އަބުރާ ބެހުމުގެ ޖިނާއީ މައްސަލައެއް އިންޑިއާގެ އިދިކޮޅު ލީޑަރު ރާހުލް ގާންދީގެ މައްޗަށް ސާބިތުވާ ކަމަށް ނިންމި ނިންމުން ސަސްޕެންޑު ކުރަން އެ ގައުމުގެ ސުޕްރީމް ކޯޓުން ނިންމައިފި އެވެ.
ކޮންގްރެސް ޕާޓީގެ ލީޑަރުގެ މަައްޗަށް ދެ އަހަރުގެ ޖަލު ހުކުމެއް އިއްވީ 2019 ގަ އެވެ. އެއީ ބޮޑު ވަޒީރު ނަރެންދްރަ މޯދީގެ ނަމާ ގުޅުވައިގެން އެއްވުމެއްގެ ތެރެއިން ދެއްކެވި ވާހަކަތަކަކާ ގުޅޭ މައްސަލައެކެވެ.
އެ ހުކުމަށް ފަހު ރާހުލް ޕާލަމެންޓް މެމްބަރުކަމުން ޑިސްކޮލިފައިވެ ގޮނޑި ގެއްލުނެވެ.
ހުކުރު ދުވަހު ސުޕްރީމް ކޯޓުން ނިންމި ނިންމުމާ އެކު ޕާލަމެންޓަށް އެނބުރި ވަޑައިގެން އަންނަ އަހަރުގެ އާއްމު އިންތިހާބުގައި ވާދަކުރުމުގެ ފުރުސަތު ރާހުލްއަށް ފަހިވާނެ އެވެ.
އެހެން ނަމަވެސް ރާހުލް ޑިސްކޮލިފައިވެފައިވާ ކަމަށް އޮތް އޮތުން ޕާލަމެންޓުގެ ތިރިގެއިން އަނބުރާ ގެންދަން ޖެހޭނެ އެވެ. އެކަން ވީ އެންމެ އަވަހަކަށް ކުރާނެ ކަމަށް ބެލެވެ އެވެ.
ސުޕްރީމް ކޯޓުން ބުނީ އެ މައްސަލައިގައި އެންމެ ހަރުކަށި އަދަބު ދޭން ޖެހޭ ކަމަށް ފަނޑިޔާރު ނިންމީ "އެކަށީގެންވާ ސަބަބެއް ނެތި" ކަމަށެވެ.
ގުޖަރާތުގެ ކޯޓުން ކޮންގްރެސް ޕާޓީގެ ލީޑަރާ ދެކޮޅަށް ނިންމީ 2019 ވަނަ އަހަރު އޮތް ކެމްޕެއިން އެއްވުމެއްގެ ތެރެއިން ބޮޑު ވަޒީރު ނަރެންދްރަ މޯދީގެ ނަމާ ބެހޭ ގޮތުން ދެއްކި ވާހަކައަކާ ގުޅިގެންނެވެ.
"މި ހުރިހާ ވަގުންގެ ފަހަތު ނަމަކަށް މޯދީ އޮންނަނީ ކީއްވެގެންތޯ؟ ނިރާވް މޯދީ، ލަލިތު މޯދީ، ނަރެންދްރަ މޯދީ،" އެ އެއްވުމުގެ ތެރެއިން އެމަނިކުފާނު ވިދާޅުވި އެވެ.
ނިރާވް މޯދީއަކީ އިންޑިއާގެ އިދާރާތަކަށް ފިލައިގެން އުޅޭ މަހުޖަނެކެވެ. އަދި ލަލިތު މޯދީއަކީ އިންޑިއާގެ ކްރިކެޓް ބޯޑުން ފިޔަވަޅު އަޅާފައި ހުރި އިންޑިއާ ޕްރިމިއާ ލީގުގެ ކުރީގެ ވެރިޔާ އެވެ.
ރާހުލް ގާންދީ ވިދާޅުވީ އެމަނިކުފާނުގެ ވާހަކަތަކުގެ މަގުސަދަކީ ކޮރަޕްޝަނަށް އަލިއެޅުވުން ކަމަށާއި އެއީ ވަކި ބަޔަކަށް އަމާޒުކޮށް ދެއްކި ވާހަކައެއް ނޫން ކަމަށެވެ.
