އުރީދޫ މަސްރޭހުގެ ރެކޯޑް މުގުރާލައި 1214.25 ޕޮއިންޓާ އެކު ކުޅުދުއްފުށި ސިޓީގެ ޗެމްޕިއަންކަން "ޓީމް ބުޅިކެނޑި" ހޯދައިފި އެވެ.
މިދިޔަ ހުކުރު ދުވަހު ކުޅުދުއްފުށީގައި ކުރިއަށްގެންދިޔަ އުރީދޫ މަސްރޭހުގައި 21 ޓީމަކުން ވާދަކުރި އެވެ.
ޗެމްޕިއަންކަން ޓީމް ބުޅިކެނޑި ހޯދިއިރު، ރަނަރަޕްކަން ހޯދާފާވަނީ 659.05 ޕޮއިންޓާއެކު ޓީމް ލައްޓި އިންނެވެ. 612.35 ޕޮއިންޓާ އެކު ކުޅުދުއްފުށި ސިޓީ އިން ތިން ވަނަ ކާމިޔާބުކުރީ ކުރިބިއަންސް ޓީމުންނެވެ.
މި މުބާރާތުގައި އެންމެ ބަރު މެހެއްގެ ގޮތުގައި ބާނާފައިވަނީ ބަރުމިނުގައި 25.85 ކިލޯ ގެ ހިބަރެކެވެ. އެންމެ ބަރުމަސް ބޭނި ފަރާތުގެ މަގާމު ހޯދާފައިވަނީ ޗެމްޕިއިން ޓީމުގެ ހަސަން އަލީ އެވެ.
އެންމެ ބަރު މަސް ބޭނި ފަރާތަށް މި އަހަރުގެ މަސް ރޭހުގެ ގިފްޓް ޕާޓްނަރު ސީގިއާގެ ފަރާތުން ވަނީ އަގުހުރި ގިފްޓް ޕެކެއް ހަދިޔާކޮށްފަ އެވެ.
މިއީ އުރީދޫ މަސް ރޭހުގެ ތާރީހުގައި ހިބަރެއް ބޭނި ފުރަތަމަ ފަހަރު ކަމަށް އެ ކުންފުނިން ބުނެ އެވެ. ޗެމްޕިއަން ޓީމް ބުޅިކެނޑިއިން ތިން ހިބަރު ބާނާފައިވާއިރު، ރަނަރަޕް ޓީމް، ޓީމް ލައްޓިއިން ވެސް ވަނީ ދެ ހިބަރު ބާނާފަ އެވެ.
އެންމެ މޮޅު ފިރިހެން ކެޔޮޅުގެ މަގާމު ދެވަނަ ހޯދި ލައްޓި ޓީމުގެ އާދަމް ހިލްމީ ހޯދިއިރު، އޭނާ ވަނީ 16 މަސް ބާނާފަ އެވެ. އެންމެ މޮޅު އަންހެން ކެޔޮޅަކަށް ހޮވުނީ ދަމާނަގާ ޓީމުން ހަދީޖާ މޫސާ އެވެ.
މި މުބާރާތް އައްޑޫ ސިޓީގައި އޮގަސްޓް 18، ގައި ކުރިއަށްގެންދިއުމަށް ހަމަޖެހިފައިވާއިރު، ފުވައްމުލައް ސިޓީގައި އުރީދޫ މަސްރޭސް އޮންނާނީ އޮގަސްޓް 25، ގަ އެވެ.
އުރީދޫ މޯލްޑިވްސްގެ 18 ވަނަ އަހަރީ ދުވަސް ފާހަގަކުރުމުގެ ގޮތުން މިއަހަރު މަސް ރޭސް ވަނީ އިތުރަށް ފޯރިގަދަކުރުމުގެ ގޮތުން މާލެ ސިޓީ، ކުޅުދުއްފުށި ސިޓީ، އައްޑޫ ސިޓީ އަދި ފުވައްމުލައް ސިޓީއަށް ފުޅާކޮށްފަ އެވެ.
