އިސްލާމްއާބާދް، ޕާކިސްތާން (އޯގަސްޓު 12) - ޕާކިސްތާނުގެ ވަގުތީ ބޮޑު ވަޒީރުގެ މަގާމަށް ބަލޮޗިސްތާން ޕްރޮވިންސްގެ ސެނެޓަރު އަންވާރުލް ހައްގު ކާކަރް އައްޔަންކޮށްފި އެވެ.
މިހާރުގެ ބޮޑު ވަޒީރު ޝެހްބާޒް ޝަރީފް އާއި އިދިކޮޅު ލީޑަރު ރާޖާ ރިއާޒް އަހްމަދު އެއްބަސްވެވަޑައިގެންނެވީ އަންވާރުލް ހައްގު ވަގުތީ ގޮތުން ބޮޑު ވަޒީރު ކަމަށް ގެނައުމަށެވެ.
އެކަން އިއުލާން ކުރެއްވީ ރައީސް އާރިފް އަލްވީ އެވެ. އުމުރުން 52 އަހަރުގެ އަންވާރުލް ހައްގުގެ އެންމެ ބޮޑު ޒިންމާއަކީ ނޮވެމްބަރުގެ ކުރިން އާއްމު އިންތިހާބާއި ޕްރޮވިންސްތަކުގެ އިންތިހާބު ބޭއްވުމެވެ.
އެހެން ނަމަވެސް، ގައުމުގެ އިގްތިސާދީ އަދި ސިޔާސީ ހާލަތުގެ ސަބަބުން އިންތިހާބު އަންނަ އަހަރަށް ފަސްވުން އެކަށީގެންވާ ކަމަށް ބައެއް އޮފިޝަލުން ބުނެ އެވެ.
އެނެލިސްޓުން ދެކޭ ގޮތުގައި ބޮޑެތި ސިޔާސީ ޕާޓީތަކާ މާ ބޮޑު ގުޅުމެއް ނެތް މީހަކު ބޮޑު ވަޒީރު ކަމަށް ގެނައުމުން، މި ދަނޑިވަޅުގައި ކަންކަން ކުރިއަށް ގެންދަން ފަސޭހަވާނެ ކަމަށް ބެލެވެ އެވެ.
އިންތިހާބަކަށް މިސްރާބު ޖަހާ އިރު، އެންމެ މަގްބޫލު ލީޑަރު އަދި ކުރީގެ ބޮޑު ވަޒީރު އިމްރާން ހާންގެ މައްޗަށް ވަނީ ތިން އަހަރުގެ ޖަލު ހުކުމެއް އިއްވައިފަ އެވެ.
އިންތިހާބުގައި އިމްރާނަށް ވާދަނުކުރެވޭނެ ކަމަށް ކަނޑައަޅާފައިވާ އިރު، އޭނާގެ ފަރާތުން ވަނީ ހުކުމް އިސްތިއުނާފަށް ހުށަހަޅައިފަ އެވެ.
ބުދަ ދުވަހު ޕާލަމެންޓު އުވާލާފައިވާ އިރު، ގާނޫނު އަސާސީގައިވާ ގޮތުން 90 ދުވަހުގެ ތެރޭގައި އިންތިހާބު ބާއްވަން ޖެހޭނެ އެވެ.
