މާލެ ރައްޔިތުންނަށް ގޯތި ދިނުމަށް ބިން ހިއްކަން ފަށަން ތައްުޔާރުވުމުގެ ގޮތުން ހުޅުމާލެ ދެވަނަ ފިޔަވަހީގެ ފަޅުތެރޭގައި އަޅާފައި ހުރި އުޅަނދުތައް ހުސްކުރަން އަންގައިފި އެވެ.
ހުޅުމާލެ ބަލަހައްޓާ އާބަންކޯ އިން މިއަދު ކުރި އިއުލާނެއްގައި ބުނީ އެ ކޯޕަރޭޝަނުން ހުޅުމާލެ ދެ ވަނަ ފިޔަވަހީގެ ފަޅުގައިން ހިންގުމަށް ހަމަޖެހިފައިވާ ޕްރޮޖެކްޓަކަށް އެ ފަޅުގައި އަޅާފައިހުރި އުޅަނދު ތަކާއި އަޑިއަށް ގޮސްފައިހުރި އުޅަނދުތައް އެ ސަރަހައްދުން ނެގުމަށް ބޭނުންވާ ކަމަށެވެ.
ދެވަނަ ފިޔަވަހީގެ ފަޅަކީ ކްރޫޒް ޓާމިނަލް ހެދުމަށް ހުޅުމާލެ މާސްޓަ ޕްލޭނުގައި ހިމަނާފައިވާ ސަރަހައްދެވެ. ނަމަވެސް ހުުޅުމާލެ މާސްޓަ ޕްލޭން ބަދަލުކޮށް އެ ފަޅު ހިއްކައިގެން މާލެ ރައްޔިތުންނަށް ގޯތި ދިނުމަށް ސަރުކާރުން ވަނީ ނިންމާފަ އެވެ. އެގޮތުން ސަރުކާރުގެ ބިންވެރިޔާ ސްކީމުގެ ދަށުން ހުުޅުމާލެއިން ދޫކުރާ ބައެއް ގޯތި ކަނޑަން ހަމަޖެހިފައިވަނީ އެ ސަރަަހައްދުންނެވެ.
ހުޅުމާލެ ދެވަނަ ފިޔަވަހީގެ ފަޅުން ހިއްކަން ޕްލޭން ކޮށްފައިވާ ސަރަހައްދު ފާހަނގަކޮށްފައި، އެ ސަރަހައްދުގައި އަޅާފައިހުރި އުޅަނދުތައް މިއަދުން ފެށިގެން 10 ދުވަސްތެރޭ ނެގުމަށް އާބަންކޯއިން ވަނީ އަންގާފައި
އާބަންކޯ އިން ބުނީ އެ ފަޅުގައި އަޅާފައި ހުރި އުޅަނދުތައް މިއަދުން ފެށިގެން އެއް ދުވަސްތެރޭ ނަގަން ޖެހޭނެ ކަމަށެވެ.
އެ މުއްދަތުގައި އުޅަނދުތައް ނުނަގައިފި ނަމަ 'ތިލަފުއްޓާއި ގުޅީފަޅުގެ ފަޅުތެރެއަށް ދޫކޮށްފައިވާ އުޅަނދުފަހަރާއި ތަކެއްޗާމެދު އަމަލުކުރާ އުސޫލު'ގެ ދަށުން އެތަކެތި އެހެން ސަރަހައްދަކަށް ބަދަލު ކުރާނެ ކަމަށާއި މިގޮތަށް ގެންދާ ގެންދިއުމުގައި އެ އުޅަނދަކަށް ލިބޭ ގެއްލުމަކަށާއި އެ އުޅަނދެއް އެ ތަނުގައި ބޭއްވުމުގެ ސަބަބުން ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށްވެސް އެ އިއުލާނުގައި ވަނީ ބުނެފަ އެވެ.
މާލޭގެ ރައްޔިތުންނަށް، ބަންޑާރަ ގޯތި ދޫކުރުމަށް ކުރިޔަށް ގެންދާ ބިންވެރިޔާ ސްކީމުގެ ދަށުން ޖުމްލަ 6،200 ގޯތި ދޫކުރުމަށް ނިންމާފައިވާއިރު ހުޅުމާލެއިން 2،200 ގޯތި ދޫކުރާނެ އެވެ. އަދި ގޯތި ލިބޭ މީހުންގެ މެދުގައި ގުރުއަތު ނެގުމުގެ މަސައްކަތްވެސް ސަރުކާރުން މިހާރު ދަނީ ކުރަމުންނެވެ.
މި ސްކީމުގެ ދަށުން ބާކީ ހުރި ގޯތިތައް ދޫކުރާނީ ގުޅީފަޅާއި ގިރާވަރު ފަޅުންނެވެ. ގުޅިފަޅުން މަދުވެގެން 2000 ގޯތި ދޫކުރުމަށް ނިންމާފައިވާއިރު ގިރާވަރުފަޅުންވެސް މަދުވެގެން 2000 ގޯތި ދޫކުރުމަށް ސަރުކާރުން ވަނީ ނިންމާފަ އެވެ. އަދި ގޯތި ކެނޑުމަށް ގިރާވަރުފަޅުގެ ބޮޑުބައެއް މިހާރުވެސް ވަނީ ހިއްކާފަ އެވެ.
