ދަނިކޮށް ހުއްޓުނު ކޭބަލް ކާރުގެ ވެރިޔާ ހައްޔަރުކޮށްފި އެވެ.
ކޭބަލް ކާރު ހުއްޓުނު އިރު، ގިނަ ކުޑަކުދިން ހިމެނޭހެން އޭގައި އަށް މީހުން ތިއްބެވެ. އެ މީހުން ސަލާމަތް ކުރަން 12 ގަޑިއިރަށް ވުރެ ގިނަ ވަގުތު ހޭދަވި ބޮޑު އޮޕަރޭޝަނެއް ހިންގި އެވެ.
ކޭބަލް ކާރުގެ ވެރިޔާ ގުލް ޒަރީން ހައްޔަރު ކުރީ އިހުމާލުވުމާއި ބައެއްގެ ފުރާނަ ނުރައްކަލަށް ހުށަހެޅުން ފަދަ ގިނަ ކުށްތަކެއްގެ ތުހުމަތުގަ އެވެ.
ކޭބަލް ކާރުން އެއް ކުއްޖަކު ސަލާމަތް ކުރީ ހެލިކޮޕްޓަރުގެ އެހީގަ އެވެ. ބާކީ ތިބި ކުދިން ސަލާމަތް ކުރީ ރޭގަނޑު އަނދިރިވި ފަހުން ޒިޕްލައިން ތަޖުރިބާކާރުންގެ މަސައްކަތުންނެވެ.
ސްކޫލަށް ދަތުރު ކުރަނިކޮށް ކޭބަލް ކާރުގައި ކުދިންތައް ތާށިވީ އޭގެ ދެ ކޭބަލް ބުރިވެގެންނެވެ. އެ ކާރު އޮތީ ބިމުގެ 900 ފޫޓު މަތިން އެލިފަ އެވެ.
އޭގައި ތިބީ އުމުރުން 10 އަހަރާއި 16 އަހަރާ ދެމެދުގެ ހަ ކުދިންނާއި ބޮޑު ދެ މީހުންނެވެ. އެއީ ޖަންގްރީ އަވަށާއި ސްކޫލް ހުންނަ ބަތަންގީ އަވަށް ގުޅާލަ ދޭ ކޭބަލް ކާރެކެވެ.
ޕާކިސްތާނުގެ ފަރުބަދަ މަތީ އެ ސަރަހައްދުގައި އަވަހަށް ތަންތަނަށް ދިޔުމަށް ބޭނުންކުރާ އަގުހެޔޮ ވަސީލަތަކީ ކޭބަލް ކާރެވެ. ފަރުބަދަތަކުގެ ތެރެއިން ސްކޫލަށް ދާން ދެ ގަޑިއިރު ހޭދަވާ އިރު، ކޭބަލް ކާރުގެ އެހީގައި އެންމެ ހަތަރު މިނެޓުން ސްކޫލަށް ދެވެ އެވެ.
އެ ހާދިސާއާ ގުޅިގެން ވަގުތީ ބޮޑު ވަޒީރު އަންވާރުލް ހައްގު އެންގެވީ ޕްރައިވެޓް ފަރާތްތަކުން ހިންގާ ހުރިހާ ކޭބަލް ކާރެއްގެ ރައްކާތެރިކަން ކަށަވަރު ކުރުމުގެ އިންސްޕެކްޝަން ހިންގުމަށެވެ.
