އަބުރާ ބެހުމުގެ ޖިނާއީ މައްސަލައެއް ސާބިތުވާ ކަމަށް ނިންމި ނިންމުން ސަސްޕެންޑު ކުރަން އިންޑިއާގެ ސުޕްރީމް ކޯޓުން ނިންމުމާ އެކު އިންޑިއާގެ އިދިކޮޅު ލީޑަރު ރާހުލް ގާންދީގެ ޕާލަމެންޓް ގޮނޑި އަނބުރާ ލިބިއްޖެ އެވެ.
ކޮންގްރެސް ޕާޓީގެ ލީޑަރުގެ މަައްޗަށް ދެ އަހަރުގެ ޖަލު ހުކުމެއް އިއްވީ 2019 ގަ އެވެ. އެއީ ބޮޑު ވަޒީރު ނަރެންދްރަ މޯދީގެ ނަމާ ގުޅުވައިގެން އެއްވުމެއްގެ ތެރެއިން ދެއްކެވި ވާހަކަތަކަކާ ގުޅޭ މައްސަލައެކެވެ.
އެ ހުކުމަށް ފަހު ރާހުލް ޕާލަމެންޓް މެމްބަރުކަމުން ޑިސްކޮލިފައިވެ ގޮނޑި ގެއްލުނެވެ. ރާހުލް އެނބުރި ވަޑައިގެންނެވުމުން ކޮންގްރެސް ޕާޓީއިން ހޫނު މަރުހަބާއެއް ކިޔެވެ.
އޭގެ އިތުރުން ކޮންގްރެސް ޕާޓީގެ ސަޕޯޓަރުން ވަނީ ނިއު ދިއްލީގައި ހުންނަ މައި އޮފީސް ބޭރުގައި ލަވަ ޖހައި، ދިދަ ވިހުރުވަމުން އުފާފާޅުކޮށްފަ އެވެ.
ގުޖަރާތުގެ ކޯޓުން ކޮންގްރެސް ޕާޓީގެ ލީޑަރާ ދެކޮޅަށް ނިންމީ 2019 ވަނަ އަހަރު އޮތް ކެމްޕެއިން އެއްވުމެއްގެ ތެރެއިން ބޮޑު ވަޒީރު ނަރެންދްރަ މޯދީގެ ނަމާ ބެހޭ ގޮތުން ދެއްކި ވާހަކައަކާ ގުޅިގެންނެވެ.
"މި ހުރިހާ ވަގުންގެ ފަހަތު ނަމަކަށް މޯދީ އޮންނަނީ ކީއްވެގެންތޯ؟ ނިރާވް މޯދީ، ލަލިތު މޯދީ، ނަރެންދްރަ މޯދީ،" އެ އެއްވުމުގެ ތެރެއިން އެމަނިކުފާނު ވިދާޅުވި އެވެ.
ނިރާވް މޯދީއަކީ އިންޑިއާގެ އިދާރާތަކަށް ފިލައިގެން އުޅޭ މަހުޖަނެކެވެ. އަދި ލަލިތު މޯދީއަކީ އިންޑިއާގެ ކްރިކެޓް ބޯޑުން ފިޔަވަޅު އަޅާފައި ހުރި އިންޑިއާ ޕްރިމިއާ ލީގުގެ ކުރީގެ ވެރިޔާ އެވެ.
ރާހުލް ގާންދީ ވިދާޅުވީ އެމަނިކުފާނުގެ ވާހަކަތަކުގެ މަގުސަދަކީ ކޮރަޕްޝަނަށް އަލިއެޅުވުން ކަމަށާއި އެއީ ވަކި ބަޔަކަށް އަމާޒުކޮށް ދެއްކި ވާހަކައެއް ނޫން ކަމަށެވެ.
