އިންޑިއާގައި ދީނީ ހަމަނުޖެހުންތަކުގެ ތެރެއިން ހަ މީހުން މަރާލާފައި ވަނިކޮށް, ވެރިރަށް ނިއުދިއްލީގެ ބައެއް މިސްކިތްތައް ހުކުރު ދުވަހު އާއްމުންނަށް ބަންދުކޮށްފި އެވެ.
ނިއުދިއްލީގެ ސެޓެލައިޓް ސިޓީއެއްގެ ގޮތުގައި އޮންނަ ގުރޫގްރަމްގެ ބޮޑެތި މިސްކިތްތަކުގެ ބޭރުގައި ފުލުހުން ސެކިއުރިޓީ ބެލެހެއްޓި ނަމަވެސް، ހަމަަނުޖެހުމުގެ ބިރާ ހެދި މިސްކިތްތައް ހުރީ ބަންދުކޮށްފަ އެވެ.
ހޯމަ ދުވަހު މުސްލިމުން ގިނަ ހިސާބެއްގައި ހިންދޫ ދީނުގެ ފެސްޓިވަލެއް ކުރިއަށް ގެންދިޔުމުން ހޫނުވި މައްސަލައިގެ ތެރެއިން ގްރޫޕުތަކުން ވަނީ މިސްކިތްތަކަށް ހަމަލާދީފަ އެވެ.
އޭގެ އިތުރުން މުސްލިމުންގެ ފިހާރަތަކާއި ރެސްޓޯރެންޓުތަކަށް ގެއްލުންދީ ހިންދޫ ދީނުގެ ޝިއާރުތައް ގޮވަަމުން ހިންގި ހަމަނުޖެހުމުގައި މިސްކިތެއްގެ އިމާމަކު ވެސް މަރާލި އެވެ.
އޭގެ ފަހުން މާ ބޮޑު ހަމަނުޖެހުމެއް ނުހިނގި ނަމަވެސް، ހުކުރު ދުވަހު ބައެއް މިސްކިތްތައް ހުޅުވަން މުސްލިމުން ފަސްޖެހުނެވެ.
ގުރޫގްރަމްގައި ގާތްގަނޑަކަށް ފަސްލައްކަ މުސްލިމުން އުޅެ އެވެ. އެކަމަކު އެ ތަނުގައި އާ މިސްކިތް އެޅުން ވެސް އިދާރާތަކުން ވަނީ މަނާކޮށްފަ އެވެ.
ރައްދުގައި މުސްލިމުން ދަނީ އާއްމުކޮށް ހުންނަ ހުސް ބިންތަކުގައި ޖަމާއަތް ހަދައި ނަމާދު ކުރަމުންނެވެ. އޭގެ ސަބަބުން ވެސް ހިންދޫން ރުޅިއާދެ އެވެ.
