ޕާކިސްތާނުގެ އިރުމަތީ ސިޓީއެއްގައި ނަސާރާ ދީނުގެ މީހުން އުޅޭ ގެތަކާއި ފައޅިތަކުގައި ހުޅުޖެހި މައްސަލައިގައި 100 އަށް ވުރެ ގިނަ މީހުން ހައްޔަރުކޮށްފި އެވެ.
ޖާރަންވާލާގައި ހަމަނުޖެހުން އުފެދުނީ ގުރުއާންގެ ސަފުހާތަކެއް އެންދި ކަމަށް ބުނެ އަޑު ފެތުރުމުންނެވެ. އެކަމުގެ ތުހުމަތު ކުރެވެނީ ނަސާރާ ދީނުގެ ދެ ފިރިހެނުންނަށެވެ.
ހަމަނުޖެހުމުގައި ބޮޑު ގެއްލުންތަކެއް ލިބުނު އިރު، ތާރީހީ "ސެލްވޭޝަން އާމީ" ފައްޅީގައި ވެސް ބުރާސްފަތި ދުވަހު ހުޅުޖެހި އެވެ.
ޖާރަންވާލާ ހިމެނޭ ފައިސަލްއާބާދް ޑިސްޓްރިކްޓުގައި ކުރިއަށް އޮތް ހަތް ދުވަހު އާއްމުން ތަންތަނަށް އެއްވެ އުޅުން ވަނީ މަނާކޮށްފަ އެވެ.
ގުރުއާންގައި ރޯކުރި ކަމަށް ތުހުމަތު ކުރެވޭ ދެ ފިރިހެނުން ހައްޔަރުކޮށް ތަހުގީގު ފަށާފައިވާ އިރު، އެއީ މަރުގެ ހުކުމް އަންނަ ފަދަ ކުށެކެވެ.
އިސްލާމްދީނާއި ކީރިތި ރަސޫލާއަށް ފުރައްސާރަ ކުރާ މައްސަލަތައް ޕާކިސްތާނުގައި ވަރަށް ހޫނުވެ އެވެ. އެފަދަ މައްސަލަތަކުގައި އާއްމުން ނިކުމެ މީހުން ވެސް މަރާފައިވެ އެވެ.
