އދ. ދިއްދޫ ސެޓަލައިޓް ސްކޫލަށް ފެނާއި ކަރަންޓުގެ ހިދުމަތް ނުލިބޭތީ އެ ސްކޫލުގެ ކިޔެވުން ނުފެށޭ ކަމަށް އެ ރަށު ކައުންސިލުން ބުނެފި އެވެ.
މި ނޫހަށް މައުލޫމާތު ދެއްވަމުން ދިއްދޫ ކައުންސިލުގެ ނައިބު ރައީސް އަހްމަދު އާދަމް ވިދާޅުވީ ގިނަ މައްސަލަތަކެއް ހުރުމުގެ ސަބަބުން ސުކޫލުގެ ކިޔެވުން ފެށިފައިނުވާ ކަމަށެވެ.
"ތިފަދަ [ކަރަންޓާއި ފެނުގެ ހިދުމަތް ނުލިބުން ފަދަ] ގިނަ މައްސަލަތަކެއް އެބަހުރި އެތާގަ. އަޅުގަނޑުމެން ޕްރިންސިޕަލާ ވާހަކަ ދައްކާލިން. ސްކޫލު ފެށުނިއްސުރެ ކުދިން ގެންގޮސްގެން ކިޔަވައެއް ނުދެވޭ،" އަހްމަދު އާދަމް ވިދާޅުވި އެވެ.
އަހްމަދު ވަނީ ސުކޫލުގައި ހުރި މައްސަލަތައް ގާތުން ބަލައި ވީ އެންމެ އަވަހަކަށް ހައްލުކުރުމުގެ މަސައްކަތް ކައުންސިލުން ކުރާނެ ކަމުގައި ވެސް ވިދާޅުވެފަ އެވެ.
"އަޅުގަނޑު މިހާރު ވެސް މި ދަނީ ސްކޫލާ ދިމާލަށް. އެތަނުގަ ހުރި މައްސަލަތައް ބަލައި ދެނެގަންނަން،" ކައުންސިލުގެ ނައިބު ރައީސް ފާހަގަކުރެއްވި އެވެ.
ދިރާސީ އައު އަހަރާއިއެކު އދ. ދިއްދޫ ސުކޫލުގައި ސެޓަލައިޓްކޮށް ކިޔަވައިދޭން އެޑިއުކޭޝަން މިނިސްޓްރީން ނިންމީ އެ ރަށުގެ އާބާދީ މަދުވުމުގެ ސަބަބުންނެވެ. ދިއްދޫގައި މިހާރު އުޅެނީ ގާތްގަނޑަކަށް 200 މީހުންނެވެ. އޭގެ ތެރޭގައި 22 ދަރިވަރުން ހިމެނެ އެވެ.
އދ. ދިއްދޫ ސުކޫލުގެ އިތުރުން ވ. ރަކީދޫ، ބ. ފުޅަދޫ އަދި ގއ. ކޮނޑޭ ސްކޫލްގައި ވެސް މިއަހަރު އަލަށް ސެޓަލައިޓް މެދުވެރިކޮށް ކިޔަވައިދިނުމަށް އެޑިއުކޭޝަން މިނިސްޓްރީން ވަނީ ނިންމާފަ އެވެ.
