އިންޑިއާގެ ބޮޑު ވަޒީރު ނަރެންދްރަ މޯދީގެ ސަރުކާރުގެ އިތުބާރު ނެތްކަމުގެ މައްސަލައިގައި އެ ގައުމުގެ ޕާލަމެންޓުގައި އަންގާރަ ދުވަހު ބަހުސްކޮށްފި އެވެ.
އިދިކޮޅު ކޮންގްރެސް ޕާޓީއިން އެ މައްސަލަ ހުށަހެޅީ މަނީޕޫރް ސްޓޭޓުގައި ހިނގަމުންދާ ހަަމަނުޖެހުންތަކާ ގުޅޭ ގޮތުން މޯދީ ހަނުހުންނަވާތީ އެކަން ކުށްވެރި ކުރުމުގެ ގޮތުންނެވެ.
އެ މައްސަލައިގައި ވޯޓަށް އަހާނެ ކަމަށް ބެލެވެނީ ބުރާސްފަތި ދުވަހު އެވެ.
ޕާލަމެންޓުގެ ތިރިގޭގެ 543 ގޮނޑީގެ ތެރެއިން 303 ގޮނޑި އޮތީ މޯދީގެ ބަރަތިޔަ ޖަނަތަ ޕާޓީ (ބީޖޭޕީ) އަށެވެ. އެހެންކަމުން ވޯޓު ފެއިލްވާނެ ކަމަށް ލަފާކުރެވެ އެވެ.
އަންގާރަ ދުވަހު ބަހުސް ކުރައްވަމުން ކޮންގްރެސް ޕާޓީގެ މެމްބަރުން ވިދާޅުވީ މިއީ ވޯޓުގެ އަދަދާ ގުޅޭ މައްސަލައެއް ނޫން ކަމަށާއި މިއީ މަނީޕޫރަށް އިންސާފު ހޯދައި ދިނުމުގެ މައްސަލައެއް ކަމަށެވެ.
މިދިޔަ މޭ މަހުން ފެށިގެން ދެ ގަބީލާއެއްގެ މެދުގައި ހިނގަން ފެށި ހަމަނުޖެހުންތަކުގައި 120 މީހުން މިހާތަނަށް މަރުވެފައިވާ ކަމަށް ރިޕޯޓުތައް ބުނެ އެވެ.
ހަމަނުޖެހުން ހިނގަނީ އެ ސްޓޭޓްގެ މެޖޯރިޓީ މެއިތެއި ދަރިކޮޅުގެ ހިންދޫންނާއި ނަސާރާއިންގެ ގޮތުގައި ތިބި ކޫކީ ކޮމިޔުނިޓީއާ ދެމެދު އެވެ.
