ކުރީގެ ރައީސް ޑރ. މުހައްމަދު ވަހީދު ހަސަންމަނިކާއި ދަރިކަލުުން ޖެފްރީ ސާލިމް ވަހީދު މިރޭ ޖުމްހޫރީ ޕާޓީއަށް ސޮއިކުރައްވައިފި އެވެ.
ވަހީދާއި ދަރިކަލުން ޖެފްރީ ޖޭޕީއަށް ސޮއިކުރެއްވީ ރިޔާސީ އިންތިހާބަށް ކެމްޕޭންކުރަން އެޕާޓީން މިރޭ އދ.މާމިނގިލީގައި ބޭއްވި ޖަލްސާއެއްގަ އެވެ. މާމިނގިއްޔަކީ ޖޭޕީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހީމްގެ ރަށެވެ.
ކުރީގެ ރައީސް ޑރ.ވަހީދުގެ ދަރިކަލުން ޖެފްރީ ޖުމްހޫރީ ޕާޓީއަށް ސޮއިކުރައްވަނީ. ފޮޓޯ:ޖޭޕީ
ސިޔާސީ މަސައްކަތުގައި އުޅުއްވާތާ އެތައް އަހަރެއް ވެފައިވާ ޑރ.ވަހީދު އަމިއްލަފުޅު ޕާޓީއެއް ވެސް ކުރިން އުފެއްދެވި އެވެ. ރާއްޖޭގައި ފުރަތަމަ ބޭއްވި މަލްޓިޕާޓީ ރިޔާސީ އިންތިހާބު 2008 ވަނަ އަހަރު ބޭއްވި އިރު އެފަހަރުގެ އިންތިހާބު ކާމިޔާބުކުރި ކޯލިޝަނުގައި އެޕާޓީ ހިމެނުނެވެ. ގުޅިފައިވާ ޕާޓީތަކުން އެފަހަރު ތާއީދު ކުރި އެމްޑީޕީގެ ކެންޑިޑޭޓްގެ ރަނިން މޭޓްގެ ހައިސިއްޔަތުން އެމަނިކުފާނަށް އެފަހަރު ނައިބުރައީސްކަން ލިބިވަޑައިގެންނެވި އެވެ.
ރައީސްކަން ލިބިވަޑައިގެންނެވީ އިދިކޮޅުން ކުރި މުޒާހަރާތަކާއި ފުލުހުން ހިންގި މިއުޓިނީއަކަށް ފަހު ރައީސްކަމުން ނަޝީދު އިސްތިއުފާ ދެއްވުމުންނެވެ.
އަމިއްލަފުޅު ޕާޓީ ހިންގެވުން ހުއްޓަވައިލައްވާފައި އެމަނިކުފާނު ޕީޕީއެމްއާ ގުޅިވަޑައިގެންނެވީ 2013 ވަނަ އަހަރުގެ ރިޔާސީ އިންތިހާބުގެ ފަހުންނެވެ.
ކުރިއަށް އޮތް ރިޔާސީ އިންތިހާބަށް ޕީޕީއެމުން ރިޔާސީ ކެންޑިޑޭޓެއް ނުނެރުމަކީ އެ ޕާޓީގެ ލީޑަޝިޕްގެ ހިޔާނާތެއް، އަދި އަނިޔާވެރި އަމަލެއް ކަމަށް ވިދާޅުވެ، ޕީޕީއެމުން އެމަނިކުފާނު ވަކިވެވަޑައިގެންނެވީ މިދިޔަ ބުރާސްފަތި ދުވަހު އެވެ.
