ބިންވެރިޔާ ސްކީމުގެ ދަށުން ގޯތި ލިބުނު މީހުންނަށް އަންނަ އަންގާރަ ދުވަހުން ފެށިގެން ގޯތި ދޫކުރަން ފަށާނެ ކަމަށް ރައީސް ސޯލިހު މިއަދު ވިދާޅުވެއްޖެ އެވެ.
ސެޕްޓެމްބަރު، 9 ގައި އޮންނަ ރިޔާސީ އިންތިހާބުގެ ކެމްޕެއިނުގައި މިހާރު ނ. އަތޮޅަށް ކުރައްވަމުން ގެންދަވާ ދަތުރުގައި، އެ އަތޮޅު ކުޑަފަރީގައި ރައީސް ސޯލިހު ވިދަޅުވީ މާލޭން ގޯތި ލިބުނު ފަރާތްތަކުގެ ތެރެއިން ކޮންމެވެސް އެއް އާއިލާއަކަށް އަންގާރަ ދުވަހުން ފެށިގެން ކޮންމެ ދުވަހަކު ވެސް ގޯތި ލިބެމުން ދާނެ ކަމަށެވެ.
"އަޅުގަނޑުމެންގެ ޕްލޭނަކީ މިމަހުގެ 15 ވަނަ ދުވަހުން ފެށިގެން ގޯތިތައް ހަވާލު ކުރުމުގެ މަސައްކަތް ފަށަން، ކޮންމެ ދުވަހަކު ކޮންމެވެސް ބަޔަކަށް، އާއިލާއަކަށް ގޯތި ލިބެމުން ދާތަން ތިޔަބޭފުޅުންނަށް ފެނިވަޑައިގަންނަވާނެ،" ރައީސް ސޯލިހު ވިދާޅުވި އެވެ.
ސަރުކާރުން ނިންމާފައި ވަނީ ހުޅުމާލޭން 1،000 ގޯތީގެ އިތުރުން، ގުޅީފަޅުން 2،000 ގޯއްޗާއި އަދި ގިރާވަރު ފަޅު ހިއްކާ އެ ބިމުން މަދުވެގެން 2,000 ގޯތި މާލޭ ރަށްވެހިންނަށް ދިނުމަށެވެ.
ބިންވެރިޔާ ސްކީމްގެ ދަށުން ގޯއްޗަށް އެދި 23،088 މީހުންގެ ފަރާތުން، 15،164 އެޕްލިކޭޝަން ހުށައަޅާފައިވެ އެވެ. ވަކިން ހުށަހެޅި މީހުންނާއި ޖޮއިންޓް ފޯމު ހުށަހެޅި މީހުންނާއެކު ގޯތި ލިބޭ މީހުންގެ ތެރޭގައި 10،314 މީހުން ހިމެނެ އެވެ.
އެކަމާ ގުޅޭގޮތުން އެކުލަވާލި ކޮމިޓީގެ ޗެއާ އަދި ޕްލޭނިން މިނިސްޓަރީގެ ސްޓޭޓް މިނިސްޓަރު، އަކްރަމް ކަމާލުއްދީން ވިދާޅުވީ ރައީސް ވިދާޅުވި ގޮތަށް ގޯތި ދިނުމުގެ މަސައްކަތްތައް ފެށުމަށް މިހާރު ތައްޔާރުވެފައިވާ ކަމަށެވެ.
"ރައީސް ވިދަޅުވި ގޮތަށް، އިން ވަކިކޮށް ގޯތި ކަނޑާ، ކަޑަ ޖަހަމުން ހަވާލު ކުރަން ފަށާނަން، ފުރަތަމަ ގޯތި ދޭން ފަށާނީ ހުޅުމާލެއިން،" އަކްރަމް ވިދާޅުވި އެވެ.
މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދައިދިނުމަކީ މި ސަރުކާރުގެ ރިޔާސީ ވައުދެކެވެ. އެ ވައުދު ފުއްދުމުގެ ގޮތުން ބިންވެރިޔާ ސްކީމާއެކު އިއުލާނު ކުރި ގެދޮރުވެރިޔާ ސްކީމުގެ ދަށުން ފުލެޓު ލިބޭ މީހުންގެ ވަގުތީ ލިސްޓު ވެސް ވަނީ މިދިޔަ ހަފުތާގައި އާންމުކޮށްފަ އެވެ. ރައީސް ސޯލިހު ނިންމަވާފައި ވަނީ ފުލެޓަށް ވެސް އެދި ހުށަހެޅި ފަރާތްތަކުގެ ތެރެއިން ޝަރުތު ހަމަވާ ހުރިހާ އެންމެންނަށް ބޯހިޔާވަހިކަން ދިނުމަށެވެ.
