ސެޕްޓެމްބަރު 9, ގައި އޮންނަ ރިޔާސީ އިންތިހާބުގައި ވާދަކުރުމަށް ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކެންޑިޑެސީ ލިބިވަޑައިގެންނެވި މާލެ ސިޓީގެ މޭޔަރު ޑރ. މުހައްމަދު މުއިއްޒު އެންޑޯޒް ކޮށް "ޕްލޭން ބީ" އެއްގެ ގޮތުގައި ވުޖޫދުކޮށްފައި ނުވާނެ ކަމަށް އިދިކޮޅު މައި ޕާޓީ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ބުނެފި އެވެ.
ޖަލު ހުކުމެއް ތަންފީޒު ކުރައްވަމުން ގެންދަވާ އިދިކޮޅު ލީޑަރު އަދި ކުރީގެ ރައީސް އަބްދުالله ޔާމީންގެ ކެންޑިޑެސީ މައްސަލަ ސުޕްރީމް ކޯޓުގައި ހިނގަމުންދާއިރު އެމަނިކުފާނަށް ވާދަ ނުކުރެވިއްޖެ ހާލަތެއްގައި ޕީއެންސީގެ ކެންޑިޑޭޓެއް ނެރުމަށް މީގެކުރިން އޮތީ ނިންމާފަ އެވެ.
އެހެން ނަމަވެސް, ޔާމީންގެ ފަރާތުން ސުޕްރީމް ކޯޓުގައި އެދުނު އެއް ކަމަކީ އެމަނިކުފާނަށް ވާދަނުކުރެވިއްޖެ ހާލަތެއްގައި ޕީޕީއެމުން ކެންޑިޑޭޓެއް ނެރުމަށް ފުރުސަތު ފަހިކޮށްދިނުމަށެވެ. އެއާއެކު ޕީއެންސީގެ ޓިކެޓު ލިބިވަޑައިގެންނެވި ޑރ. މުއިއްުޒުއަކީ އިދިކޮޅު "ޕްލޭން ސީ" އަށް ވެގެންދިޔަ އެވެ. މުއިއްޒު ޕީޕީއެމް ދޫކުރެއްވީ ވެސް ޕީއެންސީގެ ޓިކެޓު ހޯދުމަށެވެ.
އެހެން ނަމަވެސް, އިދިކޮޅު ލީޑާޝިޕުން މަޝްވަރާކޮށް މުއިއްޒު އެންޑޯސް ކުރަން ނިންމާފައިވާ ކަމަށް ބުނެ ބައެއް މީޑިއާތަކުގައި ރިޕޯޓުކޮށްފައިވެ އެވެ. އެ ހަބަރުތައް ދޮގުކޮށް ޕީޕީއެމުން ވަނީ އެފަދަ ކަމެއް ނިންމާފައި ނުވާކަން ޔަގީންކޮށްދީފަ އެވެ.
"ޕީޕީއެމްގެ ފަރާތުން ޕީއެންސީ ގެ ރިޔާސީ ކެންޑިޑޭޓް އެންޑޯޒް ކުރަން ނިންމައި ޕީޕީއެމްގެ ޕްލޭން ބީއެއްގެ ގޮތުގައި ވުޖޫދުކޮށްފައި ނުވާނެ ވާހަކަ ދެންނެވީމެވެ. ޕީޕީއެމުން ޕްލޭން ބީ ނުވަތަ ސީ އަކާމެދު ވިސްނާނީ، ރައީސް ޢަބްދުﷲ ޔާމީން ޢަބްދުލްޤައްޔޫމަށް ވާދަ ނުކުރެއްވޭނެ ހާލަތެއް މެދުވެރިވުމުން އެކަންޏެވެ." މިއަދު ނެރުނު ބަޔާނުގައި ބުނެފައިވެ އެވެ.
މިވަގުތު ވެސް ކެންޑިޑޭޓަކީ ޔާމީނުކަން ތަކުރާރު ކުރަމުން ޕީޕީއެމްގެ ބަޔާނުގައި ވަނީ ސުޕްރީމް ކޯޓުގައި ވަކާލާތު ކުރަމުންދަނީ ވެސް ޔާމީންގެ ކެންޑިޑެސީ ބަލައިގަތުމަށް އަމަރު ކޮށްދިނުމަށް ކަމަށް ބުނެފަ އެވެ.
"ހަމައެއާއެކު، ޕީޕީއެމްގެ ކެންޑިޑޭޓަށް ރިޔާސީ އިންތިޚާބުގައި ވާދަ ކުރުމުގެ ފުރުޞަތު ގެއްލޭނަމަ، ޕީޕީއެމަށް ކެންޑިޑޭޓަކު ނެރުމުގެ ފުރުޞަތު ލިބިދިނުމަށެވެ." އެ ޕާޓީން އެހެން ކެންޑިޑޭޓަކު ނެރޭނެކަން ހާމަކުރަމުން ބުނެފައިވެ އެވެ.
މުއިއްޒު އެންޑޯޒް ކޮށްފައި ނުވާނެ ކަމަށް ޕީޕީއެމުން ބުނެފައިވާއިރު އޭނާގެ ރަނިން މޭޓަކަށް އެ ޕާޓީގެ ޓިކެޓުގައި މަޖިލީހަށް ހޮވިވަޑައިގެންނެވި ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް ވަނީ ހަމަޖައްސާފަ އެވެ.
ޔާމީންގެ ކެންޑިޑެސީ މައްސަލައިގެ އަޑުއެހުންތައް ވަނީ އިއްޔެ ނިންމާލައިފަ އެވެ. ހަވީރު 4:00 އިން ފެށިގެން ރޭގަނޑު 11:30 ހާއިރު ވަން ދެން ކުރިއަށް ދިޔަ އަޑުއެހުންތަކުގައި، ޔާމީންގެ ފަރާތުން ވަކާލާތު ކުރަނީ ނިހާއީ ހުކުމެއް ނެތް ނަމަ އެމަނިކުފާނަށް ވާދަކުރެވެން ޖެހޭނެ ކަމަށެވެ.
ގާނޫނީ އަސާސީގައި ބަޔާންކޮށްފައިވާ ރައީސުލްޖުމްހޫރިއްޔާއަށް ވުމުގެ އެއް ޝަރުތަކީ، ޖިނާއީ ކުށެއްކުރިކަން ސާބިތުވެގެން 12 މަސް ދުވަހަށް ވުރެ ދިގު މުއްދަތެއްގެ ހުކުމެއް އޮތް ނަަމަ، އެ ހުކުމް ތަންފީޒުކޮށް ނިމުނުތާ ނުވަތަ ކަނޑައެޅުނު އަދަބު މައާފު ކުރެވުނުތާ ތިން އަހަރު ވެފައިވާ މީހަކަށް ވުމެވެ.
ރިޔާސީ ކެންޑިޑޭޓަކަށް ވުމުގެ ޝަރުތު އެމަނިކުފާނުގެ ހަމަނުވާ ކަމަށް އީސީން ނިންމީ ވ. އާރަށު ދޫކުރުމުގެ ތެރެއިން ރިޝްވަތު ނަންގަވައި ފައިސާ ލޯންޑާ ކުރެއްވިކަން ސާބިތުވެ ޔާމީނަށް އިއްވާފައިވާ 11 އަހަރުގެ ޖަލު ހުކުމާ ހެދި އެވެ. އެ ހުކުމާއެކު ދައްކަން ޖެހޭ ފަސް މިލިއަން ޑޮލަރުގެ ޖޫރިމަނާ އޮތުމުން އެއީ ސާބިތު ދަރަންޏެއް ކަމަށް ބަލައި އެ ސަބަބު ބަޔާންކޮށް ވެސް އިލެކްޝަނުން ފަހުން ލިޔުމެއް ފޮނުވި އެވެ.
