ލާހޯރް، ޕާކިސްތާން (އޯގަސްޓް 15) - އަންހެނުން މަރާލި ކަމަށް ތުހުމަތު ކުރެވޭ ޕާކިސްތާނުގެ ފިރިހެނަކު ދަންވަރު ސަހަރާއަށް ވަދެ، ކަށްވަޅު ކޮންނަން އުޅެނިކޮށް ހައްޔަރުކޮށްފި އެވެ.
ލާހޯރް ސިޓީއިން ކާޒިމް ކަމާލް ހާން ހައްޔަރު ކުރީ ހޮނިހިރު ދުވަހުގެ ދަންވަރެވެ. އޭނާ ވަނީ އަންހެނުން މަރާލި ކަމަށް ފަހުން އިއުތިރާފްވެފަ އެވެ. އޭނާގެ އަންހެނުންނަކީ އެމެރިކާ ރައްޔިތެއް ކަމުގައިވާ އުމުރުން 50 އަހަރުގެ ޑަޔާނާ ކްރިސްޓޯ ހާން އެވެ.
ދަންވަރު ސަހަރާއަށް ވަދެ، ޖަނާޒާއެއް ނުބާއްވައި އަދި ކަފުންވެސް ނުކޮށް ވަޅުލާން އުޅޭ ކަމަށް ފުލުހުންނަށް ރިޕޯޓު ކުރީ ސަހަރާގެ މުވައްޒަފެކެވެ.
ކާޒިމް ކަމާލް ހާންއަކީ 2001 ވަނަ އަހަރު ދިން ސެޕްޓެމްބަރު 11 ހަމަލާތަކަށް ފަހު އެމެރިކާއިން ޑީޕޯޓުކުރި މީހެކެވެ. އޭނާގެ އަންހެނުންނާއި ދަރިފުޅު އެމެރިކާގައި މަޑުކުރީ އެވެ. އެހެންވެ، އޭނާ އާއި އާއިލާގެ ގުޅުން ކެނޑުނެވެ.
އޭނާގެ އަންހެނުން ޕާކިސްތާނަށް ގެންދިޔައީ ވަރަށް ބޮޑަށް ބަލިވެ އުޅޭ ކަމަށް ބުނެ އޮޅުވާލައިގެންނެވެ. ޑަޔާނާ ކްރިސްޓޯ ހާންގެ ހަށިގަނޑުން އަނިޔާގެ ނިޝާންތައް ފެންނަން ހުރި ކަމަށް ފުލުހުންގެ ރިޕޯޓުގައިވެ އެވެ.
އެހެން ނަމަވެސް، މަރުވި ސީދާ ސަބަބު ދެނެގަންނަން ޕޯސްޓް މޯޓަމް ހަދަން ވަނީ ނިންމައިފަ އެވެ.
