ހުޅުމާލޭގެ ދެވަނަ ފިޔަވަހީގެ އެންމެ އުތުރުން ޓޫރިޒަމް އައިލެންޑްގެ ގޮތަށް ތަރައްގީކުރާ "އާބަން އައިލް"ގައި ސާވިސް އެޕާޓްމަންޓް ތަރައްގީކުރުމަށް 10 ބިމެއް ބިޑަށް ހުޅުވާލައިފި އެވެ.
އާބަންކޯ އިން ކޮށްފައިވާ އިއުލާނުގައިވާ ގޮތުން މި ރެޒިޑެންޝަލް އެޕާޓްމަންޓުތައް ތަރައްގީކުރަން ދޫކުރާ ބިންތަކަކީ 6،500-8،000 އަކަފޫޓާ ދެމެދުގެ ބިންތަކެވެ.
މި ބިންތަކުގެ އިކުއިޒިޝަން ކޮސްޓުގެ ގޮތުގައި އާބަންކޯ އިން 200،000-245،000 ޑޮލަރު އަގެއް ކަނޑައަޅާފައިވާއިރު މި ބިޑަށް ޕްރޮޕޯސަލް ހުށަހެޅުމުގެ ފުރުސަތު ބޭރުގެ އިންވެސްޓަރުންނަށްވެސް ވަނީ ހުޅުވާލާފަ އެވެ.
އާބަން އައިލް އިން ދޫކުރާ ބިންތަކުގެ ތަފްސީލް:
އާބަންކޯ އިން ބުނި ގޮތުގައި އެ ބިންތަކުގައި ހިންގާ މަޝްރޫއުގެ އަގު އުޅޭނީ 4.9 މިލިއަން ޑޮލަރު (76 މިލިއަން ރުފިޔާ) އިން ފެށިގެން 6.5 މިލިއަން ޑޮލަރު (100 މިލިއަން ރުފިޔާ) އާ ދެމެދު އެވެ. އަދި މި ބިންތަކުގައި ހަދާ އިމާރާތްތަކުގެ އުސްމިން ކަނޑައަޅާނީ ބިމުގެ ލޮކޭޝަން އަށް ބެލުމަށް ފަހުގައި ކަމަށާއި އެ އިމާރާތްތަކުގައި އެއް ކޮޓަރީގެ އެޕާޓްމަންޓުން ފެށިގެން ހަތަރު ކޮޓަރީގެ އެޕާޓްމަންޓު ހަދަން ޖެހޭ ކަމަށް އާބަންކޯއިން ކުރި އިއުލާނުގައި ވަނީ ބުނެފަ އެވެ.
އާބަން އަައިލްގެ ނަމުގައި ދެވަނަ ފިޔަވަހީގައި ތަރައްގީކުރާ ޓޫރިޒަމް ޒޯނަށް ޖުމްލަ 23 ހެކްޓަރުގެ ކަނޑައަޅާފައިވާއިރު މި ޕްރޮޖެކްޓު ވެގެންދާނީ ރާއްޖޭގެ އިގްތިސާދަށް އިންގިލާބީ ޕްރޮޖެކްޓަކަށް ކަމަށް އާބަންކޯ އިން ވަނީ ބުނެފަ އެވެ. އެގޮތުން، ސީދާ އަދި ނުސީދާ ގޮތުން ގިނަ ދާއިރާތަކަށް ފައިދާވެ ގިނަ ވަޒީފާތަކެއް އުފެދިގެން ދާނެ ކަމަށާއި މި ރަށް ވެގެންދާނީ ރާއްޖޭގެ އިގުތިސާދީ މައި ހަބު ކަމަށް އެ ކުންފުނިން ބުނެ އެވެ.
ރަސްމީ ވައިގެ ބަނދަރާއި ގުޅިފައިވާ ރަށެއް ކަމުން އާބަން އައިލް ވެެގެންދާނީ ކުރު އަދި ދިގު މުއްދަތުގެ ސްޓޭތަކަށް ވެސް އެކަށޭނަ މަންޒިލަކަށް ކަމަށާއި އާބަން އައިލް ގައި އަޅާ އެކޮމޮޑޭޝަންތަކުގެ ތެރޭގައި ލަގްޒަރީ ވިލާ، ސާވިސް އެޕާޓްމަންޓް، ސިޓީ ހޮޓެލް، މިޑްސްކޭލް އަދި އަޕްސްކޭލް ހޮޓެލް އާއި ގެސްޓް ހައުސްތަކުގެ އިތުރުން ބްރޭންޑަޑް ރީޓެއިލް އަދި މަތީ ފަންތީގެ ރެސްޓޯރަންޓްތައްވެސް ގާއިމުކުރާނެ ކަމަށް އެޗްޑީސީއިން ބުނެ އެވެ.
