ދަ ޑިމޮކްރެޓްސްއާއެކު މަސައްކަތް ކުރަން އެގްރިމެންޓެއްގައި އެންމެ ބޮޑު އިދިކޮޅު ޕާޓީ ޕީޕީއެމުން ސޮއިކޮށްފި ނަމަ ހަފުތާއެއްގެ ތެރޭގައި ޔާމީން މިނިވަން ކުރާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބުގެ ކެމްޕެއިނުގައި މިދިޔަ ބުރާސްފަތި ދުވަހުގެ ރޭ ގދ. ގައްދޫގައި ބޭއްވި ޖަލްސާގައި، ޔާމީން މިނިވަން ކުރަން ޕީޕީއެމް/ޕީއެންސީ ކޯލިޝަންގެ ލީޑާޝިޕުން ބޭނުންނުވާ ކަމަށް ތުހުމަތު ކުރައްވަމުން ނަޝީދު ބާރު އެޅުއްވީ އެ ޕާޓީން ޑިމޮކްރެޓްއާއެކު ކޯލިޝަނެއް ހެދުމަށެވެ.
"އަޅުގަނޑުމެން ޕީޕީއެމް މެންބަރުންނަށް ޔަގީންކޮށް އަރުވަން، ތި ބޭފުޅުން އަޅުގަނޑުމެންނާއެކު މަސައްކަތް ކުރުމަށް އެއްބަސްވެ ސޮއި އަޅާތާ، އިރާދަކުރެއްވިއްޔާ ހަފުތާއެއްގެ ތެރޭގައި، މާލެ މަގުމަތީގައި އަޅުގަނޑު އަބަދު ހުރެގެން ވެސް، ރައީސް ޔާމީން ގެއަށް ގެނެސްދޭނަން، އަދި ރައީސް ޔާމީން ދޫވެސްކޮށްލާނަން،" ނަޝީދު ވިދާޅުވި އެވެ.
ނަޝީދު ވިދާޅުވީ ޔާމީން ޖަލުން މިނިވަން ކުރަން ބޭނުންވާ ހަގީގީ މަސައްކަތް ޕީޕީއެމްގެ ލީޑާޝިޕުގައި ތިއްބެވި ބޭފުޅުން ނުކުރާ ކަމަށެވެ.
"ރައީސް ޔާމީން ފަސް އަހަރު ޖަލުގައި ހުންނެވީ މިއަދު ޕީޕީއެމްގެ ލީޑާޝިޕްގައި އެ ތިއްބެވި އެތައް ބޭފުޅުންނެއް އެ ގޮތަށް އެކަން އޮތުމަށް އެދިވަޑައިގެން ތިއްބެވީމާ،" ރާއްޖޭގެ ވެރިކަން ތިން އަހަރެއްހާ ދުވަހު ކުރެއްވި، ކުރީގެ ރައީސް ނަޝީދު ވިދާޅުވި އެވެ.
އެމްއެމްޕީއާރުސީ ބޮޑު ހިޔާނާތުގައި ބައިވެރިވި ކަމުގެ ތުހުމަތުގައި އުފުލި ދައުވާތަކެއް ސާބިތުވާ ކަމަށް ކަނޑައަޅައިގެން 11 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ޔާމީން ސަލާމަތް ކުރުމަށް ހަގީގީ މަސައްކަތެއް ކުރެވޭނީ ޑިމޮކްރެޓްސްއަށް ކަމަށް ވެސް ނަޝީދު ވިދާޅުވި އެވެ.
"އަޅުގަނޑު ޕީޕީއެމްގެ މެންބަރުންނަށް ޔަގީންކޮށް އަރުވަން، މިއަދު ވެސް ރައީސް ޔާމީން ޖަލުން ނެރުމަށް، ހަގީގީ މަސައްކަތެއް ކޮށްދެވެން އޮތީ އަޅުގަނޑުމެންނަށް، ޕީޕީއެމަކަށް ނޫން، ޕީޕީއެމްގެ ލީޑަޝިޕުން އެ މަސައްކަތް ކޮށްދޭން ހުރި ނަމަ ރައީސް ޔާމީން ޖަލުގައި ނުހަންނަވާނެ،" ނަޝީދު ވިދާޅުވި އެވެ.
ދެހާސް ފަނަރަ ވަނަ އަހަރު ނަޝީދު 13 އަހަރަށް ޖަލަށްލީ އެ މަނިކުފާނުގެ ވެރިކަމުގައި ކްރިމިނަލް ކޯޓުގެ އޭރުގެ އިސް ގާޒީ، އަބްދުﷲ މުހައްމަދު ހައްޔަރުކުރި މައްސަލައިގައި، ޓެރަރިޒަމް ކުށް ސާބިތުވާ ކަމަށް ކަނޑައެޅުމަށް ފަހު އެވެ. އެ ހުކުމް ބައިނަލްއަގުވާމީ މުޖުތަމައުން ބަލައި ނުގަނެ، ނަޝީދު މިނިވަން ކުރަން ގޮވާލަމުން ދިޔަސް، މިނިވަނެއް ނުކުރެ އެވެ.
ނަތީޖާއެއްގެ ގޮތުން ނަޝީދަށް 2018 ގެ ރިޔާސީ އިންތިހާބުގައި ވާދަނުކުރެވުނެވެ. އެމަނިކުފާނަށް އޭރު އެމްޑީޕީގެ ރިޔާސީ ޓިކެޓު އަރުވާފައިވީ ނަމަވެސް ވާދަނުކުރެވޭނެ ކަން ޔަގީންވުމުން އެމްޑީޕީގެ ކޮންގްރެސް މެދުވެރިކޮށް އޭރު އެމްޑީޕީގެ ޕާލިމެންޓްރީ ގްރޫޕްގެ ލީޑަރު އިބްރާހިމް މުހައްމަދު ސޯލިހަށް ރިޔާސީ ޓިކެޓު ހަވާލުކުރި އެވެ. އޭގެ ފަހުން އެމްޑީޕީގެ އެތެރޭގެ އިންތިހާބުތައް ކާމިޔާބުކުރަނީ، މިހާރުގެ ރައީސް ސޯލިހެވެ.
ޔާމީން ޖަލަށް ލާފައި ވަނީ އެ މަނިކުފާނުގެ ވެރިކަމުގައި ވ. އާރަށް ކުއްޔަށް ދޫކުރުމުގެ މުއާމަލާތުގައި ރިޝްވަތު ހިފާފައިވާ ކަމާއި އެ ފައިސާ ލޯންޑަކުރިކަމުގެ ކުށް ސާބިތުވާ ކަމަށް ކްރިމިނަލް ކޯޓުން ކަނޑައެޅުމަށް ފަހު އެވެ. އެ ކުށުގެ އަދަބެއްގެ ގޮތުގައި 11 އަހަރަށް ޖަލަށް ލުމާއެކު 5 މިލިއަން ޑޮލަރުން ޖޫރިމަނާކުރި އެވެ. އެ ހުކުމް އިސްތިއުނާފުކޮށްފައިވާއިރު، އަޑުއެހުންތައް ވަނީ ހައިކޯޓުގައި ފަށައިފަ އެވެ.
