އެޕަލްގެ ކޯ ފައުންޑަ ސްޓީވް ޖޮބްސްގެ ދަރި، ރީޑް ޖޮބްސް، ކެންސަރު ބަލީގެ ފަރުވާއަށް ހާއްސަ ވެންޗާ ކެޕިޓަލް ފާމްއެއް ފަށައިފި އެވެ.
އުމުރުން 31 އަހަރުގައި ރީޑް ފެށި ފާމްއަށް ދީފައިވާ ނަމަކީ "ޔޯސޭމަޓީ" އެވެ. މިއީ އޭނާގެ ބައްޕަ ސްޓީވް ޖޮބްސް އާއި މަންމަ، ފިލަންތްރޮޕިސްޓް ލޯރީން ޕަވެލް ކައިވެނި ކުރި ނޭޝަނަލް ޕާކްގެ ނަމެވެ.
އެކި ފަރާތްތަކުގެ އެހީގައި ޔޮސޭމަޓީ ފާމްގެ ފުރަތަމަ ފަންޑަށް ވަނީ 200 މިލިއަން ޑޮލަރު ލިބިފަ އެވެ. އޭގެ ތެރޭގައި ހައިބަތު ހުރި އިސް ބޭފުޅުންގެ އިތުރުން އެމްއައިޓީ އާއި މެމޯރިއަލް ސްލޯން ކެޓަރިން ކެންސާ ސެންޓާ ފަދަ އިންސްޓިޓިއުޝަންތައް ހިމެނެ އެވެ.
ޕެންކްރިއެޓިކް ކެންސާގައި 2011 ވަނަ އަހަރު ބައްޕަ މަރުވި އިރު ރީޑް ހުރީ ސްޓެންފޯޑްގައި ޑޮކްޓަރަކަށްވުމަށް ޓަކައި ކިޔަވަމުން ދިޔަ އަންޑަގްރެޖުއޭޓް ދަރިވަރެއްގެ ގޮތުގައި އެވެ. ނަމަވެސް ބައްޕަގެ މަރާއެކު އޭނާގެ މޭޖާ ހިސްޓްރީއަށް ބަދަލުކޮށް، އެ ދާއިރާއިން މާސްޓާސް ޑިގްރީއެއް ހޯދި އެވެ.
ކިޔެވުން ނިންމާލުމަށް ފަހު ރީޑްސް މަސައްކަތްކުރީ އިމާސަން ކަލެކްޓިވްގަ އެވެ. އެއީ އޭނާގެ މަންމަ 2004 ގަ ފެށި ފާމް އެކެވެ. ޔޯސޭމަޓީ އަކީ މީގެން އުފަންވެގެން އައި ރީޑްގެ އަމިއްލަ މަސައްކަތެކެވެ.
އާ ކުންފުނި ހިންގާނީ ޑޯނަރުންގެ އެހީތެރިކަމުގެ އިތުރުން މަސައްކަތްކުރާ ފަރާތްތަކަށް ވެސް ފައިދާ ވާ ފަދަ ގޮތަކަށެވެ. އަދި ޑޮނޭޝަންތައް ކެންސަރުގެ މުހިންމު މަސައްކަތް ކުރާ ފަރާތްތަކަށް ލިބެމުންދާނެ އެވެ.
